EOTF kutoa Mafunzo kwa Wanawake Wajasiriamali

Mfuko wa Fursa Sawa kwa Wote (EOTF) utaendesha Semina ya mafunzo ya siku 3 kwa Wanawake Wajasiriamali itakayofanyika kuanzia tarehe 23 hadi tarehe 25 Juni 2014, kuanzia saa 2 asubuhi katika ukumbi wa JKT Mgulani, Temeke,jijini Dar es salaam.

Lengo la mafunzo haya kwa mwaka huu ni kuwaelimisha wanawake jinsi ya kupata mitaji kwa ajili ya biashara, masoko pamoja na stadi za ujasiriamari.

Katika semina hii mada kuu zitahusu Uwekezaji na Ukuzaji mtaji, Utunzaji wa Kumbukumbu za Biashara kwa Kutumia Mashine za EFD, Kuwaunganisha Wazalishaji na Masoko, Mbinu za kushiriki Maonesho ya Biashara, Utaalamu wa kusindika Mazao, Usajili na Matumizi ya “Bar Code” na nyinginezo.

Aidha, elimu juu ya maradhi sugu yanayorudisha nyuma maendeleo ya wanawake itatolewa na jinsi ya kujikinga dhidi ya Malaria, Dengue, Saratani ya Matiti na Shingo ya Uzazi pamoja na Fistula.

Watoa mada katika semina hii ni pamoja na Mkurugenzi Mtendaji wa IPP Dkt. Reginald Mengi, Wakufunzi kutoka Mamlaka ya Mapato Tanzania-TRA, Soko la Hisa la Dar-es-salaam- DSE, Mamlaka ya Maendeleo ya Biashara-TanTrade na Chuo Kikuu cha Dar-es-salaam.

Pia kutakuwa na Madaktari kutoka Manispaa za Ilala na Temeke, hospitali ya Ocean Road na CCBRT.

Natumia fursa hii adimu kuhamasisha wanawake kuudhuria Semina hii  muhimu yenye lengo la kuwajengea uwezo wanawake na vijana wajasiriamali na kuwainua kiuchumi kwa siku zote 3 kuanzia tarehe 23 hadi 25, Juni 2014.

Hakuna malipo kwa washiriki

Imetolewa na Mkurugenzi Mtendaji,

Mfuko wa Fursa Sawa kwa Wote (EOTF).

Ndugu, Stephen Emmanuel

20/06/2014