Dk. Shein apokelewa kwa kishindo, azuru kaburi la Mzee Karume Zanzibar

Makamu Mwenyekiti wa CCM Zanzibar na Rais wa Zanzibar na Mwenyekiti wa Baraza la Mapinduzi Dk. Ali Mohamed Shein, (katikati) akisalimiana umati mkubwa wa wananchi na wana-CCM waliofika kwa mapokezi yake katika Viwanja vya CCM Kisiwandui, Mjini Zanzibar jana, wakati akitokea Dodoma katika Mkutano Mkuu na uchaguzi wa viongozi wa juu wa hicho. (Picha zote na Ramadhan Othman, Ikulu).

Makamu Mwenyekiti wa CCM Zanzibar na Rais wa Zanzibar na Mwenyekiti wa Baraza la Mapinduzi Dk. Ali Mohamed Shein, (wa tano kulia) pamoja na viongozi wengine na  wazee wa Chama cha Mapinduzi, Ofisi Kuu ya CCM Kisiwandui, wakiomba dua katika kaburi la marehemu Mzee Abeid Amani Karume, lililopo katika viwanja vya Ofisi hiyo, alipowasili akitokea Dodoma katika mkutano mkuu wa chama hicho

uliomuwezesha kushika nafasi hiyo.

Makamu Mwenyekiti CCM Zanzibar, Rais wa Zanzibar, Dk. Ali Mohamed Shein, akisalimiana na wazee wa Chama Cha Mapinduzi (CCM), Ofisi Kuu ya CCM Kisiwandui, alipofika kupata baraka za wazee hao, ikiwa ni pamoja na kumuombea dua marehemu Mzee Abeid Amani Karume katika kaburi lake lililopo katika viwanja vya ofisi hiyo.

Na Maelezo Zanzibar   17/11/2012

Rais wa Zanzibar na Mwenyekiti wa Baraza la Mapinduzi ambaye pia ni Makamu Mwenyekiti CCM Zanzibar, Dk. Ali Mohammed Shein ameendelea kukemea vikali vikundi vya watu vilivyojificha chini ya mwamvuli wa kidini kufanya vurugu na kutishia amani kwamba havitavumiliwa.

Amesema haiwezekani kuwaruhusu watu wachache kuwafanyia vurugu wengi wakati kila mtu ana haki ya kuheshimiwa na kuishi kwa salama katika jamii.

Akizungumza kwenye Mkutano wa hadhara Kibanda maiti mjini Zanzibar, Dk Shein  amesema wananchi wa Tanzania wana uhuru wa kuamini  dini waitakayo bila ya kubughudhiwa  wala kuingiliwa katika ibada zao lakini panapoingia fujo na vurugu Serikali haiwezi kukaa kimya.

Amesema  hakuna mtu anayekatazwa kuabudu lakini kufanyafujo na kuharibu mali za watu hakustahamiliki na kuongeza kuwa vikosi vya ulinzi vitaendelea na kazi yao kwa mujibu wa sheria kuona vurugu na fujo hazitokei tena.

Dkt. Shein ameongeza kuwa Serikali ya Mapinduzi ya Zanzibar itaendelea kuilinda Serikali ya Umoja wa Kitaifa na kuheshimu maridhianao ya kisiasa yaliyopo ili kuleta maendeleo kwa Wananchi wote.

Amesema Serikali ambayo anaiongoza itaendelea kuwalinda na kuwaletea maendeleo wananchi wote bila kujali tofauti zao kama ambavyo sheria za nchi zinavyoelekeza.

Ameongeza kuwa yeye ni Kiongozi Jasiri ambaye haongozi kwa kubahatisha bali hutumia Katiba ya nchi sambamba na kanuni nyingine zinazosaidia kuendesha nchi na kuwaletea wananchi maendeleo.

Kuhusu kuimarisha chama cha CCM Makamu Mwenekiti huyo amewataka wanaCCM kushikamana katika kuimarisha chama chao ikiwa ni pamoja na kuziimarisha Maskani za Chama hicho ambazo ndio nguzo imara za ushindi wa Chama.

Aidha amewataka WanaCCM kutembea kifua mbele kutokana na mafanikio yaliyopatikana chini ya uongozi wake na kwamba uwezekano wa CCM kuendelea kuongoza dola mwaka 2015 ni mkubwa.

Akizungumzia kuhusu Muungano Dkt. Shein amesema ulitokana na Mapinduzi matukufu ya Zanzibar mwaka 1964 hivyo akiwa Rais ataendelea kuulinda chini ya Mfumo uliopo wa Serikali mbili.

Aidha amewataka wanaCCM katika mchakato uliopo wa Katiba mpya kutoogopa kutoa maoni yao kwa Tume ya Katiba ambapo pia aliwakumbusha WanaCCM kuwa Sera ya Chama katika muungano ni Serikali mbili.

 Awali Akitoa salamu zake Katibu Mkuu wa CCM Abrahman Omar Kinana amemuhakikishia Dkt Shein ushirikinao wa kutosha wa kukiimarisha Chama hicho nakwamba chini ya uongozi wake CCM Bara na Zanzibar itakuwa inafanya kazi kwa mashirikiano makubwa.

Mapema WanaCCM wa mikoa minne kichama ya Unguja walitoa salamu zao za pongezi na kumuomba Makamu Mwenyekiti huyo wa CCM Zanzibar kutowafumbia macho watu ambao wanahatarisha amani na utulivu uliopo nchini.

Mkutano huo wa CCM wa kuwashukuru wanachama umekuja kufuatia ushindi wa asilimia 100 ambao Rais Shein aliupata kwa kuchaguliwa kuwa Makamu Mweyekiti wa Chama hicho kwa upande wa Zanzibar.