Waziri wa Uchukuzi awasimamisha kazi Mkurugenzi wa Mamlaka ya Bandari

Waziri wa Uchukuzi, Dk. Harrison Mwakyembe, akizungumza na waandishi wa habari.

 

DAR ES SALAAM, Tanzania
WAZIRI wa Uchukuzi, Dk Harrison Mwakyembe amemsimamisha kazi Mkurugenzi Mkuu wa Mamlaka ya Bandari Tanzania (TPA), Ephraim Mgawe  na viongozi wengine watatu kupisha uchunguzi wa tuhuma mbalimbali bandarini hapo.

Wengine waliosimamishwa kazi ni Wasaidizi wake wawili pamoja na Meneja wa Bandari ya Dar es Salaam.

Waziri Mwakyembe alitoa kauli hiyo leo jijini Dar es Salaam alipozungumza na waandishi wa habari baada ya juzi kuwa na kikao cha dharura na viongozi wa mamlaka hiyo.

Alisema kutokana na upungufu waliobaini wameona ni vema viongozi hao wakakaa pembeni na kwamba ameunda kamati ya watu saba watakaochunguza masuala hayo.

Hatua hiyo kusimamishwa kazi kwa viongozi hao ni mwendelezo wa mikakati ya waziri huyo kusafisha uozo katika taasisi mbalimbali kwani hivi karibuni kumsimamisha kazi Kaimu Mkurugenzi wa Shirika la Ndege Tanzania (ATCL), Paul Chizi na wakurugenzi wanne kutokana na ukiukwaji wa sheria, kanuni na taratibu za utumishi wa umma, ambao umetishia uhai wa shirika hilo.

Akizungumza jana, Mwakyembe alisema nafasi ya Kaimu Mkurugenzi Mkuu wa TPA inashikiliwa na Mhandisi Madeni Kipande kutoka Wizara ya Ujenzi na kwa nafasi nyingine akasema  wawekwe watu wenye uadilifu.

“Nimeamua kumchukua mtu nje ya bandari kukaini nafasi ya Mkurugenzi Mkuu ili kuondoa wasiwasi, maana angetoka ndani angeshindwa hata kuingia ofisi.

“Najua uamuzi huu utahojiwa, lakini tuendelee kuzumiliana, kwani ukweli haupingwi,” alieleza.

Pamoja na hatua hiyo, alisema ameunda kamati ya watu saba kuchunguza tuhuma  mbalimbali bandarini hapo.

“Wajumbe wa kamati hiyo sitawataja majina, kwa sababu tuna deal na watu wenye hela…hadidu rejea itakiwa na maswali 50,” alisema.

Mbali na kuwasimamisha kazi watumishi  hao, pia alisema ameiagiza bodi ya mamlaka hiyo kuwasimaisha kazi watumishi wa kituo cha kupokea mafuta cha Kurasini (KOJ) ambao ni Meneja, Meneja wa Jet na Injinia wa mafuta wa kituo hicho.

Aidha, aliitaka kampuni ya Singirimo iliyokuwa inaendelea na zabuni ya kuchukua mafuta machafu, iache kufanya kazi hiyo  mara moja, kwani inachunguzwa na Taasisi ya Kuzuia na Kupambana na Rushwa (Takukuru) na Mamlaka ya Udhibiti wa Huduma za Nishati na Maji (Ewura).

“Kwanza muda wa kampuni hii kufanya kazi hiyo umekwisha, hivyo kampuni nyingine iliyoshinda zabuni imepewe nafasi ifanye kazi hiyo. Singirimo ikae pembeni kupisha uchunguzi.

Akizungumzia wizi wa mafuta, alisema suala hilo limekuwa vita kubwa na kwamba kampuni inayochukua mafuta hayo hudai ni machafu, lakini mwisho wa siku wanayepeleka vituo vya mafuta.

“Pale hayatoki mafuta machafu, yanapakwa rangi yaonekane machafu…. Zabuni ya mafuta hayo inagombewa mno. Tumefuatilia tumegundua kuwa magari yanayochukua mafuta hayo huishia Petrol Station,” alisema.

Pamoja na hilo, alisema malori yanayochukua mafuta hayo hayafahamiki kiwango kichochukua na kuongeza kuwa loro moja lililodai kubeba lita 9,000 za mafuta, lilipopimwa na Kamishna wa Vipimo lilibainika kubeba lita 26,000.

Kuhusu kukosekana na flow mitres ambazo zinapima kiwango cha mafuta, Mwakyembe alisema ameuagiza uongozi wa mamlaka hiyo kuhakikisha ndani ya mwezi mmoja zinapatikana.

“Nimeaagiza watumie single sorce katika kuangiza flow mitres, lakini pia wazingatie sheria ya manunuzi inasemaje,” alisema.

Pamoja na hayo, ameagiza mamlaka hiyo kuacha malipo ya fedha taslimu dirishani kuanzia Septemba mosi mwaka huu na kwamba watumie benki ama njia njingine za kisasa.