Said Ameir, Zanzibar
RAIS
wa Zanzibar na Mwenyekiti wa Baraza la Mapinduzi Dk. Ali Mohamed Shein amewataka
wana CCM kutangaza mafanikio ya utekelezaji wa Ilani yake katika kipindi cha
miaka minne ya uongozi wake huku akiwahakikishia kuwa chama hicho kitashinda kwa
kishindo uchaguzi mkuu ujao.
“Wana
CCM twendeni tukayaseme tuliyoyafanya ...twendeni tukawaeleze wananchi namna
tulivyotekeleza Ilani yetu” Alisema Dk. Shein huku akisisitiza kuwa Ilani ya
chama hicho imetekelezwa kwa mafanikio makubwa katika kipindi hicho na serikali
anayoingoza.
Dk.
Shein amesema hayo leo katika hotuba yake ya uzinduzi wa Kongamano Maalum la kuadhimisha
miaka minne ya Ushindi wa CCM na uongozi wake liliofanyika katika ukumbi wa hoteli
ya Grand Palace mjini hapa.
Katika
kongamano hilo lililojumisha washirikia zaidi ya 180 wakiwemo viongozi wa chama
hicho na jumuiya zake kutoka wilaya 8 za chama hicho katika kisiwa cha Unguja, pamoja
na viongozi wa Makao makuu ya CCM Kisiwandui Zanzibar, Dk. Shein ambaye pia, ni
Makamu Mwenyekiti wa CCM Zanzibar alieleza mafanikio mbalimbali ya Serikali
katika kipindi hicho cha miaka mine.
Baadhi
ya mafaniki hayo ni kuinua kiwango cha ukuaji wa uchumi kutoka asilimia 6.7
mwaka 2007/2008 hadi asilimia 7.5 mwaka 2013/2014, kuongezeka kwa mapato ya
serikali ambapo ukusanyaji wake umeongezeka kutoka wastani wa Tshs bilioni 13.3
kwa mwezi kwa mwaka 2010 alipoingia madarakani hadi wastani wa Tshs bilioni 34 kwa
mwezi mwaka 2013.
Alisema
kutokana na kuongezeka kwa mapato ya serikali, mishahara ya watumishi wa Serikali
imeweza kuongezwa mara mbili ndani ya kipindi cha miaka mitatu kitu ambacho ni
historia kwa Zanzibar. Alieleza pia mafanikio yaliyopatikana katika sekta za elimu,
afya, miundombinu na uwekezaji hususan sekta ya utalii.
Aliongeza
kuwa Chama cha Mapinduzi kiko tayari kutathminiwa na wananchi na kujibu maswali
na hoja zao kwa ufasaha, utulivu na kwa lugha nzuri kwa kuwa kina majibu ya
hoja zao kuhusu utekelezaji wa Ilani yake.
“Hatujafanya
mahesabu ya asilimia ngapi hadi sasa tumetekeleza Ilani yetu lakini hivi karibuni
tutafanya hivyo. Hata hivyo ninawahakikishia
kuwa tuko mbali sana na kwa sababu muda bado tunao tutaendelea kuitekeleza” alisema.
Kwa
hivyo alibainisha kuwa CCM“ inajiamini na inaaminiwa na wananchi kwa hivyo wataendelea
kukichagua”
Makamu
Mwenyekiti huyo wa CCM aliwaeleza washiriki wa kongamano hilo kuwa utekelezaji
wa Ilani ya CCM umefanywa na Serikali nzima anayoingoza ambayo imo katika mfumo
wa Umoja wa Kitaifa.
“Mara
baada ya CCM kushinda na mimi kuapishwa wa Rais niliunda serikali kwa kufuata
misingi ya Serikali ya Umoja wa Kitaifa nikishirikisha wa mawaziri kutoka chama
changu na chama kilichoshika nafasi ya pili” alisema.
Alifafanua
kuwa baada ya kuzindua Baraza la Wawakilishi ambapo alieleza mipango na
programu za utekelezaji wa Ilani ya CCM aliunda Baraza la Mawaziri pamoja na
taasisi nyingine kukidhi mahitaji wa utekelezaji wa Ilani hiyo.
“Tuliunda
Wizara, taasisi pamoja na kupitisha sheria ili tuweze kutekeleza Ilani
yetu na ndio matokeo tunayoyaona leo” alifafanua
na kuongeza kuwa katika kutekeleza majukumu yake amekuwa akitekeleza ipasavyo
misingi ya Serikali ya Umoja wa Kitaifa kwa mujibu wa Katiba.
Dk.
Shein alikiri kuwa awali wako waliokuwa
na wasiwasi kuhusu kufanikiwa kwa serikali hiyo Zanzibar lakini yeye na chama
chake kilikuwa na hakika kitafanikiwa kuongoza na kupata matokeo mazuri kamam
ilivyodhihiri.
Kuhusu
Katiba iliyopendekezwa aliwaeleza washiriki wa Kongamano hilo kuwa Katiba hiyo imejibu
hoja zote ambazo zilikuwa zikiitwa kero za muungano pamoja na malalamiko mengine
likiwemo la madai kuwa Tanganyika imevaa ‘koti la muungano’.
Alieleza
kuwa tangu yeye na Rais Jakaya Kikwete walipokabidhiwa Katiba iliyopendekezwa
kumekuwepo na wasemaji wengi wanaoipinga Katiba hiyo na miongoni mwao wakijenga
dhana kuwa wanaposema wao wengine hawana fursa tena ya kufanya hivyo.
Kwa
hivyo alitahadharisha tabia hiyo inayojengwa na baadhi ya wasemaji hao ambao
wengine ni viongozi kutumia fursa ya Mchakato wa Mabadiliko ya Katiba kukashifu
viongozi wenzao na hata kuwatisha wengine kitendo kinachohatarisha amani na
utulivu nchini.
"Wako
wanaodhani wanalosema wao ndilo la mwisho na wengine hutumia lugha za matusi na
hawa baadhi yao ni viongozi na tulikwisha kukubaliana tuache lugha za matusi
katika majukwa ya siasa,” alikumbusha Dk. Shein na kutahadharisha kuwa ikilazimu
atachukua “hatua kwa mujibu wa Katiba na Sheria zinavyoelekeza”.
Alisisitiza
kuwa Katiba iliyopendekezwa itapigiwa kura na wananchi wote wa Zanzibar na anaamini
kuwa wananchi hao wataikubali kwa kuwa wanafahamu historia ya nchi yao.
“wananchi
wanaelewa walikotoka... wazazi wao walifanya nini; walifanya Mapinduzi na kuunda
Muungano hivyo kamwe hawatakubali yatokee mengine kinyume na hayo” alisema Dk.
Shein na kuwakumbusha wanaopinga Katiba iliyopendekezwa kuwa wasidhani kuwa
watapiga kura peke yao.
Katika
hotuba yake hiyo Rais wa Zanzibar na Mwenyekiti wa Baraza la Mapinduzi alisisitiza
kuwa watu wanaodai Zanzibar ipatiwe mamlaka kamili hawajui wanachokitaka kwa
kuwa Zanzibar inatambulika ulimwenguni kote kuwa ni sehemu ya Jamhuri ya Muungano
wa Tanzania na imekuwa ikipewa heshima yake.
“Nawashangaa
wanaotaka Zanzibar ya mamlaka kamili...Zanzibar inayo mamlaka yake kwa kuwa ina
utambulisho wake, ina mihimili mitatu ya dola na inapewa heshima yake kote
ulimwenguni” Dk. Shein alisisitiza.
Alibainisha
kuwa wananchi wa Zanzibar hawawezi
kuvunja muungano kwa kuwa wanaelewa kuwa kulinda Muungano ndio kulinda Mapinduzi
ya mwaka 1964 na kuwaonya wenye mawazo tofauti kuwa hilo halitotokea kamwe.
Katika
kongamano hilo mada mbili ziliwasilishwa ambapo Mjumbe wa Kamati ya CCM Dk.
Mohamed Sief Khatib alitoa mada inayohusu Maudhui ya Katiba Inayopendekzwa na Mustakbali
wa Zanzibar na Naibu Waziri wa Wizara ya Miundombinu na Mawasiliano Issa Haji Ussi
alitoa mada kuhusu Mafanikio ya Utekelezaji wa Ilani ya CCM ya Uchaguzi Mkuu wa
210-2015
No comments:
Post a Comment