Mhe. Dkt. Asha-Rose Mtengeti Migiro (Mb) Waziri wa Katiba na Sheria; Mhe. Mohamed Chande Othma Jaji Mkuu wa Tanzania; Mhe. Angellah Jasmine Kairuki (Mb)
Naibu Waziri wa Katiba na Sheria; Ndugu Maimuna K. TarishiKatibu Mkuu, Wizara ya Katiba na Sheria;
Ndg. George Masaju Mwenyekiti wa Bodi ya Uendeshaji wa Taasisi ya Mafunzo ya Uanasheria kwa Vitendo Tanzania; Ndg. Hussein Kattanga Mtendaji Mkuu wa Mahakama ya Tanzania;
Mhe. Said Mecky Sadick Mkuu wa Mkoa wa Dar Es Salaam; Mhe. Jordan Rugimbana
Mkuu wa Wilaya ya Kinondoni; Mhe. Jaji Dkt. Gerald Ndika Mkuu wa Taasisi ya Mafunzo ya Uanasheri kwa Vitendo Tanzania;
Bi. Patricia McCullagh Kiongozi wa Timu ya Wadau wa Maendeleo katika Programu ya Maboresho ya Sekta ya Sheria (Legal Sector Working Group);
Wadau wa Maendeleo;
Watumishi na Wanafunzi wote wa Taasisi ya Mafunzo ya Uanasheria kwa Vitendo Tanzania;
Wageni Waalikwa; Mabibi na Mabwana;
Awali ya yote napenda
kuchukua fursa hii kumshukuru Mwenyezi Mungu mwingi wa rehema, kwa kutujaalia
uzima na kutuwezesha kukutana hapa. Ninakushukuru sana
Mheshimiwa Dkt. Asha-Rose Mtengeti Migiro (Mb), Waziri wa Katiba na Sheria kwa
kunialika kuja kujumuika nanyi katika siku hii adhimu ya uzinduzi wa majengo ya
Taasisi ya Mafunzo ya Uanasheria kwa Vitendo Tanzania. Mmenipa heshima kubwa ya
kuwa sehemu ya historia muhimu ya Taasisi hii.
Mheshimiwa Waziri wa Katiba na Sheria;
Natoa pongezi nyingi
kwako na kwa wale wote walioshiriki kubuni wazo la kuwa na majengo na
miundombinu ya aina hii na kufanikisha ujenzi wake. Juhudi zao na moyo
wao wa kupenda maendeleo katika sekta ya sheria ndio umetufanya tujumuike hapa
leo kushuhudia mafanikio haya. Hakika hili ni jambo la kujivunia. Vile vile,
napenda kuchukua fursa hii kuwapongeza Wajenzi na Mhandisi Mshauri kwa kazi
nzuri waliyofanya ya ujenzi wa majengo na miundombinu hii. Sote tunayaona
majengo yalivyojengwa vizuri na kwa ustadi mkubwa.
Kwa namna ya pekee,
ninatoa shukrani zangu za dhati kwa Wadau wa Maendeleo walioshiriki kupitia
Programu ya Maboresho ya Sekta ya Sheria nchini kuchangia ujenzi wa majengo
haya. Wadau hawa ni pamoja na Shirika la Maendeleo na Ushirikiano la
Canada (DFATD) ambalo zamani lilijulikana kama (CIDA), Shirika la Maendeleo na
Ushirikiano la Denmark (DANIDA) na Benki ya Dunia (World Bank). Ninatambua pia
kuwa Programu hii imechangia maendeleo makubwa katika Sekta ya Sheria hususan
katika ujenzi wa miundombinu ya taasisi mbalimbali zikiwemo Mahakama ya Tanzania na
Ofisi ya Mwanasheria Mkuu wa Serikali. Pamoja na mambo mengine, Programu hii
imewezesha watumishi katika Sekta ya Sheria kujenga na kuimarisha uwezo wao wa
kutoa huduma na imesaidia upatikanaji wa vitendea kazi na nyenzo mbalimbali kama vile samani na magari. Haya yote yamechangia katika
kuiwezesha Sekta nzima ya Sheria kufikia dira yake ya Haki Sawa kwa Wote na kwa Wakati.
Wageni Waalikwa;
Mabibi na Mabwana;
Kuanzishwa kwa Taasisi
ya Mafunzo ya Uanasheria kwa Vitendo Tanzania ni tukio la kihistoria
katika Nchi yetu. Kabla ya kuanzishwa kwa Taasisi hii, mafunzo ya uanasheria
kwa vitendo kwa wahitimu wa Shahada ya Kwanza
ya Sheria ya vyuo vikuu mbalimbali vya ndani na nje ya nchi yalikuwa
yanaendeshwa na kusimamiwa na Ofisi ya Mwanasheria Mkuu wa Serikali chini ya
Programu iliyokuwa ikiitwa Internship.
Kuanzishwa kwa Taasisi
hii ni matokeo ya mapendekezo ya Tume ya Msekwa ya 1977 (The Judicial System
Review Commission) na Ripoti ya Bomani ya 1996 (The Legal Task Force Report)
ambazo pamoja na mambo mengine, zilipendekeza kuanzishwa kwa chombo mahsusi cha
kutoa mafunzo ya uanasheria kwa vitendo. Mapendekezo haya yalitiwa nguvu na
ongezeko la wahitimu wa shahada ya kwanza ya sheria na ongezeko la vyuo
vinavyotoa shahada za Sheria nchini; na hivyo kuifanya Ofisi ya Mwanasheria
Mkuu wa Serikali kushindwa kumudu na kusimamia programu ya Internship.
Chini ya programu ya Internship wahitimu walikuwa wanamaliza
wakiwa wamepata sifa za kuajiriwa katika utumishi wa umma na hawakuwa na sifa
za kusajiliwa moja kwa moja kuwa mawakili wa kujitegemea na ililazimu wapitie
utaratibu mwingine wa kufanya mitihani ya uwakili yaani “Bar Examinations”. Nimeambiwa kwamba wahitimu wa Taasisi hii
wanatoka hapa wakiwa na sifa za kusajiliwa kuwa mawakili.
Pamoja na kutoa
mafunzo ya uanasheria kwa vitendo, nimeambiwa pia kwamba Taasisi hii kwa
kushirikiana na Chama cha Wanasheria Tanganyika itakuwa inatoa huduma ya
msaada wa kisheria kwa wananchi wasiokuwa na uwezo kumudu gharama za mawakili.
Ni imani yangu kwamba huduma ya msaada wa kisheria itakayokuwa ikitolewa katika
Taasisi hii itakuwa kichocheo kwa wananchi wengi wasio na uwezo, kufikia haki
ambayo wamekuwa wakiitafuta.
Wageni Waalikwa;
Mabibi na Mabwana;
Nimefurahishwa kusikia
kuwa ubora wa elimu ni jambo mnalolizingatia na kulipatia kipaumbele.
Jambo hili ni muhimu sana
kulisisitiza na kulizingatia kwani tunataka wahitimu wa Taasisi hii wafanane na
mahitaji halisi ya huduma za kisheria zinazotakiwa. Wanapaswa kuwa na weledi
katika sheria, wenye maadili na watu wasiotiliwa shaka katika kusimamia
haki. Ningependa kuona wahitimu wa Taasisi hii wanathaminiwa katika soko
la ajira na pia wanafungua fursa za ajira kwa wengine katika ofisi zao.
Wageni Waalikwa;
Mabibi na Mabwana;
Ninapenda kuukumbusha
uongozi na menejimenti ya Taasisi hii kuwa mnayo dhamana na wajibu mkubwa
katika kutoa mafunzo bora kwa wahitimu wa Shahada ya Kwanza
ya Sheria ili wawe mawakili wa kujitegemea au watumishi katika Taasisi za Umma.
Kwa kuwa hii ni Taasisi ya aina ya pekee nchini kwetu, ni wajibu wenu
kuhakikisha Taasisi hii inafanikiwa.
Changamoto iliyo mbele
yenu ni kuthibitisha kuwa kuanzishwa kwa Taasisi hii ni bora kuliko utaratibu
uliokuwepo awali. Kwa sababu hiyo, hamna budi kuhakikisha kuwa mna mipango
mizuri ya kujenga Taasisi yenye hadhi na ubora wa hali ya juu. Kazi hiyo
ni kubwa, hivyo ni vyema mkaweka mikakati madhubuti na mipango thabiti ya utekelezaji,
ufuatiliaji na tathmini.
Aidha, jumuiya yote
inao wajibu wa kufanya kazi kwa bidii, ubunifu, maarifa na weledi ili dhima ya
Taasisi hii ya “Excellence in Legal Practice” iweze kutimizwa kwa ukamilifu.
Timizeni wajibu wenu ipasavyo ili Taasisi hii iwe kivutio kwa wahitimu wa
Shahada ya Kwanza ya Sheria katika Ukanda wa
Nchi za Maziwa Makuu. Ni imani yangu kuwa hili liko ndani ya uwezo wenu na
mkiwa na dhamira ya dhati, linawezekana.
Ndugu Wanafunzi wa Taasisi;
Naomba wote muone
fahari ya kuwa wanafunzi katika Taasisi hii. Nawasihi mjitume kwa kadri
ya uwezo na vipaji mlivyopewa na Mwenyezi Mungu mfanikishe kile kilichowaleta
hapa. Jifunzeni kwa bidii mfaulu vizuri ili mkihitimu muwe kielelezo
kizuri cha mafanikio na ubora wa Taasisi hii. Taifa letu linawategemea nyie kama wataalam katika maeneo mbalimbali ya fani ya sheria.
Mheshimiwa Waziri;
Nimesikia changamoto
mbalimbali ambazo zinaikabili Taasisi tangu kuanzishwa kwake. Nawapongeza
kwa dhati, Mheshimiwa Waziri na wenzako kwa ubunifu wenu na hatua mnazochukua
katika kukabiliana na changamoto hizo. Nawaahidi ushirikiano wangu na wa
serikali katika kutafuta ufumbuzi wa changamoto hizo.
Pamoja na changamoto
hizo, nitumie fursa hii kuwasihi kuyatunza majengo na miundombinu yote ya
Taasisi ili iendelee kuwa katika hali nzuri. Hakikisheni pia mnatunza vizuri
mazingira ya Taasisi hii ili yawe ya mfano kwa Taasisi zingine Wahenga walisema
“Kitunze
Kidumu”. Vile vile, nimeona
jitihada mnazofanya za kupanda miti. Nawasihi muendelee na muongeze jitihada hizo
kwa maeneo ambayo bado hamjafanya hivyo.
Wageni Waalikwa;
Mabibi na Mabwana;
Nimepata nafasi ya
kutembelea miundombinu ya Taasisi hii na kwa namna ya pekee nimevutiwa na jinsi
Mahakama ya Mafunzo itakavyokuwa inafanya kazi kupitia “Mock Trial” niliyoishuhudia hivi punde. Mahakama hii ya Mafunzo ina umuhimu mkubwa sana kwa wanafunzi wa
Taasisi hii kwani itawawezesha kujifunza si tu kwa nadharia bali na kwa vitendo
namna ya kuendesha mashauri mbalimbali na kupata uzoefu. Kwa mfano, kupitia video-link wanafunzi wa Taasisi
watakaokuwa katika kumbi za kufundishia wataweza kuona moja kwa moja
kinachoendelea katika Mahakama hiyo.
Mahakama hii ya
Mafunzo ina vifaa vya kisasa ambavyo vitasaidia kurahisisha uendeshaji wa
mashauri. Ningependa kuona kwamba Mahakama hii haitumiki tu kwa ajili ya
mafunzo; bali inatumika kuendesha mashauri mbalimbali na iwe ni mfano wa
uendeshaji wa mashauri kwa kutoa maamuzi ya haki na kwa wakati.
Naomba nimalizie
hotuba yangu kwa kuwashukuru wananchi wanaoishi Sinza na maeneo mengine
yanayoizunguka Taasisi kwa upendo, ujirani mwema na kwa kuishi vyema na
wanajumuiya wa Taasisi hii. Nawaomba muendelee na moyo na ushirikiano huo. Baada
ya kusema hayo, nawashukuru sana
kwa kunialika. Nawatakia kila la heri na mafanikio tele.
Asanteni sana
kwa kunisikiliza.
No comments:
Post a Comment