Msiba wa Sajuki ni vilio tu nyumbani kwake

 

Ndugu wa Msanii aliyefariki dunia jana, Juma Kilowoko (Sajuki), aliyejitambulisha kwa jina la Ahmedi Mkotwa, akilia kwa uchungu na kushindwa kuzungumza na waandishi wa habari leo, nyumbani kwa Sajuki, Tabata jijini Dar es Salaam. "Alinichukua nyumbani akaniambia mdogo wangu twende ukatafute maisha na kweli tulipanga mambo mengi lakini....", akashindwa kuendelea kuzungumza. Mazishi ya Msanii huyo yanatarajiwa kufanyika kesho, siku ya Ijumaa kwenye makaburi ya Kisutu jijini. Wakati huo huo, katika kile kinachoonekana kuna mpasuko mkubwa ama mgawanyiko miongoni mwa wasanii wa filamu, kundi kubwa la wasanii hao, ambao kwenye baadhi ya misiba ya wasanii waliokufa mwaka jana walishuhudiwa wakiwa kwenye suti nyeusi, kwenye msiba huu hadi sasa hawajaonekana kabisa. Mitandao kadhaa inayofuatilia kwa karibu msibani hapo imeshuhudia hali hiyo, ambayo haikutarajiwa hasa ikizingatiwa marehemu alikuwa mmoja wa wasanii nyota katika tasnia hiyo nchini. Mtandao huu utakuwa kwa karibu kufuatilia matukio mbalimbali na kuyabainisha kila inapobidi. Bayana itafuatilia kujua kulikani hata yakajiri masuala hayo, yaliyoelezwa na wapembuzi wa mambo kuwa siyo ya kiungwana hata kidogo.

Hapa mdogo wake Sajuki, akiondoka na kukaa kando kabisa akilia kwa uchungu wa kifo cha kaka yake huyo.

Msanii Mkongwe na maarufu, anayejulikana kwa jina la Bimwenda, hapa anaonekana akimlilia kwa uchungu msanii mwenzake, Sajuki huko nyumbani kwake, Tabata leo.



Mama mzazi wa Sajuki, akiwa hajitambui kwa kulia kwa uchungu kutoakana na kifo cha mtoto wake huyo. Hapa anaonekana akitulizwa na wanafamilia, ndugu na jamaa.

Wanafamilia, wakimtuliza mke wa marehemu Sajuki (aliyefunikwa kanga), Wastara ambaye amekua kwenye hali mbaya ya kilio kwa siku nzima ya jana na leo.