Rais Jakaya Kikwete azindua huduma mpya ya M Pawa ya Vodacom na CBA

Rais Jakaya Kikwete (wa pili kulia) akiwa na Waziri wa Mawasiliano, Sayansi na Teknolojia Profesa Makame Mbarawa (kushoto) na Mkurugenzi Mtendaji wa Vodacom Tanzania Rene Meza  wakifurahia jambo wakati wa uzinduzi wa huduma ya M PAWA ambayo inamwezesha mteja kupata huduma za kibenki kwenye simu ya mkononi kwa njia ya M-pesa iliyozinduliwa kwa ushirikiano wa Vodacom Tanzania na Benki ya CBA, Dar es Salaam leo. Kupitia huduma hiyo mteja wa M-pesa anaweza kuweka, kutoa na kukopa pesa.

Rais Jakaya Kikwete akimpongeza Mwenyekiti wa Bodi ya Wakurugenzi ya Vodacom Tanzania Balozi Mwanaidi Maajar mara baada ya kuzindua huduma mpya ya M-pawa ya kuweka pesa, kutoa na kukopa kwenye simu ya mkononi kwa njia M-pesa kwa ushirikiano na Benki ya CBA jijini Dar es Salaam leo. Wa kwanza kushoto ni Mwenyekiti wa CBA Tanzania Ndewirwa Kitomari Wengine kutoka kushoto ni Naibu Mwenyekiti wa CBA Group Muhoho Kenyatta, Mwenyekiti wa Bodi ya CBA Group Desterio Oyatsi, Waziri wa Mawasiliano, Sayansi na Teknolojia Profesa Makame Mbarawa na Mkurugenzi Mtendaji wa Vodacom Rene Meza.

Rais Jakaya Kikwete (wa tatu kushoto) akiwa pamoja na kutoka kushoto  Mwenyekiti wa CBA Tanzania Ndewirwa Kitomari, Mwenyekiti wa Bodi ya Wakurugenzi ya Vodacom Tanzania Balozi Mwanaidi Maajar, Mkurugenzi Mtendaji wa Vodacom Rene Meza, Waziri wa Mawasiliano, Sayansi na Teknolojia Profesa Makame Mbarawa, Mwenyekiti wa Bodi ya CBA Group Desterio Oyatsi na Naibu Mwenyekiti wa CBA Group Muhoho Kenyatta mara baada ya Rais kuzindua huduma mpya ya M-pawa ya kuweka pesa, kutoa na kukopa kupitia simu ya mkononi kwa njia M-pesa kwa ushirikiano na Benki ya CBA jijini Dar es Salaam leo.

Rais Jakaya Kikwete akizungumza kabla ya kuzindua rasmi huduma mpya ya M-pawa ya kuweka pesa, kutoa na kukopa kupitia simu ya mkononi kwa njia M-pesa inayotolewa kwa ushirikiano wa Vodacom Tanzania na Benki ya CBA jijini Dar es salaam.

Dar - es - salaam Mei 14, 2014
KAMPUNI kinara ya mtandao wa huduma za mawasiliano ya simu za mkononi nchini Vodacom na Benki ya Biashara Afrika - CBA leo wamezindua huduma mpya yenye kuleta mapinduzi makubwa ya M-pawa itakayowawezesha mamilioni ya watanzania kuhifadhi fedha na kukopa kupitia simu zao za mkononi. 

Akizundua huduma hiyo jijini Dar es Salaam Mheshimiwa Rais Jakaya Kikwete alisema "Uzinduzi wa kihistoria wa M-pawa kwa kiasi kikubwa ni uthibitisho wa mafanikio yaliyotokana na mageuzi yaliyofanyika kwenye sekta ya fedha nchini ambayo yamechangiwa pamoja na mambo mengine uwekezaji mkubwa katika sekta ya mawasiliano na hivyo kuwawezesha wananchi kumudu kuzifikia huduma za fedha." 

"M-pawa ni ubunifu mpya katika sekta ya huduma za fedha ambao unaleta pamoja uzoefu wa zaidi ya miaka 50 wa benki ya CBA katika Afrika Mashariki na mafanikio makubwa ya mtandao mpana wa huduma ya M-pesa wenye mawakala zaidi ya 65,000 nchi nzima. 

Huduma hii itaimarisha zaidi uletaji pamoja wa huduma za kifedha kwa kuwezesha wananchi kuweka akiba ya hadi Sh. 1/-, na kukopa kadiri mteja anavyokidhi vigezo."Alisema Mkurugenzi Mtendaji wa Vodacom Tanzania Rene Meza.

"M-pawa ni rahisi kutumia, mteja haitaji kutuma wala kujaza fomu za maombi. Kila mmoja sasa anaweza kufungua akaunti ya benki kwenye benki ya CBA kwa urahisi zaidi kiasi tu cha kuchagua M-pawa kutoka simu yake ya mkononi katika menu ya huduma ya M-pesa. Zaidi, haina gharama zozote wala ukomo wa kutoa ama kuhamisha fedha kutoka M-pesa kwenda M-pawa na kinyume chake"Alisema Meza.

"M-pesa ilikuwa ni mbia sahihi kwetu kuifikisha huduma hii Tanzania tukiamini kuwa kupitia mtandao wake mpana na mfumo imara wa  mawakala zaidi ya 65,000 waliosambaa nchi kote, huduma hii itapokelewa na kukua kwa kasi hapa nchini."Alisema Mwenyekiti wa Bodi ya CBA Tanzania Ndewirwa Kitomari. 

Vodacom na CBA inalenga kuwafikia mamilioni zaidi ya watanzania walio nje ya mfumo rasmi wa huduma za kibenki nchini mbali na wateja Milioni 5 ambao tayari kwa sasa wanatumia huduma ya M-pesa.  

"Tunamatumaini ya kwamba huduma hii itastawi hapa nchini kwa sababu tafiti mbalimbali zinaonyesha kwamba wananchi wengi wanapenda kuweka akiba ili kustawisha maisha yao lakini wanashindwa kufanya hivyo kwa kukosa sifa na vigezo vya benki, M-pawa inatoa jawabu la mahitaji hayo."Alisema Meza.

Ili mteja ajiunge na huduma ya M-pawa anachopaswa kufanya ni kuchagua M-pawa kutoka kwenye menu ya M-pesa na halafu kuchagua huduma kulingana na mahitaji yake kwa wakati huo kama vile kuweka akiba, kutoa ama kuomba mkopo.

"Kwa upande wa huduma ya mikopo, mteja wa Vodacom anapaswa awe ametumia huduma ya M-pesa kwa kipindi cha miezi 6 na kuwa na awe na akiba kwenye akaunti yake ya M-pawa."Amefafanua Meza.

Mbali na ubia na CBA, M-pesa pia ina ubia wa kibiashara na benki zaidi ya 21 hapa nchini inayowapa uwezo wateja wake kuweka ama kutoa fedha wakati wowote mahali popote kwa urahisi zaidi katika akaunti walizonazo kwenye benki hizo. Aidha, kwa sasa huduma ya M-pesa ndio chaguo la kwanza la malipo ikiwa imeunganishwa na malipo ya huduma zaidi ya 200 nchini Tanzania na pia kunufaisha biashara hizo.