Kenya yawakamata wavuvi 109 wa Tanzania

Image captionWavuvi hao walikamatwa katika eneo la Shimoni , linalomiliki bandari kusini mashariki mwa Kenya karibu na mpaka na taifa la Tanzania

Jeshi la wanamaji wa Kenya liliwakamata raia 109 wa Tanzania kwa kushiriki katika uvuvi haramu katika himaya ya maji ya Kenya katika bahari hindi.

Wavuvi hao walikamatwa katika eneo la Shimoni , linalomiliki bandari kusini mashariki mwa Kenya karibu na mpaka na taifa la Tanzania na kuwasilishwa mbele ya mahakama ya kaunti ya Kwale siku ya Jumatatu.

Wavuvi hao walizuiliwa baada ya kushindwa kulipa dhamana ya shilingi 20,000 za Kenya kila mmoja wao lilisema gazeti la Biashara nchini Kenya Business Daily , likimnukuu naibu wa kamishna wa Lungalunga Josphat Biwott.

Hatahivyo serikali ya Tanzania tayari imeanza harakati za kuhakikisha kuwa raia hao wanaachiliwa huru.

Naibu waziri wa uvuvi na ufugaji nchini Tanzania Abdalla Ulega ameliambia gazeti la The Citizen nchini humo kwamba juhudi zimeanza ili kuona kuwa tatizo hilo limetatuliwa.

''Tayari tumezungumza na wizara ya maswala ya kigeni na jeshi la polisi ili kuona vile tatizo hilo litakavyoangaziwa. Walikamatawa kulingana na sheria za Kenya'', alisema.

''Inapokuja katika uhalali wa vitendo vya uvuvi, kila taifa lina sheria zake ,Serikali inajua hilo'', alinukuliwa na gazeti hilo akisema

• Trump atoa maneno makali kuelekea mkutano wa G7
• Nkurunziza asema ataachia madaraka 2020 Burundi
• Msanii wa Bongo Fleva Tanzania Sam wa Ukweli ameaga dunia

Kenya na Tanzania zimekuwa katika msururu wa mgogoro wa kibiashara ambao umekuwa ukizua uhasama katika ya mataifa hayo jirani.

Mapema mwaka huu mataifa hayo mawili yalianza zoezi la kuweka alama katika mpaka wake kupitia kuondoa vigingi vilivyooza na kuweka vipya.

Mpaka wa Kenya na Tanzania una urefu wa kilomita 769 na hutumiwa na jamii kutoka mataifa pande zote mbili za mpaka kufanya biashara, kilimo na ufugaji hususan miongoni mwa kabila la Wamasai.

Kulingana na Business Daily,Mbunge wa Lunga Lunga nchini Kenya Khatib Mwashetani ameomba kuwachiliwa kwa wavuvi hao akiongezea kuwa baadhi yao wanaishi nchini Kenya.

Katika siku za awali wavuvi wa Kenya wameyashutumu mataifa ya kigeni kwa kushiriki katika uvuvi haramu kwa kutumia vyombo vikubwa katika pwani ya taifa hilo.