Wakandarasi watakiwa kukamilisha Miradi ya Umeme kwa wakati

Kamishna Msaidizi wa Umeme, Mhandisi Innocent Luoga (katikati) akimsikiliza Meneja wa kampuni ya NCC, Sadeesh John (wa kwanza kushoto) akimpatia taarifa ya utekelezaji wa Mradi wa Electricity V katika kituo cha kupoozea umeme cha Sokoine cha jijini Dar es Salaam mara baada ya Mhandisi Luoga kutembelea kituo hicho. 

Kamishna Msaidizi wa Umeme, Mhandisi Innocent Luoga (wa pili kushoto) akimsikiliza Meneja Mradi wa Electricity V, Mhandisi Florence Gwang’ombe (wa pili kulia) wakati wa ziara yake kwenye kituo cha kupoozea umeme cha Ilala. 

Msimamizi wa Mradi wa Ujenzi wa Vituo Vipya vya Umeme unaofadhiliwa na JICA, Takayuki Kojima (kulia) akimfafanulia jambo Kamishna Msaidizi wa Umeme, Mhandisi Innocent Luoga alipofanya ziara katika kituo cha kupoozea umeme cha Ilala. 

Mradi wa Electricity V- Ilala: Transfoma mpya iliyofungwa kwenye kituo cha kupooza umeme cha Ilala mara baada ya majaribio ya awali.

Na Mohamed Seif 

WAKANDARASI wa miradi ya kuboresha miundombinu ya umeme kwenye vituo vya kupoozea umeme jijini Dar es Salaam wametakiwa kuhakikisha wanakamilisha miradi hiyo ndani ya muda uliopangwa.

Wito huo umetolewa hivi karibuni na Kamishna Msaidizi wa Umeme, Mhandisi Innocent Luoga wakati wa ziara yake ya ukaguzi wa Mradi wa Kusambaza Umeme ujulikanao kwa jina la Electricity V unaofadhiliwa na Benki ya Maendeleo ya Afrika (AfDB) ambao unahusisha ujenzi na ukarabati wa vituo vya kupoozea umeme vya Sokoine, Ilala na Njiro.

Aidha, ziara hiyo pia ilihusisha ukaguzi wa Mradi wa Ujenzi na Ukarabati wa Vituo vya Ilala na New City Centre pamoja na ujenzi wa vituo vipya vya Ilala na Muhimbili ambao unafadhiliwa na Serikali ya Japan kupitia Shirika la Maendeleo la Japan (JICA) na vilevile Mradi wa Mfumo wa Kusimamia na Kudhibiti Usambazaji wa Umeme Dar es Salaam ujulikanao kama Distribution SCADA System uliopo Mikocheni unaofadhiliwa na Serikali ya Finland.

Mhandisi Luoga alielezea lengo la ziara hiyo kuwa ni kujionea hatua iliyofikiwa katika utekelezaji wa miradi hiyo ikiwa ni pamoja na kubaini changamoto zinazokabili utekelezaji wa miradi husika.

Katika taarifa yake ya utekelezaji wa Mradi wa Electricity V, Meneja wa Mradi huo, Mhandisi Florence Gwang’ombe alisema kutokana na sababu mbalimbali huenda mradi huo ukachelewa kukamilika tofauti na makubaliano ya awali kitendo ambacho kilimkera Mhandisi Luoga na hivyo kumuagiza Meneja huyo kukaa na wakandarasi wa Mradi na kurejea makubaliano ya awali.

Mhandisi Florence alisema moja ya sababu inayopelekea Mradi huo kuwa na kasi ndogo ni wakandarasi kushindwa kuajiri wafanyakazi wa kutosha.

Mhandisi Luoga aliwaagiza wakandarasi hao ambao ni kampuni ya National Contracting Company Ltd (NCC) ya India na ELTEL Group kutoka Finland kuhakikisha wanaajiri wafanyakazi wa kutosha na pia kuandaa ratiba ya shughuli zinazotakiwa kufanywa ili kuepuka kuchelewa kukamilika kwa miradi husika.

Aidha, Mhandisi Luoga aliwaagiza Mameneja Miradi wa Shirika la Umeme Nchini (TANESCO) kuhakikisha kunakuwepo na usimamizi madhubuti wa miradi iliyo chini yao ili kuleta matokeo yanayotarajiwa.

Alisema lengo la Serikali ni kuhakikisha taifa linakuwa na umeme wa uhakika kwa ajili ya kukuza uchumi na hivyo aliwaasa mameneja hao kuhakikisha azma hiyo inatimia.

“Ninawasisitiza muhakikishe kunakuwepo na ufatiliaji makini wa miradi mnayoisimamia na sio kuwaachia wakandarasi wafanye kila kitu bila usimamizi wenu,” aliagiza Mhandisi Luoga.

Kwa upande wake Meneja wa kampuni ya NCC Ltd, Sadeesh John alimuahidi Mhandisi Luoga kuwa atahakikisha kasi ya utekelezaji inaongezeka na kutimiza maagizo husika ili kuhakikisha mradi unakamilika ndani ya muda uliopangwa.