Wajasiriamali watakiwa kuchangamkia fursa za maonesho ya wajasiriamali kukuza masoko ya bidhaa zao

Na Beatrice Mlyansi, Maelezo

WAJASIRIAMALI nchini pamoja na vijana wameshauriwa kutumia fursa mbalimbali za maonyesho ya bidhaa za wajasiriamali katika kutangaza Biashara zao pamoja na kutengeneza fursa ya kupata masoko ya kudumu ya bidhaa wanazozalisha kwa lengo la kujiajiri, kujiongezea kipato na kukua kibiashara

Hayo yamesemwa  leo Jijini Dar es Salaam na Mkurugenzi  wa Kampuni ya African Centre for Business Consultancy (ACBC Consultancy) Bw.Rashid Adam wakati akizungumzia maonyesho yajulikanayo kama “Free Marketing Zone Exhibition” yatakayofanyika katika Viwanja vya Nyerere (Nyerere Square) Mkoani Dodoma kuanzia tarehe 31 Agosti hadi  6 Septemba 2013.

Bw. Adam amesema kuwa maonyesho ya Free Marketing Zone yamelenga zaidi kuwatafutia masoko ya kudumu wajasiriliamali mbalimbali pamoja na makampuni yatakayoshiriki kwa lengo la kukuza biashara zao pamoja na kuwakutanisha wajasiriamali na makampuni tofauti ambapo watabadilishana uzoefu na fursa mbalimbali za kibiashara

Aidha Mkurugenzi huyo amesema kuwa wajasiriamali wengi wanatengeneza bidhaa nzuri lakini wanakosa masoko ya uhakika kutokana na bidhaa zao kutojulikana kwa walaji .

 “Wajasiriamali  wengi wanatengeneza bidhaa  nzuri ,nyingine ukiziona huwezi amini kama zinatengenezwa nchini  lakini wanashindwa kuuza bidhaa hizo kutokana na kukosa  wateja na masoko kwa kutojulikana kwa bidhaa hizo .na  wateja.”alisema Bw.Adam

Bw.Adam  amewakaribisha  wananchi na wajasiriamali  kushiriki katika Maonyesho hayo ili wapate fursa ya kukutana na watu tofauti wenye ujuzi na mawazo tofauti yatakayosaidia kuboresha huduma na bidhaa wanazozalisha,vilevile kuwawezesha wateja kuwajua na kupata bidhaa hizo moja kwa moja.

Mkurugenzi huyo ameeleza kuwa wajasiriamali watakaoshiriki  watapewa vyeti vya ushiriki pamoja na nafasi ya kutangaza biashara zao katika jarida litakalokuwa na anuani za washiriki wote, zikionesha biashara zao na sehemu wanapopatikana ili wateja waweze kuwafiki kiurahisi baada ya maonyesho hayo  pamoja na kuwatangaza zaidi kibiashara.

Bw. Adam amewakaribisha wajasiriamali wote wanaopenda kushiriki maonyesho hayo ya Free Marketing Zone Exhibition ili waweze kuwafikia kiurahisi wateja wao na kutanua wigo wa masoko kwa bidhaa zao, huduma zao na  Biashara zao.

Kwa kampuni na wajasiriamali wanaopenda kushiriki katika maonyesho ya Free Marketing Zone Exhibition  wanaweza kuwasiliana na African Centre for Business Consultancy kupitia barua pepe acbc.consultancy@gmail.com au kwa simu namba  0655141185, 0713966552.