Timu ya Taifa ya Tanzania kuondoka kesho kushiriki katika Michezo ya Afrika (All Africa Games)

Mkurugenzi Idara ya Habari Bw. Assah Mwambene akizungumza na waandishi wa habari (hawapo pichani) leo jijini Dar es Salaam kuhusu Timu ya Taifa itakayoshiriki katika Michezo ya Afrika (All Africa Games) Congo Brazaville. Kushoto ni Mkurugenzi Msaidizi Maendeleo ya Michezo Bibi. Juliana Yassoda na kulia ni Mkuu wa kitengo cha Mawasiliano Serikalini kutoka Wizara ya Habari, Vijana, Utamaduni na Michezo Bibi. Concilia Niyibitanga.

Mkurugenzi Msaidizi Maendeleo ya Michezo Bibi. Juliana Yassoda (kushoto) akifafanua jambo wakati wa Mkutano na waandishi wa habari kuhusu Timu ya Taifa itakayoshiriki katika Michezo ya Afrika (All Africa Games) Congo Brazaville. Kulia ni Mkurugenzi Idara ya Habari Bw. Assah Mwambene. (Picha zote na Genofeva Matemu - Maelezo)

Na Genofeva Matemu -  Maelezo

TIMU ya Taifa ya Tanzania yenye wachezaji wapatao 30 na viongozi 7 wa michezo mbalimbali inatarajia kuondoka Jijiji Dar es Salaam kesho jioni na ndege maalum kuelekea Congo Brazaville kushiriki katika Michezo ya Afrika (All Africa Games) itakayofunguliwa rasmi Septemba 4, 2015.

Hayo yamesemwa leo Jijini Dar es Salaam na Mkurugenzi Idara ya Habari Bw. Assah Mwambene wakati wa Mkutano na Waandishi wa habari kuhusu Timu ya Taifa itakayoshiriki katika Michezo ya Afrika (All Africa Games) huko Congo Brazaville.

Bw. Mwambene amesema kuwa Tanzania itawakilishwa na Michezo sita ikiwemo Mchezo wa Ngumi za Ridhaa yenye wachezaji watatu, Timu ya Mpira wa Miguu ya Wanawake (Twiga Stars) yenye wachezaji 18, na Timu ya Riadha yenye wachezaji wanne.

Nyingine ni Timu ya kuogelea yenye wachezaji wawili, wachezaji wawili wa Judo pamoja na Michezo kwa watu wenye Ulemavu yenye wachezaji wawili.

Naye Mkurugenzi Msaidizi Maendeleo ya Michezo Bibi. Juliana Yassoda amesema kuwa Timu ya Taifa ya Tanzania ilikua iondoke kwenda Congo Brazaville leo lakini kutokana na ugumu wa upatikanaji wa nafasi katika ndege mbalimbali timu hiyo imelazimika kuondoka kesho na usafiri maalum.