Vijana waaswa kujitambua ili kuondokana na umaskini

 Katibu Mkuu wa Wizara ya Habari, Vijana, Utamaduni na Michezo Bibi. Sihaba Nkinga akifafanua jambo wakati wa Kikao kazi cha Maafisa Vijana (hawapo pichani) kilichofanyika leo mjini Tabora,kushoto ni Kaimu Mkurugenzi wa Maendeleo ya Vijana nchini Bw. James Kajugusi.

 Kaimu Mkurugenzi wa Maendeleo ya Vijana nchuni Bw. James Kajugusi akitoa mada kuhusu majukumu ya Maafisa Vijana wakati kikao kazi cha Maafisa Vijana (hawapo pichani) kilichofanyika leo mjini Tabora

 Mkurugenzi wa Ubunifu wa Kampuni ya GODTEC Bw. Aloyce Midelo akielezea namna Kampuni yao inavyosaidia vijana katika kujiari kwa kuanzisha makampuni yao wenyewe. ni Katibu Mkuu wa Wizara ya Habari, Vijana, Utamaduni na Michezo Bibi. Sihaba Nkinga (katikati) na Kaimu Mkurugenzi wa Maendeleo ya Vijana Bw. James Kajugusi

 Mkuu wa Kitengo cha Mawasiliano na Elimu kwa Umma wa Shirika la Nyumba la Taifa (NHC)  akifafanua namna NHC ilivyo saidia vijana kupitia mradi wa ufyatuaji wa matofali na ujenzi wa nyumba za gharama nafuu.Kutoka kushoto ni Katibu Mkuu wa Wizara ya Habari, Vijana, Utamaduni na Michezo Bibi. Sihaba Nkinga na Kaimu Mkurugenzi wa Maendeleo ya Vijana Bw. James Kajugusi

 : Meneja Miradi wa DSW Tanzania Bw. Avit Buchwa akielezea namna Shirika lao linavyosaidia vijana katika Nyanja ya Afya ya Uzazi. Katikati ni Katibu Mkuu wa Wizara ya Habari, Vijana, Utamaduni na Michezo Bibi. Sihaba Nkinga na Kaimu Mkurugenzi wa Maendeleo ya Vijana Bw. James Kajugusi

 Baadhi ya Maafisa Vijana wakifuatilia mada mbalimbali kutoka kwa wawezeshaji (hawapo pichani)

Picha na Frank Shija, WHVUM

Baadhi ya Maafisa Vijana wakifuatilia mada mbalimbali kutoka kwa wawezeshaji (hawapo pichani) leo. (Picha zote na Frank Shija, WHVUM)

Na Jonas Kamaleki

Katibu Mkuu wa Wizara ya Habari, Vijana, Utamaduni na Michezo, Bi Sihaba Nkinga amewataka vijana kujitambua na kuwa na mtazamao chanya ili waweze kujikwamua kiuchumi.

Haya yamesemwa leo  na Katibu Mkuu wa Wizara ya Habari, Vijana, Utamaduni na Michezo Bibi. Sihaba Nkinga katika Kikao kazi cha Maafisa vijana kutoka nchi nzima kilichofanyika mjini Tabora.

Bibi. Sihaba amesema Vijana wawe wabunifu na kuibua miradi mbali mbali ili waweze kupata msaada wa Serikali katika kuendesha miradi yaona kuwataka waache tabia ya mazoe na badala yake wachape kazi.

“Kuweni wabunifu wa programu mbali mbali kuwasaidia vijana ili waondokane na malalamiko yakila siku ktoka kwa Vijana yatokanayo na ukosefu wa  ajira,” Alisema Bi Sihaba.

 Aidha Katibu Mkuu huyo aliwahakikishia vijana kuwa upo Mfuko wa Maendeleo ya Vijana ambao kazi yake ni kuwawezesha vijana kuendeleza miradi yao kwa njia ya mkopo wenye riba nafuu.

Aliongeza kuwa ni vyema Halmashauri zote nchi kutii waraka unaowataka kutenga asilimia tano ya mapato kwa ajili ya Maendeleo ya Vijana kwani kwa kufanya hivyo kunapunguza changamoto zinazowakabili baadhi ya Maafisa Vijana nchini.

Bibi. Sihaba aliongeza kuwa  vijana wajiunge kwenye vikundi na kushirikiana na viongozi wao katika ngazi za Mikoa na Wilaya ambao nao wana program mbalimbali za kusaidia vijana.

“Ikumbukwe kuwa baadhi ya mikoa imeshaanza kutenga fedha kwa ajili ya maendeleo ya vijana. Mfano mkoa wa Tabora umetenga shilingi bilioni 1.8 kwa ajili ya maendeleo ya vijana”.Alisema Bibi Sihaba.

Kwa upande wake Kaimu Mkurugenzi wa Maendeleo ya Vijana, Bwana James Kajugusi amewataka vijana wakabiliane na changamoto zilizopo  ili waweze kujikwamua kiuchumi.

Kajugusi alitumia wasaa huo kuwakumbusha maafisa Vijana kote nchini kutekeleza majukumu yao na kuwahakikishia kwamba Serikali inaendelea kushughulikia changamoto zinazowakabi katika kufanikisha utendaji wao.

Moja ya jukumu la Msingi la Afisa Vijana ni pamoja na kukusanya takwimu  mbalimbali zinazohusu maendeleo ya vijana hasa katika maeneo ya vita dhidi ya UKIMWI, madawa ya kulevya, uchumi na uzalishaji mali na masoko.

Maafisa Vijana wamekutana kati kikao kazi hiki ikiwa ni utaratibu wa kila mwaka ambapo unatekelezwa mara baada ya Kilele cha Mbio za Mwenge na Maadhimisho ya Wiki ya Vijana ambapo mwaka huu kitaifa imefanyika Mkoani Tabora.