Wakuu wa Shule za Sekondari Chikola na Msingi ya Chidete zilizofanya vibaya washindwa kujitokeza kuchua zawadi zao

 

Mkuu wa Wilaya Betty Mkwassa

Na John Banda, Bahi

WALIMU Wakuu wa Shule ya Sekondari Chikola na msingi ya Chidete zilizofanya vibaya kwenye matokeo ya ufaulu Kiwilaya zimeshindwa kujitokeza hadharani kwa Mkuu wa Wilaya ya Bahi Betty Mkwasa  kuchukuwa zawadi zao.

Tukio hilo ambalo mwandishi wa habari hii  alishuhudia lilitokea hivi karibuni kwenye maadhimisho ya wiki ya elimu,baada ya Mkuu wa Wilaya kuwataka wachukuwe zawadi zao ikiwemo sanamu  ya mpingo na kikombe kidogo hali ambayo wadau na wanafunzi walilazimika kuwazomea na kubezwa.

Kwa mujibu wa Mkuu wa Wilaya hiyo alisema walimu hao walitakiwa kupokea zawadi hizo kama changamoto kwao kwa kufanya vibaya kwenye ufaulu wa wamafunzi katika shule hizo ikiwemo hiyo ya sekondari na msingi.

“Shule ya sekondari ya Chikola imekabidhiwa zawadi ya sanamu ya kinyango cha mpingo,kutokana na kushindwa kufaulisha mwanafunzi hata mmoja kwa miaka mingi toka ianzishwe shule hiyo,hii ni pamoja na shule ya msingi ya Chidete ambayo imepewa zawadi ya kombe dogo haijafaulisha mwanafunzi wa kiingia kidato cha kwanza”Alisema..

Betty akizungumza na halaiki wa wananchi na wadau wa elimu alisema kuwa pamoja na walimu hao kugoma kujitokeza kuchukua zawadi hizo atahakikisha anazipeka yeye mwenyewe ili akadhikabidhi kwa walimu hao mbele ya wanafunzi wao.

Alisema zawadi hizo zimetolewa ili kutoa changamoto kwa shule zingine kuongeza kasi ya maendeleo ya elimu ikiwa na ufaulu na hatimaye kuondokana na nafasi hiyo ya mwisho kitaaluma katika wilaya ya Bahi.

Hata hivyo amewataka wazazi na wadau wa elimu wa wilaya hiyo kujenga mahusiano mazuri katika mazingira ya miundombinu inayohitajika kwa walimu na wanafunzi ambao shule zao zimekuwa zifanya vibaya katika matokea ya ufaulu wa wanafunzi.

Alisema pamoja na changamoto zilizopo kwenye shule pia zinachangiwa na wazazi na wadau wa elimu ya kutopenda kuchangia michango mbalimbali ambayo inayoweza kuboresha elimu kwa pande zote kama vile serikalini,wazazi na wadau wa elimu.

Kwa upande wake Afisa Elimu wa shule za msingi Mary Mathew alisema kuwa pamoja na shule hizo kufanya vibaya serikali itaendelea kutatua changamoto zilizopo ili wilaya hiyo iweze kufanya vizuri katika sekta ya elimu.