Tigo yafuturisha Yatima jijini Dar es Salaam

Watoto wa kituo cha kulelea yatima cha Al-Madrasat Nurilud, Temeke Mikoroshini, wakifuturu katika futari  iliyoandaliwa na Kampuni ya simu ya Tigo, Makumbusho, Dar es Salaam juzi, kama ishara ya upendo na kujali makundi mbalimbali katika jamii, wakati wa mwezi mtukufu wa Ramadhani. (Na mpigapicha wetu)

KAMPUNI ya Tigo Tanzania jana, ilifuturisha zaidi ya watoto yatima 40 kutoka jiji la Dar es Salaam kama ishara ya upendo na kujali wakati wa mwezi huu mtukufu wa Ramadhani. 

Akizungumza katika shughuli hiyo iliyofanyika katika makao makuu ya kampuni hiyo ya simu Makumbusho, Kaimu Mkurugenzi wa Rasilimali Watu kutoka Tigo Bi. Doris Luvanda alisema kwamba wanayofuraha kubwa sana ya kusherehekea kipindi hiki cha mwezi mtukufu na watoto wenye hitaji kutoka kituo cha watoto Al-Madrasat Nurilud ya Temeke Mikoroshini.

“Ramadhani ni wakati wa kipekee ambapo waislamu duniani kote wanaachana na ratiba zao za kawaida na kujikita katika shughuli za kijamii, kutoa misaada, kufunga na swala. Sisi kama Tigo tunayofuraha kubwa sana ya kushirikiana na wateja pamoja na jamii inayotuzungukakatika wakati kama hizi. Tunaamini ya kwamba ishara ndogo ya upendo kama hii inaweza ikamgusa na kubadilisha maisha ya mtu kwa njia ya kipekee kabisa,” alisema Luvanda. 

Sheikh Masoud Seni ambaye ni mlezi wa kituo cha Al-Madrasat Nurilud aliishukuru Tigo kwa kitendo chao cha kuwaandalia futari watoto hao huku akiwasihi kampuni hiyo kuendelea na moyo huo huo. 

“Kwa wale watakaotumia utajiri wao, usiku na mchana, kwa usiri na mbele ya umma, dhawabu zao zipo kwa Mwenyezi Mungu. Kwao hakutakuwa na la kuogopa, wala cha kusononeka (Kuran 2:274). Hakuna namna ingine ambayo utaweza kuwa mwenye haki bila yakutoa kile ambacho unakipenda zaidi. Na chochote unachokitoa, Allah anakifahamu vizuri (Kuran 3:92),” alitafsiri Sheikh Masoud kutoka kwenye kitabu kitakatifu cha Kuran.