Mkuu wa Mkoa wa Iringa, Dk. Ishengoma awataka viongozi wa Dini kushirikiana na Serikali

Mkuu  wa Mkoa wa Iringa, Dk. Christine Ishengoma (kulia), akipongezwa na  Sheikhe Mkuu wa Waislam mkoani Iringa, Juma Alli Tagalile kwa kuwafuturisha  waumini  wa dini ya Kiislam  jana. (Picha na Francis Godwin Blog)

Na Francis Godwin, Iringa

MKUU  wa  Mkoa  wa  Iringa, Dk. Christine Ishengoma  amewataka  viongozi  wa  dini ya Kiislam mkoani Iringa pamoja na viongozi  wa dini nyingine zote  kuendelea kushirikiana na  Serikali ya  Awamu ya nne, chini ya Rais Dk. Jakaya  Kikwete  kudumisha amani na utulivu .

Dk. Ishengoma  ametoa  rai  hiyo jana  katika viwanja  vya  Ikulu ndogo mjini Iringa, wakati akiwafuturisha  waumini  wa  dini ya  Kiislam mkoani Iringa  wanaoendelea na mfungo  wa  mwezi  mtukufu  wa ramadhan.

Pamoja na  kuwapongeza  waumini hao  wa  dini  ya Kiislam kwa kuendelea na mfungo  wa  mwezi  mtukufu  wa ramadhan ila  bado amewataka  kuendelea na mfungo  huo  huku  wakijikita katika maombi ya  kuliombea  Taifa  la Tanzania na mkoa  wa Iringa  ili usiingie katika machafuko  yatakayosababishwa na uvunjifu  wa amani .

" Kwanza  nawapongeza  sana ndugu  zangu waumini  wa  dini ya Kiislam kwa kuingia katika mfungo wa  ramadhani na  kuendelea na mfunngo  huo ....ila nawaombeni tushirikiane katika  kudumisha amani na utulivu katika mkoa  wetu  wa Iringa  na iwapo Iringa  ikahubiri amani na mikoa  mingine  itaiga mfano  wa Iringa na kuja  kujifunza kwetu"

Alisema  kuwa  moja kati ya mafanikio katika Taifa  ni pale ambapo nchi inaendelea kuwa na amani jambo litakalomfanya  Rais wetu  Dr  Jakaya  Kikwete  kuendelea vema na mikakati ya  kimaendeleo kama anavyoendelea  kulitumikia  Taifa .

Aidha  aliwataka  waumini  wa dini ya Kiislam mkoa  wa Iringa kuendelea na ushirikiano na  kuwa  ofisi yake  itaendelea  kuwa karibu na dini  zote  bila ubaguzi na kuwa  kama alivyoanza mwaka jana ataendelea  kuwafuturisha  waumini hao wa  dini ya Kiislam kila mwaka .

Mbali ya  kutoa ahadi  hiyo ya  kuendelea  kutoa  futari kwa  waumini hao  wa  dini ya Kiislam mkoani Iringa  bado  aliwataka kwa  wakati mwingine  atakapowaalika  basi kukumbuka kufika na  wake zao hata kama ni zaidi ya  mmoja wanapaswa  kufika pamoja  kushiriki futari  hiyo.

Kwa  upande  wake  Shekhe mkuu  wa  waislam mkoa wa Iringa  Juma Tagalile  alimpongeza mkuu  huyo wa  mkoa kwa  kuwakumbuka  waumini  wa  dini ya Kiislam na hata  kuamua  kuandaa futari  hiyo .

Pia alisema kwa  upande  wao  wataendelea  kutoa ushirikiano kwa  serikali katika kudumisha amani na utulivu nchini.

Awali MC  wa  sherehe  hiyo katibu  tarafa ya  Iringa mjini Twaha Kimbama alisema  kuwa  mbali ya  waumini hao  wa dini ya Kiislam kualikwa pia mkuu  huyo wa mkoa alialika  watu mbali mbali  wakiwemo viongozi  wa  dini ya Kikristo mjini Iringa ambao hawakupata  kutokea hata  mmoja  tofauti na mwaka jana ambapo wengi  wao  walipata  kushiriki.