TANGAZO


Thursday, December 14, 2017

WAZIRI MKUU KASSIM MAJALIWA AAGIZA BENKI ZISIZOKIDHI VIGEZO ZIFUTIWE LESENI

Mkurugenzi wa Benki Kuu ya Tanzania (BoT), anayeshughulikia masuala ya kibenki Bw. Kened Nyoni (kulia) na Kaimu Kamishna Msaidizi Sera kutoka Wizara ya Fedha na Mipango, Bw. Michael Nyagoga (kushoto) wakifuatalia mada mbalimbali zilizokuwa zikitolewa katika mkutano wa wadau wa Jumuiya ya Benki za Wananchi (COBAT), uliofanyika kwenye ukumbi wa Wizara ya Fedha na Mipango mjini Dodoma. 
Waziri wa Fedha na Mipango, Mhe. Dkt. Philip Isdor Mpango (Mb), akihutubia katika mkutano maalum wa wadau wa Jumuiya ya Benki za Wananchi-COBAT, uliofanyika mjini Dodoma ili kujadili masuala ya Mitaji na Mpango wa Kuziunganisha Benki za Wananchi Tanzania. 
Washiriki wa mkutano maalum wa wadau wa Jumuiya ya Benki za Wananchi wakifuatilia matukio mbalimbali wakati wa mkutano huo uliofunguliwa na Waziri wa Fedha na Mipango Mhe. Dkt. Philip Isdor Mpango (Mb), (hayupo pichani), kwa niaba ya Waziri Mkuu Mhe. Kassim Majaliwa Mjini Dodoma.


Na Benny Mwaipaja, WFM, Dodoma
WAZIRI MKUU Kassim Majaliwa, ameiagiza Benki Kuu ya Tanzania BOT kuzifutia leseni benki zote za biashara pamoja na benki za wananchi zitakazoshindwa kukidhi vigezo vya kuendesha shughuli za kibenki nchini.

Ametoa agizo hilo mjini Dodoma katika hotuba iliyosomwa kwa niaba yake na Waziri wa Fedha na Mipango, Dkt. Philip Mpango, wakati akifungua Mkutano Maalum wa Wadau wa Jumuiya ya Benki za Wananchi Tanzania (COBAT).

“kwa taarifa niliyonayo hadi sasa baadhi ya benki hazijatimiza matakwa ya kisheria ya kuwa na mtaji wa kutosha, hali ambayo haiwezi kuachwa iendelea hata kidogo, kwani haiimarishi sekta ya fedha na haiwasaidii wananchi kuendelea kiuchumi” alisema Waziri Kassim Majaliwa katika hotuba hiyo

Alisema Benki Kuu ilitoa muda hadi mwishoni mwa Desemba 2017, benki za wananchi ziweze kuongeza mtaji na kwamba muda huo hautaongezwa na wala Serikali haitatoa mtaji kwa benki hizo.

“Serikali kupitia Benki Kuu ya Tanzania haitasita kuifungia benki yoyote na kufuta leseni yake ya biashara pindi itakapobaini inavunja sheria, ikiwa ni pamoja na kuwa na upungufu mkubwa wa mtaji na ukwasi ambao unahatarisha usalama wa sekta ya fedha na amana za wateja kama tulivyofanya kwa Mbinga Community Bank PLC kuanzia tarehe 12/5/2017” alisema Dkt. Mpango kwa niaba ya Waziri Mkuu.

Maagizo hayo yamekuja siku moja baada ya Mhe. Rais Dkt. John Pombe Joseph Magufuli, kuiagiza Wizara ya Fedha na Mipango wakati akifungua tawi kuu la Benki ya CRDB mjini Dodoma, kuhakikisha kuwa Benki Kuu ya Tanzania-BOT, inazifuta benki zote zinazoshindwa kujiendesha kibiashara hata kama zinamilikiwa na Serikali kwa asilimia 100.

Alisema Serikali inafanya jitihada mbalimbali ili kuhakikisha benki za wananchi zinaimarika zikiwemo kuruhusiwa kuanzisha mifumo ya ushirikiano katika Nyanja ya Mfumo wa Mawasiliano na Habari (ICT), Idara za Ukaguzi wa Ndani (Internal Audit Services), kupunguza wingi wa idara na kuwa na idara tatu (3) tu muhimu, kuruhusiwa kuungana (Federation), ambazo zitapunguza gharama za uendeshaji wa benki za wananchi na kuleta ufanisi katika kutoa huduma.

“Napenda kusisitiza kuwa sekta ya benki ni muhimu sana kwa uhai na ukuaji wa  uchumi kama ilivyo damu kwa mwili wa binadamu na kutokana na umuhimu wake huo, sekta hii ni kati ya sekta chache zinazosimamiwa  kwa karibu sana ili kulinda amana za wateja pamoja na kuhakikisha uhimilivu wa mfumo mzima wa sekta ya fedha na mwenendo wa uchumi wa Taifa” aliongeza Dkt. Mpango

Kwa upande wake Afisa Mtendaji Mkuu wa Jumuiya ya Benki za Wananchi Tanzania (COBAT) Bw. Rukwaro Senkoro, alisema hadi kufikia Juni, 2017, Benki za Wananchi nchini zilikuwa na wateja zaidi ya milioni 1.4, wateja wa vikundi zaidi ya 10,000, Matawi 12, Vituo 59, na wanahisa 66,492.

“Benki hizo zina amana zenye thamani ya shs bilioni 74.2, zimetoa mikopo ya sh. bilioni 56.8, na jumla ya mali zenye thamani ya shs. bilioni 92.3” Alisema Bw. Senkoro

Hata hivyo, kutokana na Utafiti wa Matumizi ya Huduma za Kifedha uliofanyika mwaka 2017 umebaini kuwa asilimia 28 ya wananchi bado hawapati huduma za kifedha hapa nchini hususan vijijini na kutaja changamoto ya ukosefu wa mitaji ya benki hizo kukwaza sekta hiyo.  

Dhana kuu ya mkutano huo wa COBAT uliowashirikisha wadau mbalimbali kutoka Tanzania Bara na Zanzibar ni "Mitaji na Mpango wa Kuziunganisha Benki za Wananchi Tanzania", ambayo ni dhana mpya.

WASANII WATAKIWA KUTENGENEZA KAZI NZURI ZITAKAZOVUTIA WADHAMINI


Waziri wa Habari, Utamaduni Sanaa na Michezo Mhe. Dkt. Harrison Mwakyembe akizungumza na Wasanii (hawapo pichani) leo Jijini Dar es Salaam wakati wa uzinduzi wa  Mfumo wa MaxBurudani  ulioandaliwa na Kampuni ya MaxMalipo wenye lengo la kusambaza kazi za wasanii. 


Waziri wa Habari, Utamaduni Sanaa na Michezo Mhe. Dkt. Harrison Mwakyembe akikata utepe leo Jijini Dar es Salaam kuashiria uzinduzi wa  Mfumo wa MaxBurudani  ulioandaliwa na Kampuni ya MaxMalipo wenye lengo la kusambaza kazi za wasanii.

Waziri wa Habari, Utamaduni Sanaa na Michezo Mhe. Dkt. Harrison Mwakyembe (wa kwanza kulia) pamoja na viongozi wa Kampuni ya Max Malipo wakionyesha baadhi ya kazi za wasanii zitakazosambazwa na Kampuni hiyo kupitia mfumo wa MaxBurudani leo Jijini Dar es Salaam wakati wa uzinduzi wa  Mfumo huo. 



Mkurugenzi wa Kampuni ya Max Malipo Afrika Mhandisi James Kasati akizungumza na Wasanii (hawapo pichani) leo Jijini Dar es Salaam wakati wa uzinduzi wa  Mfumo wa MaxBurudani  ulioandaliwa na Kampuni hiyo wenye lengo la kusambaza kazi za wasanii.


Katibu Mtendaji wa Bodi ya Filamu Bibi. Joyce Fissoo akizungumza leo Jijini Dar es Salaam na wasanii mbalimbali (hawapo pichani) waliojitokeza kwenye uzinduzi wa Mfumo wa MaxBurudani  ulioandaliwa na Kampuni ya MaxMalipo wenye lengo la kusambaza kazi za wasanii. 


Katibu Mtendaji wa Baraza la Sanaa la Taifa Bw. Godfrey Muingereza akizungumza leo Jijini Dar es Salaam  na wasanii mbalimbali (hawapo pichani) waliojitokeza kwenye uzinduzi wa Mfumo wa MaxBurudani  ulioandaliwa na Kampuni ya MaxMalipo wenye lengo la kusambaza kazi za wasanii. 


Msanii wa Muziki wa Kizazi kipya Niki wa Pili akizungumza kwa niaba ya wasanii wezake baada ya uzinduzi wa wa Mfumo wa MaxBurudani  ulioandaliwa na Kampuni ya MaxMalipo wenye lengo la kusambaza kazi za wasanii. 

Na Shamimu Nyaki - WHUSM.
SERIKALI imewataka wasanii kutengeneza kazi nzuri zenye ubora zinazozingatia maadili ya Kitanzania ili kuwavutia wawekezaji wengi wanaotaka kudhamini kazi  hizo katika kuziandaa na kuzisambaza. 

Hayo yamesemwa leo Jijini Dar es Salaam na Waziri wa Habari,Utamaduni,Sanaa na Michezo Mhe. Dkt. Harrison Mwakyembe wakati akizindua Mfumo wa MaxBurudani ulioandaliwa  na Kampuni ya MaxMalipo ambapo ameishukuru Kampuni hiyo kwa kuamua kuchukua dhamana ya kusambaza kazi za wasanii ili kuondoa kero ya muda mrefu ya wizi wa kazi za wasanii hao kupitia njia mbalimbali walizokuwa wanatumia wasanii hao ambazo zilikua zikiwalipa kiasi kidogo.

“Nimefurahishwa sana na Mfumo huu namna ambavyo utaweza kutatua changamoto ya wizi wa kazi za wasanii wetu kwa vile umeonyesha wazi namna ambavyo msanii anaweza kunufaika na kazi yake kuanzia idadi ya kazi zake zilizoenda sokoni,asilimia anazopata kwa kazi yake ambayo ni kuanzia 40-50 pamoja na kumuwezesha kutouza Haki Miliki yake kama walivyokuwa wanafanya hapo awali.”Alisema Mhe.Mwakyembe.

Aidha amewataka Wasanii kutengeneza kazi zenye ubora ambazo zitakidhi vigezo vyinavyotakiwa na Kampuni hiyo ambapo pia ameiagiza Kampuni hiyo kutochukua kazi yeyote ambayo itakuwa haina ubora wala kuwa na maadili. 

Kwa upande wake Mkurugenzi wa Kampuni hiyo Mhandisi James Kasati amesema kuwa Mfumo wa MaxBurudani inalengo la kuhakikisha wasanii wananufaika na kazi zao kwa kuwa ndio kundi lililoajiri vijana wengi hapa nchini.

Mhandisi Kasasi ameongeza kuwa Mfumo huu utatumia mawakala wa Max Malipo katika kusambaza kazi hizo ambapo Msanii atatakiwa kupeleka kazi ambayo itakuwa imekidhi vigezo vya kusmbazwa na Kampuni hiyo ndani na nje ya nchi kwa zile nchi ambazo Kampuni hiyo ina matawi. 

“Mfumo huu utatumia teknolojia katika kusambaza kazi za wasanii,kulinda Haki Miliki za Wasanii lakini pia msanii kujua takwimu sahihi za mchanganuo wa kazi yake pamoja na namna ambavyo anaweza kulipa kodi kwa Serikali”.Alisema Mhandisi Kisati.

Naye Katibu Mtendaji wa Bodi ya Filamu Bibi.Joyce Fissoo amesema kuwa Bodi yake inapokea Kampuni au mtu yeyote ambae anataka kusambaza kazi za wasanii endapo tu atakuwa anawalipa Wasanii hao kile wanachostahili kupata kupitia kazi hizo.

Aidha Katibu Mtendaji wa Baraza la Sanaa la Taifa (BASATA) Bw. Godfrey Muingereza mbali na kuipongeza Kampuni hiyo kwa Wazo zuri lakini pia ameishauri kuona ambavyo inaweza kuwasadia wasanii hao kupata  mikopo itakayowasaidia kuandaa na kutengeneza kazi nzuri.


Mfumo huo tayari umeanza kupokea baadhi ya kazi za wasanii tayari kwa kuzisambaza ambazo ni Filamu ya Kampuni ya J For Life, Albamu ya Fiesta  pamoja na Albamu ya Msanii wa Nyimbo za Injili Bw. Godluck Gosbert.

BALOZI SEIF IDDI AONGOZA MAPOKEZI YA MIILI YA WANAJESHI WALINZI WA AMANI WALIOUAWA NCHINI DRC MJINI ZANZIBAR LEO

Miili ya Askari wa Jeshi la Wananchi wa Tanzania (JWTZ), ikiteremshwa kwenye ndege ya JW 8029 katika uwanja wa ndege wa  Kimataifa wa Abeid Aman Karume ikitokea Mjini Dar es Salaam. (Picha zote na Hassan Issa – OMPR – ZNZ)
Balozi Seif pamoja na Mkuu wa Jeshi la Nchi Kavu Meja General Sharif Sheikh Othman wakitoa heshima wakati Miili ya mwashujaa ikiteremshwa kwenye ndege.
Balozi wa Kuweit Nchini Tanzania Bwana Jassem Alnajem (wa kwanza kushoto), akijumuika pamoja na Viongozi wa Kiserikali katika kuipokea Miili ya askari wa Tanzania waliouawa Nchini DRC Wiki iliyopita.  
Mawaziri mbali mbali wa Serikali ya Mapinduzi ya Zanzibar wakishuhudia kuwasili kwa Miili yaWanajeshi wa Tanzania waliouawa na waasi wa ADF Nchini DRC. 
Balozi Seif akiongoza Viongozi na Wananchi wa Zanzibar katika kuipokea miili ya Makeshi ya Tanzania yaliyouawa Nchini  Jamuhuri ya Kisemokrasi ya Congo. 
Majeshi ya Wananchi wa Tanzania wakiichukuwa Miili ya Askari wenzao wakiwasili katika Viwanja vya Makao Makuu ya Brigedia Nyuki Migombani kwa ajili ya kuagwa rasmi Kiserikali. 
Makamu wa Pili wa Rais wa Zanzibar Balozi Seif Ali Iddi akitoa salamu za pole kwenye shughuli Maalum ya Kuiaga Miili ya Wanajeshi wa JWTZ hapo Migombani Mjini Zanzibar. 
Balozi Seif akilaani kitendo cha wasi wa ADF Nchini DRC kuwashambulia walinzi wa amani wa JWTZ  waliouwa katika Vikosi vya Umoja wa Mataifa na hatimae kusababisha vifo vyao. 
Balozi Seif akiongoza baadhi ya Mawaziri na Viongozi wa Kitaifa katika kutoa Heshima za mwisho kwa askari Tisa wa Jeshi la Ulinziwa Tanzania hapo Migombani Mjini Zanzibar.
Balozi Seif akiweka saini kitabu cha maombolezo kufuatia vifo vya askari Tisa wa Jeshi la Wananchi wa Tanzania hapo Migombani Mjini Zanzibar.  
Naibu Mufti  Mkuu wa Zanzibar Sheikh Mahmoud Mussa Wadi akiweka saini Kitabu cha maombolezo kufuatia vifo vya askari Tisa wa Jeshi la Wananchi wa Tanzania hapo Migombani Mjini Zanzibar.
Spika wa Baraza la Wawakilishi Zanzibar Mheshimiwa Zubeir Ali Maulid akiweka saini Kitabu cha maombolezo kufuatia vifo vya askari Tisa wa Jeshi la Wananchi wa Tanzania hapo Migombani Mjini Zanzibar.  
Katibu wa Mufti Mkuu wa Zanzibar Sheikh Fadhil Soraga akitoa Dua kwa ajili ya kuwaombea Mashuja Askari wa Tanzania waliouawa na waasi wa ADF hapo Migombani. 
Makamu wa Pili wa Rais wa Zanzibar Balozi Seif akimfariji Mama wa Askari wa JWTZ  Iddi Abdulla Ali Mama Shinuna Juma hapo Migombani.

Na Othman  Khamis  Ame
Ofisi ya Makamu wa Pili wa Rais wa Zanzibar
13/12/2017.
HUZUNI, Majonzi pamoja na simanzi ilitanda ndani ya nyuso za wananchi wa visiwa vya Zanzibar  wakati ndege iliyochukuwa miili ya askari wa Jeshi la Wananchi wa Tanzania (JWTZ), waliouawa nchini Jamhuri ya Kidemokrasia ya Congo (DRC), ilipotua kwenye Uwanja wa Ndege wa Kimataifa wa Abeid Aman Karume.

Miili ya Wanajeshi hao ililetwa nchini Tanzania juzi kwa ndege Maalum ya Umoja wa Mataifa ikitokea DRC na kupelekwa moja kwa moja Makao Makuu ya Jeshi la Wananchi wa Tanzania yaliyopo Lugalo Jijini Dar es Salaam kwa ajili ya kukamilisha taratibu za kuiaga rasmi Kijeshi.

Ndege iliyowachukuwa Mashujaa hao wa Jeshi la Wananchi wa Tanzania ya JW 8029 iliteremsha Miili ya Askari Nassor Daudi Ali, Issa Mussa Juma, Hassan Abdulla Makame na Hamad Mzee Kamna.

Wengine  kati ya askari hao Tisa ambapo mmoja anapelekwa Kisiwani Pemba ni Ali Haji Ussi, Iddi Abdulla Ali, Juma Mossi Ali, Mwinchum Vuai Mohamed na Hamadi Haji Bakari.

Akitoa salamu za Serikali ya Mapinduzi ya Zanzibar, Makamu wa Pili wa Rais wa Zanzibar Balozi Seif alisema kuuawa kwa Askari wa Jeshi la Wananchi wa Tanzania (JWTZ) katika shambulio lililofanywa na Waasi wa ADF Nchini DRC ni la Kinyama lilikiuka misingi ya Haki za Binaadamu ambalo pia ni kinyume na makubaliano ya Ulinzi wa Amani wa Kimataifa.

Alisema Askari hao hawakutakiwa kupigwa, kupiga wala  kupigana kama walivyokuwa wakiwajibika bila ya kuwa na Silaha kubwa katika Ulinzi wa Amani Nchini Jamuhuri ya Kidemokrasia ya Congo { DRC}chini ya usimamizi wa Umoja wa Mataifa (UN).

Balozi Seif alitoa kauli hiyo wakati wa tukio Maalum la kuipokea na kuiaga Miili ya Askari  hao 9 kati ya 14 wa Jeshi la Wananchi wa Tanzania {JWTZ} wakitokea Nchini DRC kupitia Dar es salaam baada ya kushambuliwa na waasi wa ADF na kuuawa Mwishoni mwa Wiki iliyopita.

Alisema  Serikali ya Mapinduzi ya Zanzibar  imeshtushwa na Taarifa za shambulio dhidi ya askari hao wa Jeshi la Wananchi wa Tanzania lililosababisha Vifo na hatimae kuleta simanzi na huzuni kubwa miongoni mwa Watanzania wote ambalo linastahiki kulaaniwa kwa nguvu zote.

Makamu wa Pili wa Rais wa Zanzibar kwa Niaba ya Rais wa Zanzibar, Wazanzibari na Watanzania wote anatoa mkono wa pole kwa wafiwa wote, ndugu, jamaa na marafiki pamoja na Wananchi wote kutokana na msiba huo mzito kwa Taifa.

Balozi Seif alisema msiba huo ni wa Taifa zima kwa vile umemgusa kila Raia wa Jamuhuri ya Muungano wa Tanzania ambapo jamii kwa wakati huu inapaswa kulichukuwa tukio la vifo vya Mashujaa hao ni amri ya Mwenyezi Muungu, hivyo hawana budi kuupokea mmtihani huo.

Aliwakumbusha Wananchi hasa wale wanaoimani za Dini kurejea katika vitabu vya Dini inavyoelekeza na kufafanua wazi kwamba kila nafsi itaonja mauti na hivyo ndivyo wakati ulivyowakuta Mashujaa hao na tayari wanarejea kwa Muumba wao.

Makamu wa Pili wa Rais wa Zanzibar alieleza kwamba kilichobakia wakati huu ni kwa Wananchi pamoja na Ndugu na Jamaa wa Mashujaa hao kuwasindikiza kwa kuwaombea safari na malazi mema ili Mwenyezi Muungu awape ridhaa katika safari yao ya lazima.

Mapema Mkuu wa Jeshi la Nchi Kavu Meja General Sharif  Sheikh Othman akimuwakilisha Mkuu wa Majeshi ya ulinzi Tanzania  (CDF) Venance Mabeyo alisema ushirikiano wa Watanzania katika kuipokea Miili ya Mashuja hao umeleta faraja kwa Jeshi la Wananchi wa Tanzania (JWTZ).

Meja General Sharif alisema JWTZ ni jeshi la Wanbanchi ambalo jamii inahaki na wajibu wa kushirikiana katika shguhuli za kiulinzi na hata za Kijamii wakati unaporuhusu.

Kamanda Sharif alisema shambulio waliofanyiwa askari wa Jeshi la Tanzania katika ulinzi wa amani Nchini Jamuhuri ya Kidemokrasia ya Congo kamwe haliloteteresha Jeshi la Wananchi wa Tanzani aktika ulinzi huo wa Kimataifa.

Aliishukuru na kuipongeza Serikali ya Mapinduzi Zanzibar kwa jitihada zilizochukuwa katika kuratibu maandalizi ya Miili ya Mashuja hao hadi kuagwa rasmi Kiserikali na baadae kupelekwa kwenye makaazi yao ya kudumu katika Vijiji walivyozaliwa.

MWANASHERIA WA GGM MBARONI KWA KUMNYIMA NYARAKA NAIBU WAZIRI

Mwanasheria Mkuu wa Mgodi wa dhahabu wa Geita(GGM) David Nzarigo akipandishwa kwenye gari ya Polisi Baada ya agizo la  Naibu Waziri Ofisi ya Makamu wa Rais Muungano na Mazingira Mh. Kangi Lugola.

Naibu Waziri Ofisi ya Makamu wa Rais Muungano na Mazingira Mh. zinazofanywa na Mgodi huo.

Mganga Mkuu wa Mgodi ambaye pia anasimamia kitengo cha mazingira Mgodini wa Dhahabu wa Geita (GGM) akitoa taarifa ya namna ambavyo mgodi umekuwa ukihifadhi mazingira.

Mkuu wa Wilaya ya Geita,Mwl Herman Kapufi akitazama baadhi ya nyaraka wakati ambapo Naibu Waziri Ofisi ya Makamu wa Rais Muungano na Mazingira Mh. Kangi Lugola.

Mwanasheria Mkuu wa Mgodi wa dhahabu wa Geita(GGM) David Nzarigo akipelekwa kwenye gari la polisi na askali baada ya agizo la Naibu Waziri Ofisi ya Makamu wa Rais Muungano na Mazingira Mh,Kangi Lugola.

Moja kati ya nyumba ambayo hipo ndani ya eneo la Mgodi.

Naibu Waziri Ofisi ya Makamu wa Rais Muungano na Mazingira Mh,Kangi Lugola akikagua madarasa ambayo yanaonekana kuharibiwa na mipasuko.

Na Joel Maduka, Geita
MWANASHERIA Mkuu wa Mgodi wa dhahabu wa Geita(GGM) David Nzarigo amekamatwa na serikali baada ya kukutwa na nyaraka za Serikali.
Mwanasheria huyo amekamatwa kwa  amri ya Naibu Waziri Ofisi ya Makamu wa Rais Muungano na Mazingira Mh,Kangi Lugola alipotembelea Mgodi huo ambapo pamoja na mambo mengine amebaini mgodi huo kuwa unaendesha shughuli zake bila kufuata sheria ya mazingira .

Mhe. Lugola akiwa katika ziara ya kikazi ya siku mbili  Wilayani Geita ameagiza kukamatwa kwa mwanasheria  Mkuu  wa Mgodi wa dhahabu wa  Geita (GGM) David Nzogila baada ya kukutwa na nyaraka za serikali ambazo hazijawa rasmi kutumika kutoka taasisi  ya wakala wa utafiti wa jiolojia Tanzania(GST).

 Hata hivyo katika hali hisiyo ya kawaida na  bila kutarajia mwanasheria huyo aliyekuwa akiukingia kifua mgodi huo  ili usikumbane na rungu la fidia ya uharibifu wa kimazingira kama sheria inavyotamka alijikuta akimweleza Naibu Waziri kuwa anayo ripoti ya GST aliyodai haijaeleza iwapo mgodi huo unahusika moja kwa moja kwenye uharibifu hivyo mgodi huo usibebeshwe mzigo huo.

Kutokana na hali hiyo,Naibu Waziri Lugola aliomba apatiwe riporti hiyo ili ajiridhishe lakini mwanasheria huyo akijibu kwa kujiamnini alimtaka kiongozi huyo wa juu   kutumia mbinu zake kuipata Serikalini lakini yeye  hawezi kutoa nyaraka ya serikali, jambo  lililomkasirisha Naibu Waziri  wa Muungano na Mazingira na kutoa agizo la kukamatwa mara moja.

Diwani wa kata ya mtakuja Constatine Morandi ameelezea kuwa wananchi wamekuwa wakisumbuliwa muda mrefu na mgodi bila ya kupatiwa fidia  na kwamba kutokana na wao kuwa ndani ya bikoni kumesababisha kutokupatiwa huduma mbali mbali za kijamii  hivyo ni vyema kwa serikali wakaweka nguvu kuwasaidia wananchi hao.

Bw Abdallah Omary-Mkazi Nyamalembo alimweleza Naibu waziri  kwamba wamekuwa wakiishi maisha ya mashaka kutokana na hali ilivyo ya maeneo hayo ya mgodini na kwamba mgodi ulikwisha wai kuwapatia fidia ya shilingi elfu ishirini jambo ambalo limeonekana kuwa ni udhalilishaji kwani pesa hiyo ni ndogo.

Kwa upande wake Makamu wa Rais wa mgodi huo Saimon Shayo,alisema kuwa  eneo ambalo wananchi wamekuwa wakilalamika kuhusu suala la fidia hadi sasa kuna nyumba mbili na kwamba fidia ya kwanza walilipa kiasi cha sh,Bilion Moja na waliipatia serikali iweze kuwafidia wananchi.

LAPF YAN'GARA UANDAAJI WA HESABU KWA MIAKA 7 MFULULIZO

Mkurugenzi wa Fedha wa Mfuko wa Pensheni wa LAPF Bw. John Kida akizungumza na waandishi kuhusu mfuko huo kupata tuzo ya uandaaji bora wa hesabu katika sekta ya hifadhi ya Jamii na Bima ya Afya kwa mwaka 2015/2016 ambapo Mfuko huo umeshika nafasi ya kwanza,  Tuzo hiyo imetolewa na  Bodi ya Taifa ya Uhasibu (NBAA) hivi karibuni.Kulia ni Meneja Masoko na Uhusiano wa LAPF Bw. James  Mlowe. (Picha zote na LAPF)
Meneja Matekelezo wa Mfuko wa Pensheni wa LAPF  Bw. Victor Kikoti (wa kwanza) akieleza kwa waandishi wa habari (hawapo pichani ) kuhusu mafao yanayotolewa na mfuko huo na faida wanazopata wananchi kutokana na mafao hayo. 

Na Mwandishi Wetu
MFUKO wa Pensheni wa LAPF umepata tuzo ya uandaaji bora wa hesabu katika sekta ya Hifadhi ya Jamii na Bima kwa mwaka 2015/16 inayotolewa na Bodi ya Taifa ya Uhasibu (NBAA).

Akizungumza  na waandishi wa habari leo Mjini Dodoma kwa niaba ya Mkurugenzi Mkuu wa Mfuko huo Bw. Eliud Sanga,  Mkurugenzi wa fedha wa Mfuko huo Bw. John Kida amesema kuwa mfuko huo umepata tuzo hiyo kwa miaka saba mfululizo ikiwa ni ishara ya utendaji mzuri na wenye kuchochea ukuaji wa Mfuko  na maendeleo ya Taifa kwa ujumla kutokana na uwekezaji unaofanywa katika sekta mbalimbali.

“Kwa mwaka 2015/2016 mapato yanayotokana na uwekezaji katika vitega uchumi yalifikia shilingi bilioni 96.03 ikilinganishwa na shilingi bilioni 72.72 kwa mwaka 2014/2015  ambayo ni sawa na ongezeko la asilimia 32.” Alisisitiza Kida.

Akifafanua Kida amesema kuwa mafanikio ya mfuko huo yanatokana na kuongezeka kwa wanachama ambao hadi Septemba 2017 walikuwa wamefikia 180,401.

Aliongeza kuwa Mfuko huo katika kipindi cha mwaka 2015/2016 umelipa mafao kwa wanachama 8,011 ambapo jumla ya shilingi bilioni 107.24 zililipwa kama mafao kwa wanachama.

Akieleza mafanikio mengine Kida amesema kuwa michango ya wanachama imeongezeka ambapo kwa mwaka 2015/2016 imefikia shilingi bilioni 279.68 ikilinganishwa na shilingi bilioni 210.07 sawa na ongezeko la asilimia 33 hali iliyosababishwa na kuoongezeka kwa wanachama kutoka 150,835 hadi kufikia wanachama 166,260 mwezi June 2016.

Kwa upande wake Meneja Masoko na Uhusiano wa Mfuko huo Bw. James Mlowe amesema mafanikio ya mfuko huo yanatokana na utendaji makini unaozingatia utawala Bora katika kusimamia rasilimali za Mfuko huo ikiwemo fedha.

Mfuko wa Pensheni wa LAPF umewekeza katika vitega uchumi mbalimbali ambapo hadi kufikia June 2016 ulikuwa umewekeza jumla ya shilingi trilioni 1.09, wakati kwa kipindi cha mwezi June 2015 mfuko huo uliwekeza bilioni 884.26 katika vitega uchumi mbalimbali kama dhamana za Serikali, Amana za mabenki, majengo, hisa za makampuni  na uwekezaji katika Kampuni tanzu.

RAIS WA MSUMBIJI FILIPE NYUSI AWASILI MKOANI DODOMA NA KUPOKEWA NA MWENYEJI WAKE RAIS DKT. JOHN POMBE MAGUFULI

Rais wa Jamhuri ya Muungano wa Tanzania Dkt. John Pombe Magufuli akimpokea Rais wa Msumbiji Filipe Nyusi mara baada ya kuwasili katika uwanja wa ndege wa Mjini Dodoma. 
Rais wa Jamhuri ya Muungano wa Tanzania Dkt. John Pombe Magufuli akimpokea Rais wa Msumbiji Filipe Nyusi mara baada ya kuwasili katika uwanja wa ndege wa Mjini Dodoma.
Rais wa Jamhuri ya Muungano wa Tanzania Dkt. John Pombe Magufuli akiwa na mgeni wake Rais wa Msumbiji Filipe Nyusi wakipita kwenye gadi ya Heshima iliyoandaliwa na Jeshi la Wananchi mara baada ya Rais huyo wa Msumbiji kuwasili katika uwanja wa ndege wa Dodoma.
Rais wa Jamhuri ya Muungano wa Tanzania Dkt. John Pombe Magufuli akiwa na mgeni wake Rais wa Msumbiji Filipe Nyusi wakipita kwenye gadi ya Heshima iliyoandaliwa na Jeshi la Wananchi mara baada ya Rais huyo wa Msumbiji kuwasili katika uwanja wa ndege wa Dodoma. 
Rais wa Jamhuri ya Muungano wa Tanzania Dkt. John Pombe Magufuli akiwa na mgeni wake Rais wa Msumbiji Filipe Nyusi wakati wakiangalia vikundi vya ngoma za utamaduni mara baada ya Rais huyo wa Msumbiji kuwasili katika uwanja wa ndege wa Mjini Dodoma.  
Rais wa Jamhuri ya Muungano wa Tanzania Dkt. John Pombe Magufuli akifurahia jambo na mgeni wake Rais wa Msumbiji Filipe Nyusi wakati vikundi vya ngoma vilipokuwa vikitumbuiza katika uwanja wa ndege wa Dodoma. 
Rais wa Jamhuri ya Muungano wa Tanzania Dkt. John Pombe Magufuli akiwa na mgeni wake Rais wa Msumbiji Filipe Nyusi katika Ikulu ya Dodoma kabla ya kuanza mazungumzo yao. (Picha zote na IKULU)

TAASISI YA TANZANIA MORTAGE REFINANCE COMPANY (TMRC) YACHANGIA SH. MILIONI 8 KWA AJILI YA MATIBABU MOYO KWA WATOTO 4 WANAOTIBIWA TAASISI YA MOYO YA JAKAYA KIKWETE (JKCI)

Mkurugenzi wa TMRC  Oscar Mgaya

Na Mwandishi wetu 
14/12/2017 
TAASISI isiyo ya Kiserikali inayojihusisha na masuala ya kifedha ya Tanzania Mortage Refinance Company (TMRC) imekabidhi msaada wa shilingi  milioni nane kwa Taasisi ya Moyo Jakaya Kikwete (JKCI) kwa ajili ya kuwezesha matibabu ya moyo kwa watoto wanne.

Watoto hao watafanyiwa upasuaji wa moyo wa kuziba matundu na wengine kutibiwa  mishipa ya damu ambayo haipitishi damu vizuri katika moyo.
Akizungumza na waandishi wa habari leo Mkurugenzi wa TMRC  Oscar Mgaya alisema wameguswa kuchangia fedha hizo ili kuokoa maisha ya watoto hao wenye matatzo ya moyo ambao ni Taifa la kesho.
“Tumetoa shilingi millioni nane kwa ajili ya upasuaji wa kutibu magonjwa ya moyo kwa watoto wanne, tumeguswa kutoa fedha hizi ikizingatiwa watoto wengi ni wadogo hawajafikisha hata miaka mitano na watalaam wanaeleza ikiwa hawatapatiwa matibabu hasa ya upasuaji kwa wakati muafaka wataweza kupoteza maisha”,.
“Moyo ni kiungo cha muhimu sana katika mwili wa binadamu,  unaweza kukosa mguu au mkono ukaishi lakini siyo moyo, binadamu akikosa moyo hawezi kuishi”, alisema.
Kwa upande wake  Mkurugenzi Mtendaji  wa JKCI Prof. Mohamed Janabi aliishukuru Taasisi ya TMRC kwa kutoa fedha hizo ambazo zitaokoa maisha ya watoto wanne wanaosumbuliwa na matatizo ya moyo.
Prof. Janabi alitoa rai kwa Taasisi zingine kuiga mfano na kuendelea kujitokeza kufadhili matibabu ya watoto ambao bado wanasubiri kufanyiwa upasuaji wa moyo.