Wakulima 7 Mufindi wakopeshwa matrekta yenye thamani ya sh. milioni 310

Mkuu  wa Mkoa  wa Iringa, Dk. Christine Ishengoma, akiliwasha moja ya matrekta 7, yaliyotolewa mkopo kwa  wakulima wa  Wilaya ya Mufindi mkoani humo na SUMA-JKT. (Picha zote na Francis Godwin)

Mkuu  wa Mkoa  wa Iringa, Dk. Christine Ishengoma, akilijaribu moja kati ya matrekta 7, yaliyotolewa mkopo kwa  wakulima wa  Wilaya ya Mufindi mkoani humo na SUMA-JKT. Jumla ya matrekta 27, yanategemewa  kukopeshwa kwa  wakulima wa wilaya hiyo, ili kuhamasisha sera ya Kilimo Kwanza.

Wakulima saba Mufindi wakopeshwa matrekta 7 na SUMA - JKT

Na  Francis Godwin, Mufindi SERIKALI wilayani Mufindi, mkoani Iringa  imeendelea  kuwahamasisha  wakulima kuongeza  uzalishaji zaidi  kupitia sera ya  Kilimo Kwanza  kwa  kuwakopesha matrekta 7, yenye thamani ya shilingi milioni  310,962,220. Akikabidhi matrekta hayo jana,  Mkuu  wa  Mkoa  wa Iringa, Dk. Christine Ishengoma, alisema  kuwa hatua ya  kukabidhi  matrekta  hayo ni  sehemu ya  utekelezaji  wa Ilani ya uchaguzi ya  Chama Cha Mapinduzi (CCM) na  kutimiza  dhana  ya  kilimo  bora . Hivyo alisema  kuwa  Mkoa  wa  Iringa ni moja kati ya mikoa ambayo  imekuwa  ikitegemewa kwa  uzalishaji  wa  mazao ya  chakula na  hivyo lazima  wakulima  kuendelea  kuhamasishwa  zaidi  ili  kujitokeza  kukopa matrekta  hayo kwa Taasisi ya Suma JTK  ili  kuweza  kunufaika na  zana  hizo za  kilimo. Dkt  Ishengoma  alisema  kuwa  katika  wilaya ya  Mufindi jumla ya  matrekta 27  yanategemewa  kufika  katika  wilaya  hiyo kwa ajili ya  wakulima  hivyo  lazima matrekta hayo  kutumika  vema katika  kilimo na  watakaopata matrekta hayo  kuweza  kuwasaidia  wakulima  wengine  katika  kilimo. Hata  hivyo  alisema tayari  wabunge  walimwomba  waziri  mkuu kuwasaidia  ili mikopo hiyo ya Matrekta  wakulima  warejeshe kwa kipindi cha miaka minne  badala ya miaka  mitatu kama  Suma JKT  walivyotaka. Alisema maombi  hayo ya  wabunge  yalifikishwa kwa  waziri mkuu Mizengo Pinda na tayari   waziri  mkuu  alilifikisha  ombi hilo la wabunge kwa  SUMAJKT na  wamekubali  iwe hivyo  japo bado  hawajabadilisha  katika  fomu  zao na kuwaomba  kufanya hivyo. Pia  Mkuu  huyo  wa  mkoa  aliwataka  wakulima hao ambao  wamekopeshwa matrekta  hayo  mbali ya  kutumia katika  kilimo cha  zao la chai  pia  kuhakikisha  wanalima hata mazao ya  chakula  kwa  wingi  ili  kuendelea  kuongeza  uzalishaji wa mazao ya chakula katika wilaya ya Mufindi na mkoa  wa  Iringa kwa ujumla. Kuhusu  maofisa  ugani  mkuu  huyo  wa mkoa  aliwataka  kushirikiana na  wakulima hao  ili  kuweza  kuyatumia vema  matrekta  hayo kwa  kulima na kupanda kwa kuzingatia ushauri wa wataalam . Kwa upande  wake  mkuu wa wilaya ya  Mufindi  Evalista Kalalu  alimweleza  mkuu  huyo wa mkoa  kuwa  wilaya ya  Mufindi  imekuwa ni moja ya  wilaya  za mkoa  wa Iringa ambazo   wananchi  wake  wamekuwa na mwamko mkubwa  wa  kujitokeza  kukopa mkopo wa matrekta hayo na  hivyo ana hakika  Mufindi  itaendelea  kusonga mbele katika  uzalishaji wa mazao ya chakula na biashara kupitia sera ya  Kilimo Kwanza. Alisema  kuwa kati ya  wakulima  ambao  wamejitokeza  kuchukua mkopo huo wa Matrekta  baadhi yao  ni  wanawake ambao  ndio  wamekuwa  wakinyanyasika  zaidi  kwa  kilimo  cha jembe la mikono. Afisa  kilimo  wa  wilaya ya Mufindi  Edna Kaduma  alisema  kuwa kati ya  wakulima 31  waliofanyiwa  tathimini  ya mali zao  kama  sehemu  ya dhamana ya kukopeshwa  Matrekta , wakulima 27 wamekidhi vigezo vya kukopeshwa na kati ya hao saba  wameshalipia asilimia 30 ya mkopo  wote. Aliwataja   wakulima  walioanza  kunufaika na mkopo  huo kuwa ni Bertha Kilimila, Chedy Ng'umbi, Gabriel Mlyuka, Hawad Ng'umbi, Boniface Ng'umbi, Godfrey Ndyendya na  James Msigala  . Alisema  wakulima  hao  wanatarajia  kulima hekta 2100 za mazao ya chakula kama  mahindi , alizeti, ngano, viazi mviringo na mikunde . Hata  hivyo akizungumza kwa niaba ya  wakulima  wenzake Bertha Kilimila  alipongeza  serikali kwa  kuwakumbuka  wakulima hao na kuomba  kuwezeshwa  kupewa  pembejeo za  kilimo kwa wakati ili  matumizi ya zana  hizo yaendane  sambamba na pembejeo