Wakazi wa Simiyu watoa maoni yao kuhusu Katiba mpya

 

Mjumbe wa Tume ya Mabadiliko ya Katiba, Alhaji Omar Mussa Sheha (aliyesimama) akitoa ufafanuzi kuhusu Katiba ya Jamhuri ya Muungano wa Tanzania ya mwaka 1977 kwa wananchi wa kijiji cha MahembeKata ya Sawida Wilayani Etilima mkoani Simiyu kabla ya kuanza kwa mkutano wa kukusanya maoni ya wananchi kuhusu Katiba Mpya ulioitishwa na Tume hiyo leo jumanne tarehe 27. Novemba, 2012. Wengine kutoka kulia ni wajumbe wa Tume hiyo, Yahya Msulwa, Jesca Mkuchu na Said El-Maamry.

Mjumbe wa Tume ya Mabadiliko ya Katiba, Alhaji Said El- Maamry (aliyesimama) akizungumza na wananchi wa kijiji cha Mahembe Kata ya Sawida Wilayani Itilima mkoani Simiyu kabla ya kuanza kwa mkutano wa kukusanya maoni ya wananchi kuhusu Katiba Mpya ulioitishwa na Tume hiyo leo jumanne, Nov. 27, 2012. Wengine pichani ni wajumbe wa Tume, kushoto Yahya Msulwa, kulia Alhaji Said El-Maamry na Jesca Mkuchu.

Mkazi wa Kijiji cha Inaro Kata ya Luguru Wilayani Itilima mkoani Simiyu, Pius Ndaki (36) akitoa maoni yake kuhusu Katiba Mpya wakati wa mkutano ulioitishwa na Tume ya Mabadiliko ya Katiba kijijini hapo leo Jumanne Nov. 27, 2012.

Mkazi wa kijiji cha Inaro Kata ya Luguru Wilayani Itilima mkoani Simiyu, Bw. Malanda Madeleja (30) ambaye ni mlemavu wa miguu akitoa maoni yake kuhusu Katiba wakati wa mkutano ulioitishwa na Tume ya Mabadiliko ya Katiba kijijini hapo leo Jumanne Nov. 27, 2012.

Mjumbe wa Sekretarieti ya Tume ya Mabadiliko ya Katiba, Yodos Mandera akiwapatia fomu maalum za kutoa maoni kuhusu Katiba Mpya wanafunzi wa shule ya Sekondari Mahembe iliyopo kijiji cha Mahembe Wilayani Itilima mkoani Simiyu mara baada ya kufika na kuhudhuria mkutano ulioitishwa na Tume hiyo leo, Jumanne Nov. 27, 2012.

Mjumbe wa Tume ya Mabadiliko ya Katiba, Jesca Mkuchu (aliyesimama) akitoa ufafanuzi wa vifungu vya Katiba kwa wananchi wa kijiji cha Inaro Kata ya Luguru Wilaya ya Itilima mkoani Simiyu kabla ya kuanza kwa mkutano wa kutoa maoni kuhusu Katiba Mpya ulioitishwa na Tume hiyo leo, jumanne Nov. 27, 2012. Wengine pichani ni wajumbe wa Tume, kushoto Omar Mussa Sheha, Yahya Msulwa na Alhaji Said El-Maamry.

Mkazi wa kijiji cha Inaro, Kata ya Luguru wilayani Itilima, mkoani Simiyu, Bw. Enock Mussa (24), akitoa maoni yake kuhusu Katiba Mpya wakati wa mkutano ulioitishwa na Tume ya Mabadiliko ya Katiba Kijijini hapo leo Jumanne Nov. 27, 2012.

Akinamama wa kijiji cha Mahembe Kata ya Sawida Wilayani Itilima mkoani Simiyu wakijisomea nakala ya Katiba ya Jamhuri ya Muungano ya mwaka 1977 na Sheria ya Mabadiliko ya Katiba katika lugha nyepesi wakati wa mkutano wa kukusanya maoni ya wananchi kuhusu Katiba Mpya uliotishwa na Tume hiyo, leo Jumanne Nov. 27, 2012.

 

Na Ismail Ngayonga, Simiyu

MKAZI wa kijiji cha Inaro, Kata ya Luguru Wilayani Itilima mkoani Geita, Amos Kuhoka (30)amependekeza Katiba Mpya iweke sheria ya kutoa ruzuku kwa Wajawazito wanaokwenda kujifungua watoto katika vituo vya afya nchini.

 

Akitoa maoni yake leo (jumanne Nov. 27, 2012) kwa Wajumbe wa Tume ya Mabadiliko ya Katiba, alisema moja ya vifungu vya katiba ya sasa vinatamka wazi kuhusu haki ya kuishi kwa binadamu, hivyo wazazi ni lazima wasaidiwe katika malezi ya watoto hao.

Akifafanua zaidi alisema katika miaka ya hivi karibuni kumeibuka matukio mbalimbali ya wanawake kutoa mimba, hivyo kusababisha kukatisha uhai wa mtoto aliyetarajiwa kuzaliwa. “Katiba Mpya itamke wazi kuwa Mama anapewa ruzuku kama zawadi anapokwenda kujifungua ili aweze kumlea vyema mtoto wake” alisema.

Naye Bw. Amos Kuhoka (30) ambaye ni mkazi wa kijiji hicho, alipendekeza Katiba Ijayo iwasaidie watoto wanaozaliwa majumbani nao pia kuweza kupata vyeti vya kuzaliwa tofauti na ilivyo sasa kwani vyeti hivyo hutolewa kwa watoto wanaozaliwa katika mahospitali pekee.

“Kwa kweli huwezi kufahamu uchungu wa Mama katika kujifungua utampata wapi, kokote unaweza kumfika hata nyumbani pia hivyo ni vyema katika Katiba kuwepo na kipengele kinachowasaidia watoto wanaozaliwa nyumbani nao kupata vyeti vyao vya kuzaliwa” alisema.

Aidha, alisema kuwa wazazi wengi wenye watoto waliojifungulia nyumbani ambao wana uwezo mdogo wa kifedha wamejikuta wakishindwa kuvipata vyeti hivyo na kuwafanya watoto wao kuishi pasipo kuwa na vyeti hivyo.

Kwa upande wake Bw. Lameck Lazaro (43), amvaye naye pia ni mkazi wa kijiji hicho naye amependekeza Katiba Mpya iweke kipengele kitakachowawezesha wazee wenye umri wa miaka 60 na kuendelea kupatiwa vyeti vya kuzaliwa.

Alisema katika miaka ya hivi karibuni kumekuwepo na usumbufu wa mara kwa mara unaojitokeza kuhusu umri halisi wa wazee nchini.

Aliongeza kuwa wazee wengi wameshindwa kutambua uhalisia wa umri walionao kwa kuwa walizaliwa katika miaka ya zamani ambapo hakukuwa na utaratibu wa kuandisha cheti cha kuzaliwa na badala yake wengi wao wamekuwa wakibahatisha kuhusu umri alianao.

“Katiba Mpya itamke wazi kuwa wazee wote watapatiwa vyeti vya kuzaliwa ili kuwasaidia kutambua umri wao” alisema.