Vyama Uturuki vyalalamikia ajali mgodini

Wafanyakazi katika mgodi wakimsindikiza mmoja wao kutoka eneo la ajali hiyo ya Mgodi Soma.

Vyama vya wafanyakazi nchini Uturuki vimeitisha mgomo wa siku moja kulalamika dhidi ya Serikali kufuatia ajali mbaya zaidi ya mgodini kuwahi kutokea nchini humo.

Viongozi wa vyama vya wafanyakazi wanalalamika kuwa kuuzwa kwa migodi ya umma kwa watu binafsi kumechangia pakubwa katika kudorora kwa hali ya usalama katika viwanda.

Hadi kufikia sasa miili ya wafanyakazi 278 wa migodi imetolewa kwenye mgodi huo ulioko Soma.
Makundi ya waokozi yangali yanajaribu kuwafikia zaidi ya wafanyakazi wengine 100 ingawa juhudi zao zingali zinavurugwa na mioto inayowaka kwenye maeneo ya mgodi huo.
Waokoaji wenyewe imelazimu watibiwe kwa uchovu na kupumua moshi.
Mwandishi wa BBC katika Soma anasema kuwa baadhi familia za waliofariki wamekasirishwa na hatua ambazo zimechukuliwa na Serikali kufikia sasa.
Jumanne polisi walipambana na waandamanaji katika miji ya Ankara na Istanbul na Waziri Mkuu Recep Tayyip Erdogan alizomwa alipotembelea eneo la ajali hiyo ya mgodi.