Rais Dk. Shein awa Mgeni rasmi Maadhimisho Siku ya Sheria Zanzibar

Rais wa Zanzibar na Mwenyekiti wa Baraza la Mapinduzi, Dk. Ali Mohamed Shein (katikati) akifuatana na Jaji Mkuu wa Zanzibar, Omar Othman Makungu (kushoto) na Kaimu Waziri wa Katiba na Sheria ambaye pia ni Waziri wa Biashara, Viwanda na Masoko, Nassor Ahmed Mazrui, wakiwasili katika viwanja vya Victoria Garden, wakati wa maadhimisho ya  Siku ya Sheria Zanzibar, zilizofanyika leo.

Viongozi wakisimama wakati wimbo wa Taifa wa Zanzibar, ukipigwa na brass band ya kikosi cha Polisi katika sherehe za maadhimisho ya Siku ya Sheria Zanzibar, mara baada ya kuwasili Rais wa Zanzibar na Mwenyekiti wa Baraza la Mapinduzi, Dk. Ali Mohamed Shein, ambaye alikuwa mgeni rasmi katika hafla hiyo, iliyofanyika viwanja vya Victoria Garden, Mjini Unguja.

Kikundi cha wasanii kutoka Mafunzo wakiburudisha wakati wa maadhimisho ya Siku ya Sheria Visiwani Zanzibar, ambapo kauli mbiu yake ni "Kutokomeza Unyanyasaji Kijinsia", katika Uwanja wa Bustani ya Victoria Garden leo. (Picha zote na Ramadhan Othman, Ikulu Zanzibar)

Rais wa Zanzibar na Mwenyekiti wa Baraza la

Mapinduzi, Dk. Ali Mohamed Shein (wa tatu kushoto), Jaji Kiongozi wa Serikali ya Jamhuri ya Muungano, Fakih Jundu (kushoto) na Kaimu

Waziri wa Katiba na Sheria, ambaye pia ni Waziri wa Biashara, Viwanda na Masoko, Nassor Ahmed

Mazrui (wa pili kushoto), Mkuu wa Mkoa wa Mjini Magharibi,  Abdalla Mwinyi Khamis (kulia), Spika wa Baraza la Wawakilishi, Pandu Ameir Kificho (wa pili kulia) na Jaji Mkuu wa Zanzibar, Omar Othman Makungu (wa tatu kulia), wakiangalia kikundi cha wasanii cha Black Roots, kilipokua kikitumbuiza katika kilele cha Siku ya Sheria leo. 

Baadhi ya Makadhi wa walioalikwa   katika Maadhimisho ya  Siku ya Sheria, Uwanja wa Bustani ya Victoria Garden, wakifuatilia kwa makini harakati za maadhimisho hayo, zilivyokuwa zikiendelea na kuhudhuriwa na viongozi mbalimbali.

Baadhi ya wanafunzi waliohudhuria katika kilele cha maadhimisho ya Siku ya Sheria Zanzibar, sherehe zilizofanyika leo, Viwanja vya bustani ya Victoria, Mjini Zanzibar, wakifuatilia matukio mbalimbali yaliyokuwa yakitendeka. Mgeni rasmi katika maadhimisho hayo, alikuwa Rais wa Zanzibar na Mwenyekiti wa Baraza la Mapinduzi, Dk. Ali

Mohamed Shein.

Mkurugenzi wa Mashtaka Zanzibar,  Ibrahim

Mzee, alipokuwa akizungumza wakati wa sherehe za maadhimisho ya Siku ya Sheria Zanzibar, zilizofanyika leo, Viwanja vya Victoria Garden, Mjini Zanzibar, ambapo ujumbe wa mwaka huu unasema

"Kutokomeza Unyanyasaji Kijinsia".

Rais wa Zanzibar na Mwenyekiti wa Baraza la

Mapinduzi,  Dk. Ali Mohamed Shein, akionesha jarida la Mahakama baada ya kulizindua, wakati wa sherehe za maadhimisho ya Siku ya Sheria Zanzibar, zilizofanyika leo, Viwanja vya Victoria Garden,

Mjini Zanzibar. Kushoto ni Kaimu  Waziri wa Katiba na Sheria, ambaye pia ni Waziri wa Biashara, Viwanda na Masoko, Nassor Ahmed Mazrui na kulia ni  Jaji Mkuu wa Zanzibar, Omar Othman Makungu.

Viongozi wa Dini mbalimbali na Majaji wa Mkoa,

wakisikiliza kwa makini hotuba ya Rais wa Zanzibar na Mwenyekiti wa Baraza la Mapinduzi, Dk. Ali Mohamed Shein, aliyoitoa leo, katika kilele cha maadhimisho ya Siku ya Sheria Zanzibar, Viwanja vya Victoria Garden, mjini Zanzibar leo.

Rais wa Zanzibar na Mwenyekiti wa Baraza la Mapinduzi, Dk. Ali Mohamed Shein, akizungumza na wananchi pamoja na Wanasheria, wakati wa

sherehe za maadhimisho ya Siku ya Sheria Zanzibar, zilizofanyika leo, Viwanja vya Victoria Garden, Mjini

Zanzibar. Kushoto ni  Kaimu  Waziri wa Katiba na Sheria, ambaye pia ni Waziri wa Biashara, Viwanda na Masoko, Nassor Ahmed Mazrui na kulia ni Jaji Mkuu wa Zanzibar, Omar Othman Makungu. 

Na Rajab Mkasaba, Ikulu Zanzibar.

7.2.2013

RAIS wa  Zanzibar na Mwenyekiti wa Baraza la Mapinduzi Dk. Ali Mohamed Shein ametoa wito kwa wananchi kuendelea kuviripoti vitendo vya unyanyasaji wa kijinsia katika vyombo vinavyohusika ili sheria iweze kuchukua mkondo wake.

Hayo ameyasema leo, Rais Dk. Shein, wakati akihutubia katika maadhimisho ya Siku ya Sheria Zanzibar, huko katika viwanja vya Victoria Garden, mjini Zanzibar.

Katika maelezo yake, Dk. Shein alisema kuwa kuna vitendo ambavyo vimekuwa vikitokea kila siku katika jamii lakini kwa bahati mbaya kutokana na suala la utamaduni na mila ziliopo haviripotiwi kwenye vyombo vinavyohusika kwa ajili ya kuchukuliwa hatua.

Alisema kuwa kuna vitendo vya unyanyasaji wa majumbani vinavyotokea kwa watu wa mila, rangi, dini na  makabila yote na kusisitiza lazima kuwepo na ujasiri wa kuviripoti vitendo vya aina hiyo ili sheria iweze kuchukuliwa.

Dk. Shein alieleza kuwa vipo vitendo wanavyofanyiwa baadhi ya akina mama vikiwemo vipigo vya kuidhuru miili yao na pia, kutelekezwa pamoja na watoto wao, vitendo ambavyo hufanywa na waume wasiojali thamani na haki za akina mama ingawa ni kinyume na mafundisho ya dini zote.

Aidha, Dk. Shein alisem akuwa inasikitisha kusikia kuwa baadhi ya matukio yanayoripotiwa yanawajumuisha wafanyakazi wa ndani na watoto wa kambo ambao wananyanyaswa na kupigwa, kufanywa vitendo viovu, kunyimwa mishahara na udhalilishaji wa aina nyengine.

Alisisitiza kuwa hayo si mambo mazuri na hayatakiwi yaendelee kutokea katika jamii hii ya Kizanzibari ambayo watu wake ni waumini wa dini iliyonyooka.

Alieleza kuwa tafiti zilizofanywa na taasisi mbali mbali za Kimataifa zimethibitisha kuwa tatizo la unyanyasaji kijinsia n I tatizo lililoenea duniani kote ambapo waathirika wakubwa wa vitendo vya unyanyasaji ni wanawake na watoto.

Hivyo, Zanzibar ikiwa ni  sehemu ya dunia  nayo inakabiliwa na tatizo hilo.

Dk. Shein alisema aliwataka wananchi kuwa na imani na taasisi zao na kuweza  kujitokeza bila ya woga katika kutoa maelezo yatakayosaidia kupatikana kwa ithibati itakayosaidia kupata ukweli.

Alisema kuwa umefika wakati kwa vyombo vya sheria ikiwemo Mahakama, waendeshaji mashtaka, polisi na wananchi kwa ujumla kuwa pamoja na kujenga ushirikiano ulio imara zaidi kwa lengo la kuutokomeza unyanyasaji wa kijinsia.

Dk. Shein alieleza imani yake kubwa kuwa iwapo kutakuwa na dhamira ya kweli, jambo hilo litawezekana na kusisitiza kuwa ili mafanikio yaweze kupatikana ipo haja ya kuangalia sababu zilizopelekea  kuwepo kwa tatizo hilo.

“Wito wangu ni kuwa tubadilike, tuache muhali na tufuate sheria”,alisisitiza Dk. Shein.

Aidha, Dk. Shein alikiri kuwa kauli mbiu ya mwaka huu “Kutokomeza unyanyasaji wa Kijinsia”, kuwa nayio ni muhimu sana na ni kauli mbiu nzito ambayo tokea alipokabidhiwa madaraka amekuwa akieleza dhamira na jitihada za Serikali anayoiongoza katika kupambana na kulitokomeza suala la unyanyasaji wa kijinsia.

Nae Jaji Mkuu wa Zanzibar, Mhe. Omar Othman Makungu alieleza juhudi zinazochukuliwa na Mahakama katika kuhakikisha haki inatendeka tena bila ya ubaguzi.  

Mapema Rais wa Chama cha Wanasheria Zanzibar  Awadh Ali Said alisema kuwa  dhana ya unyanyasaji wa kijinsia ni dhana iliyo pana ikiwa inajumuisha matendo yote yanayolenga kumdhalilisha na kumdumisha mtu na utu wake na kusisitiza kuwa juhudi za kutokomeza zichukuliwe kutuatana na upana wake.

Alisema kuwa athari za matendo ya unyanyasaji wa kijinsia haziishii kwa matokeo yaliyo dhahiri ya kimwili na kiheshima tu bali pia, huambatana na athari za muda mrefu za kisaikolojia ambazo huwa ni jinamizi linalomuandama muathirika na hata familia yake.

Alisisitiza kuwa unyanyasaji wa kijinsia si uovu mpya katika jamii bali ni vitendo ambavyo ni vikongwe kama ilivyo jamii yenyewe.

Rais huyo wa Chama Cha Wanasheria Zanzibar alieleza kuwa mwaka 2010 kesi za unyanyasaji wa kijinsia 50 zilifunguliwa Mahkamani na kati ya hizo 32 zimetolewa maamuzi ambapo katika hizo ni kesi 2 tu ndizo washtakiwa wametiwa hatiani.

Sambamba na hayo, aliendelea kueleza mifano hiyo ambapo kwa mwaka 2011 kesi 77 zilifunguliwa. Kesi 34 zimetolewa uamuzi na katika hizo ni kesi moja tu ambayo mshtakiwa ametiwa hatiani.