Maonesho ya 15 ya Wajasiriamali wa sekta isiyo rasmi Afrika Mashariki (Nguvu Kazi/Jua Kali) kufanyika Kigali Rwanda Novemba 30 hadi Desemba 7

Ofisa Habari Mkuu wa Wizara ya Kazi na Ajira, Ridhiwani Wema (kushoto), akizungumza na waandishi wa habari leo, jijini Dar es Salaam kuhusu maonesho ya 15 ya wajasiriamali wa sekta isiyo rasmi ya Jumuhiya ya Afrika Mashariki; yajulikanayo kama Nguvu Kazi/Jua Kali yanayotarajiwa kufanyika Kigali Rwanda,Novemba 30 hadi Desemba 7 mwaka huu. Kulia ni  Afisa Kazi Mwandamizi wa Wizara ya Kazi na Ajira, Sara Daudi.

Mwenyekiti wa Shirikisho la Vyama vya Wajasirimali Tanzania, Joseph Rweyemamu (kulia), akifafanua jambo kwa waandishi wa habari wakati wa mkutano na waandishi wa habari, leo jijini Dar e s Salaam kuhusu maonesho ya 15 ya Jumuiya ya Afrika Mashariki  yajulikanayo kama Nguvu kazi/Jua Kali yanayotarajiwa kuanza 30 hadi Desemba 7 mwaka huu. Kushoto ni  Afisa Kazi Mwandamizi wa Wizara ya Kazi na Ajira, Sara Daudi.

Mratibu wa Chama cha Utabibu wa Dawa Asili Tanzania, Boniverntura Ferdinand (katika), akiwaeleza umuhimu wa dawa asilia wakati wa mkutano na waandishi wa habari leo, jijini Dar es Salaam kuhusu maonesho ya 15 ya Jumuiya ya Afrika Mashariki  yajulikanayo kama Nguvu kazi/Jua Kali  yanayotarajiwa kuanza Novemba 30 hadi Desemba 7 mwaka huu, kulia ni  Afisa Habari Mkuu wa Wizara ya Kazi na Ajira, Ridhiwani Wema na kushoto ni Mweka Hazina wa Shirikisho la Vyama vya Wajasiriamali Tanzania, Jumbe Ngutto. (Picha zote na LoriethaLaurence-Maelezo)

Lorietha Laurence- Maelezo

17/06/2014

WAJASIRIAMALI wamehimizwa kujiandikisha kwa wingi ili waweze kushiriki katika maonesho ya 15 ya wajasiriamali ya sekta isiyo rasmi yanayoshirikisha nchi za  Jumuiya ya Afrika Mashariki yajulikanayo kama Nguvu ya kazi/Jua kali yanayotarajiwa kufanyika November 30 hadi desemba 7, 2014 mjini Kigali Rwanda.

Wito huo umetolewa na Afisa Habari Mkuu wa Wizara ya Kazi na Ajira,  Ridhiwani Wema alipokuwa akiongea na waandishi wa habari leo jijini Dar es salaam na kusema kwamba lengo la kuwahimiza wajasirimali kuweza kujitangaza nje ya nchi na kupanua wigo wa soko la bidhaa zao linadhamiria kuongeza ajira.

“naowaomba wajasiriamali waweze kujitokeza kwa wingi ili kujiandikisha na hivyo kuweza kushiriki maonesho haya ambayo yatajumuisha nchi za Afrika Mashariki na hivyo kuwapa fursa ya kupanua wigo wa soko kwa bidhaa zinaotengenezwa na wajasiriamali hao,” alisema Ridhiwani.

Aliongeza kuwa  maonesho hayo yana malengo ya kuongeza fursa za ajira kupitia uzalishaji wa bidhaa mbalimbali, kuchochea ubunifu, kupanua wigo wa masoko na kuwaunganisha wajasiriamali wadogo katika ngazi ya nchi na Afrika Mashariki kwa ujumla.

Aidha alisisitiza  kuwa ili mjasiriamali aweze kushiriki katika maonesho hayo ni lazima awe mzalishaji wa bidhaa inayohitajika katika maonesho, pia bidhaa hizo ziwe zenye ubora  kwa kukubalika na  ubora wa viwango (TBS) na viwango vya taasisi inayosimamia vyakula dawa,TFDA, kadhalika anuani ya kudumu ya mahali anapofanyia kazi mjasiriamali husika.

Naye Mwenyekiti wa Shirikisho la Vyama vya Wajasiriamali Tanzania, Joseph Rweyemamu aliongeza kuwa kuna umuhimu sana kwa wajasiriamali kushiriki maonesho haya kwa sababu ni njia mojawapo ya kujitangaza nje ya nchi kutokana na  bidhaa zao.

Maonesho hayo yalianzishwa  mwaka 1999 jijini Arusha, wakati wa kusainiwa kwa mkataba wa Jumuiya ya Afrika Mashariki,  na yamekuwa yakiendelea kufanyika kila mwaka kwa kuzunguka nchi zote za Afrika Mashariki, ambapo kwa Tanzania bara yalifanyika mwaka 1999,2006 na 2009.