Vijikatarasi vya uchochezi vyapatikana Kenya

Vijikaratasi vya uchochezi ndivyo vilitumiwa kuchochea watu wakati wa ghasia za baada ya uchaguzi 2007

Polisi nchini Kenya wanasema wamepata vijikaratasi vya uchochezi dhidi ya makabila tofauti katika baadhi ya sehemu nchini humo, siku chache tuu kabla ya uchaguzi mkuu.

Vijikaratasi vya uchochezi vilitumika pakubwa wakati wa ghasia za uchaguzi mkuu uliokumbwa na utata wa mwaka wa 2007.

Inspekta Jeneral wa Polisi David Kimaiyo anasema vijikaratasi hivyo vilipatikana mjini Kisumu, ambayo ni ngome ya waziri Mkuu na mgombea wa Urais Raila Odinga na sehemu kadhaa jijini Nairobi.

Pia vingine vilipatikana mjini Mombasa ambako kundi linalotaka kujitenga kutoka Kenya, mkoani Pwani, lina makao yake.

Mjini Kisumu, Polisi ilisema vijikaratasi hivyo vilikuwa vikichochea wakaazi dhidi ya watu kutoka jamii tofauti.

Kimaiyo anasema uchunguzi unaendelea lakini hakuna mshukiwa yoyete aliyekamatwa hadi kufikia sasa.

" Kwa wote wanaotaka kuzua vurugu na uchochezi miongoni mwa wakenya wakati huu wa uchaguzi, tunatoa onyo kuwa mkono mrefu wa serikali utawanasa. " alisema Kimaiyo.

" Maafisa wa Polisi wako katika pembe zote za nchi na wanafanya kazi saa ishirini na nne kuhakikisha wanaochapisha na kusambaza vijikaratasi hivyo wanakamatwa na kushtakiwa." aliongeza Kimaiyo.

Wakati huohuo, watu ishirini na watano wamekamatwa kufuatia visa vya ghasia vilivyoripotiwa katika kampeni za Uchaguzi katika mkoa wa kati na Rift Valley