Antonio Conte asema Chelsea kuchapwa 3-0 na Barcelona UEFA haikuwa haki

Haki miliki ya pichaGETTY IMAGES

Image captionLionel Messi alifunga bao lake la 100 katika Ligi ya Klabu Bingwa Ulaya na kusaidia kuwalaza Chelsea 3-0 uwanjani Nou Camp

Meneja wa Chelsea Antonio Conte amesema alihisi kwamba kichapo cha 3-0 ambacho klabu yake ilipokezwa katika Ligi ya Klabu Bingwa Ulaya Jumatano "hakikuwa cha haki".

Lionel Messi alifunga mabao mawili naye Ousmane Dembele akafunga moja - bao lake la kwanza akichezea Barca - na kuwasaidia miamba hao wa Uhispania kuondoka na ushindi wa jumla wa 4-1.

Mechi ya kwanza uwanjani Stamford Bridge ilikuwa imemalizika 1-1.

Matokeo hayo yaliwaondoa Chelsea kutoka kwa Ligi ya Klabu Bingwa Ulaya msimu huu na msimu ujao wanakabiliwa na kibarua cha kufuzu kutokana na ushindani mkali kwenye nafasi nne za kwanza Ligi ya Premia.

"Hatuna majuto," alisema Conte.

"Ukiitazama mechi hiyo, utaona kwamba matokeo hayo hayakuwa ya haki."

• Conte: Kuna Antonio wawili
• Conte: Sitasahau mzozo wangu na Mourinho

Conte alikiri kwamba Messi - aliyefunga pia bao la Barca mechi ya kwanza Stamford Bridge - ndiye aliyekuwa mwamuzi wa nani mbabe kati ya timu hizo mbili.

Bao la pili la mshambuliaji huyo wa Argentina uwanjani Nou Camp lilifikisha 100, idadi ya mabao ambayo ameyafunga Ligi ya Klabu Bingwa Ulaya.

Haki miliki ya pichaEPA

Image captionLionel Messi akipongezwa na meneja wa Chelsea Antonio Conte baada ya mechi Jumatano

Mpinzani wake mkuu kutoka Real Madrid Cristiano Ronaldo anashikilia rekodi akiwa na mabao 117.

Hata hivyo, Messi amefikisha idadi hiyo akiwa amecheza mechi 14 chini ya alizocheza Ronaldo ndipo afikishe mabao hayo.

"Tunazungumzia mchezaji bora zaidi duniani," alisema Conte.

"Huwa anafunga mabao 60 kila msimu - ni mchezaji mzuri ajabu. Barcelona walikuwa na ufasaha sana wakishambulia."

Klabu nane zilizofuzu..
Klabu zilizofika robofainali Ligi ya Klabu Bingwa Ulaya msimu huu ni: Barcelona, Bayern Munich, Juventus, Liverpool, Manchester City, Real Madrid, Roma na Sevilla.
Droo itafanyika Nyon, Uswizi saa 11:00 GMT Ijumaa

Chelsea waliongoza kwa dakika 13 mechi ya kwanza na waligonga mwamba na mlingoti wa lango mara nne katika mechi zote mbili.

N'Golo Kante na Marcos Alonso wote walikaribia kufunga uwanjani Nou Camp, naye Antonio Rudiger alipiga mpira wa kichwa ambao uligonga mwamba wa goli dakika za mwisho.

Blues walinyimwa ombi lao la kutaka penalti Alonso alipoanguka eneo la hatari baada ya kukabiliwa na Gerard Pique.

"Hatukustahili kushindwa 3-0," alisema Conte.

"Tulikosa bahati kiasi.

"Tafikiri tulitengeneza naafsi nyingi lakini hatukuzitumia.

"NI lazima nijivunie sana wachezaji wangu - walijitolea kabisa na ni lazima tuendelee hivi, nia hii ya kupambana na kupigana vita pamoja uwanjani."

Haki miliki ya pichaGETTY IMAGES

Image captionWachezaji wa Chelsea waliotamauka wakiondoka uwanjani baada ya kushindwa Nou Camp

Courtois hatarajia kombora la Messi

Mlindalango wa Chelsea Thibaut Courtois aliambia BT Sport kwamba anaamini makosa ya wachezaji binafsi yaliigharimu timu hiyo.

"Sifikiri kwamba tulifaa kuondolewa, lakini makosa ya wachezaji binafsi yalitugharimu ushindi mechi zote mbili.

• Mourinho: Man Utd kuondolewa UEFA si jambo geni
• Tetesi za soka Ulaya Jumatano 14.03.2018
• Wenger: Matatizo hayadumu milele

"Bao la kwanza ... Sikutarajia Lionel Messi angetoa kombora kutokana na pahali ambapo alikuwa na nilichelewa kufunga mwanya kati ya miguu yangu. Hilo lilikuwa kosa langu.

"Pahali dhaifu zaidi huwa ni katikati ya miguu ya golikipa. Inaudhi. Siwezi kujificha ndani (ya lango), ni lazima niwe kama mwanamume na kutokea."

Haki miliki ya pichaREUTERS

Image captionAntonio Conte atakutana na Leicester Jumapili kupigania nafasi ya kufuzu kwa nusufainali katika Kombe la FA

Winga wa Chelsea Marcos Alonso aliambia BT Sport kwamba walifahamu kwamba Barca wana wachezaji wazuri sana.

"Na hatuwezi kuwapa nafasi, hata mita moja, kwa sababu wanaweza kuunda nafasi na kufunga."

Amesema sasa ni lazima warudi kujiboresha zaidi, kufanya mazoezi na "kujiboresha".

Haki miliki ya pichaGETTY IMAGES

Image captionLionel Messi akisherehekea baada ya kuwafunga Chelsea

Wafungaji mabao bora Ligi ya Klabu Bingwa Ulaya
Wachezaji	Mechi	Mabao
Cristiano Ronaldo	148	117
Lionel Messi	123	100
Raul	142	71
Ruud van Nistlerooy	73	56
Karim Benzema	100	53
Thierry Henry	112	50
Zlatan Ibrahimovic	120	48
Andriy Shevchenko	100	48
Filippo Inzaghi	81	46
Robert Lewandowski	68	45