Sheikh Ponda, wafuasi wake wafikishwa Mahakamani

Katibu wa Jumuiya ya Shura ya Maimamu Tanzania, Sheikh Ponda Issa Ponda (mwenye kanzu), akiwa chini ya ulinzi mkali wa Askari Polisi, wakati akitoka katika Mahakama ya Hakimu Mkazi Kisutu, jijini Dar es Salaam  leo, baada ya kusomewa mashtaka ya wizi, uvunjifu wa amani na uchochezi.

Katibu wa Jumuiya ya Shura ya Maimamu Tanzania, Sheikh Ponda Issa Ponda, akishuka katika gari lililomleta katika Mahakama ya Kisutu, Dar es Salaam leo.

 

Katibu wa Jumuiya ya Shura ya Maimamu Tanzania, Sheikh Ponda Issa Ponda (mwenye kanzu nyeupe mbele), akiwa katiika Mahakama ya Hakimu Mkazi Kisutu, alikofikishwa pamoja na wafuasi wanaomuunga mkono, kama wanavyoonekana pichani kwa ajili ya kusomewa mashtaka yanayomkabili ya Uchochezi, wizi na Uvunjifu wa Aman, Dar es Salaam jana. (Picha zote na Habari Mseto)
 

Katibu wa Jumuiya ya Shura ya Maimamu Tanzania, Sheikh Ponda Issa Ponda (mwenye kanzu nyeupe mbele), akiwa katika Mahakama ya Hakimu Mkazi Kisutu kwa ajili ya kusomewa mashtaka yanayomkabili, Dar es Salaam leo.
 

Hali ya ulinzi ilikuwa kama inavyoonekana, ambapo askari wa Kikosi cha Kuzuia Ghasia (FFU), walikuwa wakilinda amani katika Mahakama ya Hakimu Mkazi Kisutu.
 

Askari wa Kikosi cha Kuzuiya Ghasia, wakiwa kwenye gari lao, wakiwa tayari kwa lolote kwa ajili ya kulinda usalama kwenye Mahakama ya Kisutu, Dar es Salaam leo, wakati  Katibu wa Jumuiya ya Shura ya Maimamu Tanzania, Sheikh Ponda Issa Ponda, alipofikishwa Mahakamani  pamoja na wafuasi wake kusomewa mashtaka ya uporaji, wizi na Uvunjifu wa Amani.

Baadhi ya wananchi waliojitokeza katika Mahakama ya Hakimu Mkazi Kisutu, wakitawanyika baada ya Sheikh Ponda na wafuasi wake kurejeshwa mahabusu.



Sheikh Ponda akipanda gari kurejeshwa mahabusu.

DAR ES SALAAM, Tanzania

KATIBU wa Jumuiya ya Shura ya Maimamu Tanzania, Sheikh Ponda Issa Ponda  na wafuasi wake 49 leo, wamefikishwa katika Mahakama ya Hakimu Mkazi Kisutu jijiji hapa

kwa kosa la uchochezi na wizi wa mali zenye thamani ya Shilingi milioni 59.

Sheikh Ponda wanaoshitakiwa pia uvamizi wa kiwanja namba 311/2/4 kilichoko Block T Chang’ombe ambacho ni mali ya Kampuni ya Agritanza, wanatetewa na wakili wa kujitegemea Nassor Mansoor.

Wakati wakifikishwa na baadaye kuondoka kwenye viwanja vya mahakama hiyo wakiwa ndani ya magari ya Polisi na Jeshi la Magereza, walikuwa wakisikika wakipaza sauti wakisema; ‘Allah Akbar, Allah Akbar’.

Sheikh Ponda pia amefikishwa mahakamani hapo akidaiwa kuwashawishi Waislamu kugomea zoezi la sensa ya watu na makazi, iliyofanyika mwezi uliopita nchini kote na kufanya zoezi hilo kufanyika kwa kusuasua.

Hali ya usalama kwenye mahakama ya Kisutu na maeneo ya jirani iliimarishwa mchana wa leo, wakati Sheikh Ponda aliyekamatwa jana na Jeshi la Polisi na kufikishwa Makao Makuu ya Jeshi hilo katikati ya jiji – akifikishwa hapo na Waislamu wengine walioshiriki uvamizi wa kiwanja Chang’ombe.

Baada ya kukamatwa juzi usiku na kufikishwa Kituo Kiuu cha Polisi cha Kati jijini Dar es Salaam jana, baadhi ya Waislamu wanaomuunga mkono walivamia kituoni hapo kushinikiza kuachiwa kwa kiongozi wao, kabla ya polisi kutumia mabomu ya machozi kuwatawanya.

Hali ya amani imekuwa tata nchini katika siku za karibu, tangu Ijumaa iliyopita, ambapo kundi la watu wanaosadikika kuwa ni Waislamu walivamia kituo cha polisi huko Mbagala Zakhiem wakishinikiza wakabidhiwe kijana aliyedaiwa kukojolea Msahafu.

Baada ya kushindwa kufanikisha azma hiyo, hasira zao zikaishia katika uvamizi wa makanisa, ambayo kadhaa yalichomwa moto, kuharibiwa na kuibiwa kwa vitu mbalimbali na polisi kuwakamata watu zaidi ya 120 kabla ya kuchujwa na kubaki 36 waliofikishwa mahakamani.

Hali haikuwa shwari pia Visiwani Zanzibar, ambako kikundi maarufu cha Uamsho kimefanya vurugu jana, wakimskaka kiongozi wao mkuu Sheikh Farid, aliyedaiwa kutekwa na watu wasiojulikana juzi usiku.

Kesi ya Sheikh Ponda ambaye alinyimwa dhamana na wenzake itatajwa tena Novemba Mosi mwaka huu, ambapo watarudi mahakamani hapo.