Magufuli: Kivuko cha Abiria wa Kigamboni-Bagamoyo kujengwa ndani ya miezi nane, mkataba wa ujenzi wawekwa saini

 Kivuko cha Dar- Bagamoya. (Picha zote na Mwanakombo Jumaa Maelezo)

Mtendaji Mkuu wa Wakala wa Ufundi na Umeme (TEMESA), Mhandisi Marceline Magesa (kulia), akizungumza  katika hafla ya uwekaji saini mkataba wa ujenzi wa kivuko cha Dar es Salaam- Bagamoyo jana jijini. Kivuko hicho, kitakuwa na uwezo wa  kubeba watu 300, kitagharimu sh. 7.91 bilioni. Pichani  kutoka kulia ni Waziri wa Uchukuzi Dk. John Magufuli,Mkuu wa Mkoa wa Dar es Salaam  Mecky Sadick na Katibu Mkuu wa Wizara ya Ujenzi, Balozi Herbert Mrango.

 Mtendaji Mkuu wa TEMESA, Mhandisi Marceline Magesa (wa pili kulia) na Mwakilishi wa Kampuni ya Johs Gram Hanssen A/S ya  Denmark,  Andreas Gottrup wakiweka  saini mkataba wa ujenzi wa Kivuko  cha Dar es Salaam- Bagamoyo jana jijini Dar es Salaam, katika hafla iliyoshuhudiwa na Waziri wa Ujenzi Dk. John Magufuli (aliyesimama katikati), Mkuu wa Mkoa wa Dar es Salaam Mecky Sadick (aliyevaa  shati la kitenge), Balozi wa Denmark nchini, Mh. Johnny Flinto (wa tatu nyuma kushoto),  pamoja na Watendaji Wakuu wa  Wizara ya Ujenzi.

 Mkuu wa Mkoa wa Dar es Salaam Sadick Mecky akizungumza wakati wa  hafla ya uwekaji saini mkataba wa ujenzi wa  Kivuko cha Dar es salaam – Bagamoyo. Kivuko hicho kitagharimu shilingi 7.91 bilioni za kitanzania. Mwengine ni Waziri wa Ujenzi Dk. John Magufuli.

Waziri wa Ujenzi, Dk. Magufuli 

Na Johary Kachwamba-Maelezo

UJENZI wa Kivuko chenye uwezo wa kusafiri kwa kasi ya kilometa 40 kwa saa moja, unatarajiwa kukamilika ndani ya miezi nane kwa lengo la kupunguza msongamano wa magari jijini Dar-es-Salaam.

Kivuko hicho, kitakachotoa huduma ya usafiri kati ya Bagamoyo na Kigamboni kupitia Tegeta na vituo vigine sita (6), kina uwezo wa kubeba zaidi ya abiria 300.

Akizungumza jijini Dar-es-Salaam jana, wakati wa kusaniwa rasmi mkataba wa manunuzi ya kivuko hicho, Waziri wa Ujenzi, Dk. John Magufuli amesema pesa zote zilizotumika katika manunuzi ya kivuko hicho zimetolewa na Wakala wa Ufundi na Umeme (TAMESA) na hivyo ni pesa za wananchi.

“kupanda kwa nauli ya vivuko vyetu na usimamizi mzuri wa pesa zinazopatikana katika vivuko hivyo ndiyo matunda ya kupatikana kwa kivuko hiki, hakuna pesa ya msaada hapo ni pesa za watanzania” alisema Waziri Magufuli.

Mradi huu wa Serikali umeanza na jiji la Dar-es-Salaam na kuahidi kufanya hivyo hata kwa mikoa mingine inayoweza kutumia aina hii ya usafiri, kama Kigoma na Mwanza.

Aidha, Serikali ameiasa kampuni yenye dhamana ya kujenga kivuko hicho kufuata makubaliano yaliyowekwa, kwa kukamilisha kazi hiyo kwa kiwango na wakati ili Watanzania wapate mbadala mwingine wa usafiri haraka.

Kampuni ya M/S Johns Gram Hanssen kutoka nchini Denmark ndiyo iliyoshinda Zabuni ya ujenzi wa kivuko baada ya kuzishida kwa vigezo kampuni zingine 11 kutoka nchi mbalimbali, na gharama ya manunuzi ni dola za kimarekani dola 4,980,000/= sawa na Bilioni 7.91 shilingi za Tanzania.

Mwezi Julai, 2012 TAMESA iliitisha mkutano wa Wadau kujadili jinsi ya kuweza kupunguza na kisha kumaliza kabisa msongamano wa magari jijini Dar-es-salaam, miongoni mwa wadau ni Mamlaka ya Udhibiti wa Usafiri wa Nchi Kavu na Majini (SUMATRA) na Mamlaka ya Bandari (TPA).

Moja ya mapendekezo ilikuwa ni ujenzi wa kivuko cha abiria kitakachotoa huduma kati ya Kigamboni na Bagamoyo, nasasa ununuzi wa kivuko hicho umekamilika, kwa usimamizi wa TAMESA ikushirikiana kwa karibu na Wizara ya Ujenzi.

Mkurugenzi wa TAMESA, Prof. Idrissa Mshoro  amesema SUMATRA na TPA watawajibika kukagua Ubora wa kivuko mara kitakapo kamilika katika karakana ya West Marine, nchini Bagladesh, kwakuwa ujenzi wa kivuko hiki unafanyika nchini humo.

Balozi wa Denmark nchini Tanzania, Johnny Flentø, amedhibitisha ubora wa huduma za kampuni yenye dhamana ya M/S Johns Gram Hanssen, huku akiridhia ujenzi kufanyikia Bangladesh kwakuwa watajenga haraka na kwa bei nafuu.

Kivuko hicho cha 23 kwa Tanzania, na chenye muundo wa kisasa zaidi kuweza kustahimili mabadiliko ya hali ya hewa,  kitafungiwa vifaa vya kisasa vya mawasiliano na usalama.