Rais Dk. Shein mgeni rasmi maadhimisho Siku y Sheria Zanzibar

Jaji Mkuu wa Zanzibar Omar Othman Makungu na Jaji Mkuu wa Jamhuri ya Muungano wa Tanzania  Mohamed Othman Chande (mbele) wakiongoza maandamano wakati wa kilele cha siku ya Sheria Zanzibar sherehe zilizofanyika leo katika viwanja vya Victoria Garden Mjini Zanzibar. (Picha zote na Ikulu)

Mahakimu na Wanasheria wakiwa katika maandamano wakati wa kilele cha siku ya Sheria Zanzibar sherehe zilizofanyika leo katika viwanja vya Victoria Garden Mjini Zanzibar ambapo mgeni rasmi akiwa Rais wa Zanzibar na Mwenyekiti wa Baraza la Mapinduzi Dk.Ali Mohamed Shein.
Rais wa Zanzibar na Mwenyekiti wa Baraza la Mapinduzi Dk. Ali Mohamed Shein akisalimiana na Jaji Mkuu wa Zanzibar Omar Othman Makungu (kushoto) alipowasili katika viwanja vya Victoria Garden Mjini Zanzibar katika kilele cha siku ya Sheria Zanzibar(katikati)Waziri wa Katiba na Sheria Abubakar Khamis Bakary.

Rais wa Zanzibar na Mwenyekiti wa Baraza la Mapinduzi Dk. Ali Mohamed Shein akisalimiana na Jaji Mkuu wa Mahakama kuu Tanzania Shaaban Ally Lila (kushoto) alipowasili katika viwanja vyaVictoria Garden Mjini Zanzibar katika kilele cha siku ya Sheria Zanzibar(katikati) Waziri wa Katiba na Sheria Abubakar Khamis Bakary.

Rais wa Zanzibar na Mwenyekiti wa Baraza la Mapinduzi Dk. Ali Mohamed Shein (katikati) Makamo wa Pili wa Rais Balozi Seif Ali Iddi (kulia) akifuatiwa na Jaji Mkuu wa Zanzibar Omar Othman Makungu,Jaji Mkuu wa Tanzania Mohamed Othman Chande (kushoto) na Waziri wa katiba na Sheria Abibakar Khamis Bakary wakiwa wamesimama wakati Wimbo wa Taifa ukipigwa katika maadhimisho ya kilele cha Siku ya Sheria zilizofanyika leo katika viwanja vya Victoria Garden Mjini Unguja.

Jaji Mkuu wa Zanzibar Omar Othman Makungu alipokuwa akisema machache na kumkaribisha Rais wa Zanzibar na Mwenyekiti wa Baraza la Mapinduzi Dk.Ali Mohamed Shein ali azungumze na Wananchi, Mahakimu na Wanasheria katika sherehe za Kilele cha Siku ya Sheria Zanzibar zilizofanyika leo katika viwanja vya Victoria Garden Mjini Unguja.

Rais wa Zanzibar na Mwenyekiti wa Baraza la Mapinduzi Dk.Ali Mohamed Shein akipeana mkono na Jaji Mkuu wa Zanzibar Omar Othman Makungu baada ya kikizindua kitabu cha Mwaka wa Sheria leo katika Sherehe za Siku ya Sheria zilizofanyika  viwanja vya Victoria Garden Mjini Unguja.

 Rais wa Zanzibar na Mwenyekiti wa Baraza la Mapinduzi Dk. Ali Mohamed Shein akionesha kitabu cha Mwaka wa Sheria kama ishara ya uzinduzi wa kitabu hicho samba samba na maadhimishoya siku ya Sheria Zanzibar(kulia) Jaji Mkuu wa Zanzibar Omar Othman Makungu,Jaji Mkuu wa Jamhuri ya Muungano wa Tanzania  Mohamed Othman Chande (kushoto) na wapili kushoto ni Waziri wa Katiba na Sheria Abubakar Khamis Bakary.

Rais wa Zanzibar na Mwenyekiti wa Baraza la Mapinduzi Dk.Ali Mohamed Shein akitoa hutuba yake wakati  wa Maadhimisho ya Kilele cha Siku ya Sheria sherehe zilizofanyika leo katika viwanja vya Victoria Garden Mjini Unguja (kulia) Jaji Mkuu wa Zanzibar Omar Othman Makungu, Jaji Mkuu wa Tanzania Mohamed Othman Chande(kushoto) na Waziri wa katiba na Sheria Abubakar Khamis Bakary.

Na Rajab Mkasaba, Ikulu Zanzibar

JUHUDI zinazofanywa na Serikali ya Mapinduzi ya Zanzibar ni kielelezo thabiti cha kuhakikisha Mahakama zinaendelea kuwa huru, zinafuata misingi ya utawala bora na zinakwenda sambamba na mabadiliko ya teknolojia, kiuchumi na kijamii yanayoendelea kutokea ndani na nje ya nchi.

Rais wa Zanzibar na Mwenyekiti wa Baraza la Mapinduzi Mhe. Dk. Ali Mohamed Shein aliyasema hayo katika hotuba yake aliyoitoa kwenye maadhimisho ya siku ya Sheria Zanzibar huko katika viwanja vya Victoria Garden, mjini Zanzibar.

Dk. Shein alisema kuwa mafanikio yanayoendelea kupatikana katika kukuza demokrasia na uatawala bora nchini ni matunda ya juhudi na mashirikiano ya pamoja, hivyo ipo haja ya kuongeza kasi katika kuhakikisha mahkama zinaendeshwa kwa njia za kisasa zinazopelekea kuwepo kwa ufanisi na kuondosha mrundikano wa kesi.

kwa lengo la kuongeza ufanisi katika sekta ya Sheria, Serikali imeandaa Mkakati wa Mabadiliko katika Sekta ya Sheria Zanzibar (2014-2019) unaotekelezwa na taasisi mbali mbali zilizo ndani na nje ya Wizara ya Katiba na Sheria.

Alisema kuwa miongoni mwa malengo ya Serikali katika utekelezaji wa Mkakati huo ni pamoja na kuimarisha mfumo wa haki za jinai ambao utahakikisha usalama na amani kwa wananchi, kuimarisha mfumo wa haki za madai na kuongeza ufanisi katika kuongeza uwezo wa kupata haki na huduma za kisheria.

Aidha, Dk. Shein alitoa Wito kwa Taasisi za Serikali na zisizo za Kiserikali zikiwemo Jumuiya ya Wanasheria Zanzibar (ZLS), Chama cha Wanasheria Wanawake Zanzibar (ZAFELA) na Kituo cha Huduma za Sheria Zanzibar (ZLSC), kutekeleza wajibu wao ili kuweza kufikia malengo yaliokusudiwa.

Dk. Shein pia, alitumia fursa hiyo kutoa pongezi kwa Jaji Mkuu wa Zanzibar pamoja na viongozi wenziwe wa Mahkama kwa uamuzi wao wa kujiunga na Jumuiya ya Mahakimu na Majaji ya Afrika Mashariki ikiwa ni mwanachama wa kushirikishwa.

Sambamba na hayo, Dk. Shein alitoa wito wa kuongezwa kwa kasi ya kuanzishwa kwa Mahkama ya Biashara ili kuimarisha sekta ya biashara ambayo ni muhimu kwa ustawi wa jamii na maendeleo.

Katika hotuba hiyo, Dk. Shein alisema kuwa Majaji, Mahakimu na Wanasheria wana jukumu kubwa katika kuifanikisha kampeni ya unyanyasaji wa kijisia kwani bado kuna changamoto kubwa katika kutimiza matarajio ya wananchi hasa katika uendeshaji wa kesi za udhalilishaji ambapo zipo lawama na malalamiko kutoka kwa wananchi juu ya usimamizi na uendeshaji wake.

Dk. Shein alieleza kuwa serikali inalifanyia kazi suala la kuanzishwa kwa Mfuko wa Mahakama pamoja na Baraza la Wawakilishi  utaratibu ambao utasaidia kutoa uhuru katika mihimili hiyo.

Katika sherehe hizo, Dk. Shein pia, alizindua kitabu cha mwaka.

Naye Waziri wa Katiba na Sheria Mhe. Abubakar Khamis Bakar, alisema kuwa maana halisi ya uhuru wa Mahakama kuwa msingi wa utawala bora ni kuwa na nguvu, uwezo na uhuru wa Mahakama katika kuwatumikiwa watu ambalo hilo ndio lengo la kaauli mbiu ya mwaka huu.

Alisema kuwa kuwaweka wananchi mwanzo na kuwatumikia kwa kupitia nguvu za Mahakama ndio kiini cha autendaaji wa Mahakama za hapa Zanzibar.

Alisisitiza kuwa katika miongo hii ya utandawazi na hali ya uchumi ni lazima Mahakama za hapa nchini zibadilike na zijikite katika kuwatumikia watu vizuri kwa mujibu wa taratibu zilkizowekwa ambao huo ndio utoaji wa haki ulio huru kwa kuleta utawala bora.

Pamoja na hayo, alieleza kuwa bado tatizo lakutokomeza unyanyasaji wa kijinsia haalijafanikiwa vizuri hapa nchini kwani wazee na jamaii ni wagumu sana wa kutoa msaada wao na mashirikiano yao na vyombo vya sheria.

Nae Jaji Mkuu wa Zanzibar Mhe. Omar Othman Makungu alisema kuwa  kauli mbiu ya siku ya sheria mwaka huu ni ‘ Mahkama huru msingi wa utawala bora’, hiyo ni kutokana na kuzingatia kuwa mwaka huu ni mwaka wa uchaguzi mkuu.

Alisema kuwa tokea kushika madaraka ya kuongoza nchi Dk. Shein amekuwa akichukua jitihada mbali mbali yeye binafsi pamoja na serikali anayoiongoza katika kuweka na kusimamia vyema misingi ya utawala bora.

Jaji Makungu alisema kuwa kuwepo kwa Mahkama huru ni moja ya misingi ya utawala bora kwani kukosekana kwa mahkama iliyo huru na inayotoa haki kw wananchi tena kwa wakati inaweza kupelekea kukosekana kwa amani na utulivu katika nchi.

Sambamba na hayo, Jaji Makungu alimuhakikishia Dk. Shein kuwa Mahkama itajipanga vizuri kukabiliana na hali itakayojitokeza ya masuala ya uchaguzi na itahakikisha kuwa Mahakimu wanatenda haki kwa mujibu wa viapo walivyokula na hawajiingizi katika ushabiki wa kisiasa wakati wa kushughulikia rufaa za uandikishaji.

Aidha, alisema kuwa watahakikisha Mahakimu wanabaki katika ili kujaza fomu za wagombea wakati ukifika na kusisitiza kuwa endapo malalamiko ya uchaguzi yatafunguliwa na wagombea Ubunge au Uwakilishi na Udiwani, basi watashughulikia haraka ipasavyo.

Nae Mwanasheria Mkuu wa Zanzibar Said Hassan alisema kuwa dhana  ya Uhuru wa Mahakama ni kigezo muhimu katika kupima Utawala Bora na ni dhana inayopingana na dhana ya kwamba 'Mtawala hafanyi makosa' kwani katika dhana hiyo mtawala anaaminika mkuu kuliko sheria.

Lakini kutokana na Mapinduzi ya masuala ya kijamii kwa mujibu wa Mwanasheria Mkuu wa Zanzibar dhana hii imekuwa haina nafasi hasa katika ukuaji wa demokrasia baada ya kuondoshwa kabisa kwa dhana ya utawala wa kibabe.

Alisema kuwa dhan ya Utawala bora ni dhana pana inayojumuisha uwazi, uwajibikaji, ushiruikishwaji wa watu, ufanisi, tija uadilifu, usawa na kuheshimu utawala wa sheria.

Alisisitiza kuwa utoaji wa haki unapokuwa hauna uadilifu, haufuati msingi wa usawa na utawala wa shreia unaweza ukabadilisha hata uvunjifu wa amani.

Alisema kuwa  rushwa haina maana kwamba Jaji au Hakimu amepokea akiasi fulani cha fedha bali ametoa hukumu isiyokuwa na misingi ya haki na utawala wa sheria au maadili mazima ya kazi yake hakuyafuata.

"Ni wajibu wetu sisi sote wenye dhamana ya kusimamia Sheria kuhakikisha kwamba tunaisaidia Mahakama katika kutimiza wajibu wake wa kutoa haki"alisema Mwanasheria Mkuu wa Serikali.

Nae Mkurugenzi wa Mashtaka Mhe.  Ibrahim Mzee alisema kuwa uhuru wa Mahakama si zawadi bali ni msingi wa Kikatiba na ni msingi wa Utawala Bora unaoandamana na jukumu kubwa la Mahakama katika kazi ya utoaji wa haki.

Alisema kuwa dhana ya Utawala Bora inasisitiza kwamba jitihada za kuleta na kuendeleza usalama na maendeleo katika nchi ni lazima ziwe za kidemokrasia na zizingatie haki za binaadamu, uwazi, uwajibikaji, ushirikishwaji, uadulifu, ufanisi na utawala wa sheria.

Rais wa Chama cha Wanasheria  Zanzibar Awadh Ali Said nae alisema kuwa wakati umefika wa kuaznishwa kwa Mfuko wa Mhimili wa Mahakama ambao utatumika kwa ajili ya kugharamia shughuli za utawala, uendeshaji na maendeleo ya Mhimili wa Mahkama.

Alisisitiza kuwa iwe jukumu la Serikali katika kuhakikisha kwamba katika kila bajeti ya mwaka husika, inatenga kiwango kinachotosha cha fedha ambazo zitaingizwa katika Mfuko wa Mhimili wa Mahakama.

Aidha, alisema kuwa ipo haja kwa Serikali na Taasisi zenye jukumu la kupambana na rushwa pamoja na wadau wote wa sheria kushirikamana na kuondoa kilio hicho cha wananchi ili kurudisha imani na heshima yao kwa chombo hicho.

Viongozi mbali mbali walihudhuria katika hafla hiyo, akiwemo Makamu wa Pili wa Rais wa Zanzibar Balozi Seif Ali Idd, Jaji Mkuu wa Tanzania Mhe.Mohamed Othman Chande, Jaji Kiongozi wa Mahakama Kuu ya Tanzania Mhe. Shaaban Lila, Naibu Spika wa Baraza la Wawakilishi Mhe. Abdalla Ali, Majai wa Mahkama Kuu, Msajili Mkkuu wa Mhkama ya Tanzania, Mahakimu na Makadhi pamoja na viongozi wa dini na serikali na wananachi mbali mbali.