Mkuu wa Mkoa wa Dodoma, Dk. Rehema Nchimbi, awataka wadau wa Afya kutotegemea wahisani

Na Catherine Sungura, Dodoma.                           

WADAU wa afya nchini wametakiwa kuacha kutegemea wahisani katika kutokomeza magonjwa mbalimbali yanayoikumba jamii ikiwemo yale yasiyopewa kipaumbele.

Hayo yamesemwa leo na Mkuu wa Mkoa wa Dodoma, Dkt. Rehema Nchimbi wakati akifungua semina kwa Viongozi na Watendaji wa Afya Mkoa wa Dodoma iliyolenga kujadili Mpango wa Taifa wa Kudhibiti Magonjwa Yaliyokuwa Hayapewi Kipaumbele. Magonjwa hayo ni pamoja na  Matende, Minyoo ya tumbo, Kichocho, Usubi, Trakoma, Malale, Kichaa cha Mbwa na Tauni .

Dkt. Nchimbi amesema kuwa kumekuwepo  na dhana potofu miongoni mwa jamii ya kusubiri Ufadhili  kutoka katika Mashirika mbalimbali kwaajili ya kupata msaada wa kushughulikia maswala ya afya  jambo ambalo amesema linarudisha jitihada za kutokomeza magonjwa yanayoikumba jamii.

 “Lazima tujue kujitegemea wenyewe kwani ulinzi wa wananchi ni afya bora hivyo tuachane na dhana ya kutegemea wafadhili na tuwe wa kwanza katika kuisaidia jamii yetu katika kuondokana na magonjwa haya”alisema Nchimbi.

Aidha amewataka watendaji hao kuunganisha nguvu kwa pamoja kwa kutumia mbinu mbalimbali ili elimu iwafikie wananchi waweze kutambua namna ya kujikinga na magonjwa yasiyopewa kipaumbele hasa katika ugonjwa wa upofu wa macho ambao umekuwa kitambulisho cha Mkoa wa Dodomani kutokana na tatizo hilo kuwa kwa watu wengi mkoani hapa.

Dkt. Nchimbi pia ametoa wito kwa watu wanaougua magonjwa hayo wazingatie masharti ya umezaji dawa pamoja kwenda Hospitalini na kwenye vituo vya afya ili waweze kupatiwa matibabu bila ya gharama yoyotepamoja na  kuzingatia masharti ya umezaji dawa na kujitokeza ili kutibiwa mapema kwakuwa wengi wao wamekuwa wakisingizia gharama za matibabu ambazo hutolewa bure katika vituo vya afya nchini.

“Magonjwa haya hayana nafasi katika jamii yetu hivyo wale wenye tatizo wajitokeze kwa wingi katika vituo vya afya ili waweze kutibiwa bure kwani wapo wengine wanatumia kisingizio cha malipo ya dawa kushindwa kupata matibatu katika vituo vyetu vya afya”alisema Dkt. Nchimbi.

Semina hiyo imewashirikisha pia watendaji wa Serikali ikiwemo wakuu wa wilaya za mkoa wa Dodoma,Wenyeviti wa Halmashauri,maofisa elimu na maofisa mipango imefadhiliwa na Wizara ya Afya na Ustawi wa Jamii kupitia mpango wa kudhibiti magonjwa yaliyokuwa hayapewi kipaumbele.