Waislamu wanaopinga Sensa watakiwa kujihesabu wenyewe Misikitini

Mufti Sheikh Issa Shaaban Bin Simba

Na  Joseph Mwambije,

Songea

SHEIKH  Mkuu wa Wailsamu nchini, Mufti Issa Shabaan bin  Simba amewata Waislamu ambao wanahitaji kujua idadi yao, kujihesabu wenyewe kwenye Misikiti  yao badala ya kuzuia zoezi la Sensa ya watu na makazi kwa kugoma kuhesabiwa na kuzuia wengine kuhesabiwa.

Alitoa kauli hiyo jana wakati akizungumza kwenye Baraza la Idd Elftri lilofanyika kwenye Ukumbi wa Shule ya Sekondari ya  wasichana ya Songea ikiwa ni sehemu ya kuhitimisha Ibada ya Idd Eftri iliyofanyika Kitaifa Mkoani Ruvuma.

Kiongozi huyo wa Waislamu Nchini  amwataka Waumini wa dini hiyo kuachana na baadhi ya Viongozi  wa Kiislamu wanaowahamasisha kuiasi Serikali kwa kuchochea vurugu  kwa kuwa kufanya hivyo ni kinyume  cha miongozo ya Kurani tukufu inayowataka kutii mamlaka ilimradi isiende tofauti na Mungu.

‘Waislamu wajihesabu wenyewe misikitini wasiitegemee Serikali kuwatolea hesabu yao kwamba wako wangapi hivyo basi kupinga Zoezi la Sensa kwa madai ya kutokuwepo kipengele kinachoeleza  dini si sahihi’alisema Mufti Simba.

Aliwataka kuwa na Kompyuta katika Misikiti yao  na kuhifadhi kumbukumbu zao na kujua wana  vijana,watoto na yatima wangapi  badala ya kupinga kuhesabiwa kwa maendeleo ya Nchi.

Sheikh Simba alifafanua kuwa Sensa ya watu na makazi ni kwa maendeleo ya 

Nchi hivyo kupinga si sahihi na na kuwataka Waumini wa Kiislamu kutopinga maendeleo na kuwapuuza Masheikh wanawahamasisha kupinga maendeleo.

Katika hatua nyingine amewataka Waislamu kutenda mema ili kuongeza idadi yao na kubainisha kuwa licha ya uchache wao watang’ara ikiwa watajizuia kutenda maovu.

‘Mjizuie kutenda maovu kwa kuwa Mwanadamu asiyejizuia kutenda maovu mwisho wake daima huwa ni mbaya na msipokuwa na uwezo wa kujizuia kutenda maovu ibada ya funga kwenu haina maana’alisema na kufafanua

Katika kipindi chote cha Mwezi Mtukufu wa Ramadhani mmejizuia kutenda maovu muendelee hivyo na kuendeleza kazi mliyopewa  na Mungu ya kutenda mema hivyo Muwe viumbe  mliozaliwa upya baada ya Mfungo.

Amewataka Waislamu kuachana na maneno ya kwamba wao wanaonewa na badala yake wawe wanachanga pesa kwa ajili ya kuwasaidia yatima na wajane na kwa maendeleo kwa ujumla huku wakikataza maovu na kuhimiza mema.

Akizungumza kwenye Braza hilo Katibu wa Baraza la waislamu Tanzania(BAKWATA) Mkoa wa Ruvuma Sheikh Abdul  Shakhil alisema wana mpango wa kujenga Kituo cha Afya na Sekondari katika Manispaa ya Sengea.

Kwa upande wake Mkuu wa Mkoa wa Ruvuma Said Mwambungu ambaye alimwakilisha Rais Kikwete ambaye alitakiwa kuwa Mgeni Rasmi alisema katika kipindi cha hivi karibuni umezuka utamaduni mgeni kwa Watanzania wa  kuchochea chuki na uhasama miongoni mwa Watanzania na kuwataka Viongozi wa dini kukemea vitendo  hivyo.

Alisema kuwa gharama ya machafuko ni kubwa sana kwa Taifa hivyo aliwataka Watanzania kutofurahia vitendo vya kuchochea machafuko na badala yake kuendelea kuitunza tunu ya amani,umoja wa Kitaifa na  mshikamano

Alisema Serikalikali itaendelea kushirikiana na Viongozi wa dini kwa kuwa inatambua,kuheshimu na kuthamini sana mchango wa dini  katika mafanikio  na maendeleo ya Taifa.