Serikali yamiliki kiwanad cha General tyre kwa asilimia 100

Katibu Mkuu Kiongozi Balozi Ombeni Semfue

Na Lorietha Laurence-Maelezo

SERIKALI ya Jamuhuri ya Muungano wa Tanzania imefanikiwa kumiliki kiwanda cha kutengeneze magurudumu ya magari cha General Tyre kwa asilimia 100 baada ya kununua hisa 26 zenye thamani ya dola milioni moja kutoka kwa Kampuni ya  Continental AG.

Akizungumza na waandishi wa habari katika Ofisi ya Msajili wa Hazina  wakati wa makabidhiano ya nyaraka za ununuzi wa hisa hizo, Katibu Mkuu Kiongozi Balozi Ombeni Semfue anasema jitihada za kuhakikisha kuwa serikali inamiliki hisa hizo  zilianza tangu mwaka 2012 kwa kufanya mazungumzo ya awali na mwekezaji.

“Kufuatia hatua hii ya kuweza kumiliki hisa kwa asilimia 100 sasa tutakuwa na fursa ya kuzalisha magurudumu yetu wenyewe na hivyo kuokoa kiasi kikubwa cha fedha kilichokuwa kikitumia kununua magurudumu kutoka nje” alisema Balozi.Semfue.

Aidha anaendelea kufafanua kuwa hatua itakayofuata ni kutamfuata mwekezaji atakayeshirikiana na Shirika la Maendelao la Taifa (NDC) katika kuzalisha magurudumu kwa kutumia teknolojia ya kisasa.

Balozi.Semfue  anampongeza Rais Mhe. Jakaya Kikwete kwa kufanikisha zoezi zima la kuhakikisha serikali inamiliki  hisa za kiwanda cha General Tyre kwa asilimia 100 na hivyo kufufua uchumi wa jiji la Arusha na Taifa kwa ujumla.

Naye Msajili wa Hazina  Lawrence Mafuru anasema mpaka serikali kuweza kumiliki hisa hizo ni hatua kubwa sana kutokana na vikwazo mbalimbali vilivyokuwa vikiwekwa na mwekezaji wa kiwanda hicho kilichoanzishwa mwaka 1969.

“Haikuwa kazi rahisi kumiliki hisa hizi bila ya jitihada kubwa iliyofanywa na serikali  katika kumshawishi mwekezaji baada ya kuona hana kuwa hakuwa tayari kuwekeza na hivyo kurejesha umiliki kwetu” alisema Mafuru.

Kwa upande wa Katibu Mkuu wa Wizara ya Viwanda na Biashara Mhe. Uledi Musa, anaeleza kuwa kiwanda hicho kitatoa fursa za ajira zaidi kitakapoanza kuzalisha tofauti na awali ambapo kiliweza kuajiri  wafanyakazi 360.