Mkuu wa Kitengo cha Mawasiliano ya Serikali wa Wizara ya Elimu na Mafuzo ya Ufundi, Ntambi Bunyazu, akizungumza na waandishi wa habari, Dar es Salaam leo, kuhusu majukumu ya wizara hiyo baada ya ugatuaji wa usimamizi na uendeshaji wa Shule za Sekondari nchini. Kulia ni Mkurugenzi Msaidizi wa Wizara ya Habari, Vijana, Utamaduni na Michezo, anayeshughulikia vitengo vya mawasiliano serikalini, Zamaradi Kawawa.
Baadhi ya waandishi wa habari, wakiwa katika mkutano huo, wakisikiliza maelezo yaliyokuwa yakitolewa na Mkuu wa Kitengo cha Mawasiliano ya Serikali wa Wizara ya Elimu na Mafuzo ya Ufundi, Ntambi Bunyazu, Dar es Salaam leo.
KAMA mnavyofahamu
Ugatuaji (decentralization) wa
usimamizi na uendeshaji wa shule za sekondari kwenda katika ngazi ya
Halmashauri ulifuatia ongezeko kubwa la shule za sekondari na
wanafunzi ambalo lilisababisha mahitaji ya walimu na huduma za uendeshaji wa
shule kuongezeka. Hali hii ilisababisha usimamizi na uendeshaji wa shule za
sekondari kutoka Wizara ya Elimu na Mafunzo ya Ufundi moja kwa
moja kuwa mgumu na hivyo kuchelewesha utoaji wa huduma. Ili kupata ufanisi
zaidi, Mheshimiwa Jakaya Mrisho Kikwete, Rais wa Jamhuri ya Muungano wa
Tanzania, mnamo tarehe 12/02/2008 alitoa tamko la kusogeza huduma za uendeshaji na usimamizi wa shule za
sekondari kwenye ngazi ya Halmashauri.
Ugatuaji wa
uendeshaji wa masuala ya elimu kwenda Mamlaka za Serikali za Mitaa ulianza miaka
ya 1970 ilipogatuliwa elimu ya Msingi. Kufuatia ugatuaji wa usimamizi na uendeshaji
wa shule za sekondari kwenda katika ngazi ya Halmashauri uliofanywa na Serikali
mwaka 2008/2009, majukumu ya Wizara ya Elimu na Mafunzo
ya Ufundi pamoja na ya Ofisi ya Waziri Mkuu, Tawala za Mikoa na Serikali
za Mitaa yamegawanywa kati ya wizara hizo mbili kwa kuzingatia majukumu ya
msingi yanayohusisha elimu ya msingi na sekondari.
Hivyo, kuhusu
masuala ya elimu ya msingi na sekondari Wizara ya Elimu na Mafunzo ya Ufundi ina
majukumu ya kusimamia masuala ya sera, viwango, utafiti, ufuatiliaji na
tathmini.
Aidha, Wizara ya Elimu na Mafunzo ya Ufundi ina majukumu ya
kusimamia utekelezaji na utoaji wa elimu kwa kufanya ufuatiliaji na tathmini,
pamoja na kufanya mapitio, kuandaa na kutoa mapendekezo ya marekebisho ya sera,
mipango, sheria na kanuni za elimu zilizopo kulingana na mabadiliko ya dhima na
dira ya serikali; na kuandaa Mikakati ya utekelezaji wake. Halikadhalika,
Wizara hii ndiye msimamizi Mkuu wa Masuala ya taaluma katika ngazi zote za
elimu na mafunzo.
Pia Wizara ya Elimu na
Mafunzo ya Ufundi inaendelea kusimamia na kuendesha vyuo vya ualimu na shule za
Mazoezi, msingi na sekondari zilizopo katika vyuo vya ualimu vya serikali.
Ofisi ya Waziri
Mkuu, Tawala za Mikoa na Serikali za Mitaa inasimamia uendeshaji wa shule za msingi
na sekondari ambapo Halmashauri za
Wilaya, Miji, Manispaa na Majiji zinawajibika katika kutekeleza jukumu hili.
Aidha, Serikali imeanzisha Idara ya Elimu ya Sekondari katika kila Halmashauri
ambapo mkuu wake wa Idara ni Afisa Elimu wa Sekondari wa Halmashauri mwenye
jukumu la kusimamia uendeshaji wa shule za sekondari.
Hivyo basi, wadau wa elimu
wanatakiwa kuelewa mgawanyo huu wa
majukumu baada ya ugatuaji wa usimamizi na Uendeshaji wa shule za sekondari
ambapo masuala ya uhamisho wa walimu na wanafunzi pia malipo ya stahiki za
walimu na watumishi wengine walioko shuleni yanafanywa na Halmashauri za Wilaya, Miji,
Manispaa na Majiji chini ya usimamizi wa Ofisi ya Waziri Mkuu, Tawala za Mikoa
na Serikali za Mitaa. Masuala yote yanayohusu utendaji wa shule za msingi na
sekondari yanasimamiwa moja kwa moja na Halmashauri ili kuongeza tija na
uwajibikaji.
Imetolewa na:
Ntambi Bunyazu
Mkuu wa
Kitengo cha Mawasiliano ya Serikali
11/07/2013
No comments:
Post a Comment