Mwandishi wa habari wa Radio Deutchelle Welle, Hawra Shamte, akiuliza swali katika mkutano huo wa waandishi wa habari na Mwenyekiti wa Tume ya Mabadiliko ya Katiba, Jaji mstaafu Joseph Warioba. Mkutano huo umefanyika Ofisi za Tume jijini Dar es Salaam leo. (Picha zote na Omega Ngole, Ofisa habari wa Tume ya Katiba)
MAELEZO YA MWENYEKITI WA TUME YA MABADILIKO YA KATIBA
JAJI MSTAAFU JOSEPH S. WARIOBA KATIKA MKUTANO WA
WAANDISHI WA
HABARI TAREHE 09 AGOSTI, 2012 KATIKA UKUMBI WA
WA MIKUTANO WA TUME, DAR ES SALAAM
_____________________________
Ndugu
Wanahabari,
Nichukue fursa
hii kuwashukuru sana kwa kukubali mwaliko wetu na nawakaribisheni. Lakini pia
niwashukuru sana kwa namna mnavyotoa habari za Tume zikiwemo za mikutano ya
kukusanya maoni ya wananchi iliyofanyika katika Mikoa minane ya awamu ya kwanza.
Ndugu
Wanahabari,
Kama
mnavyokumbuka tarehe 19 Juni, 2012 nilifanya mazungumzo nanyi kwenye Ukumbi wa
Karimjee hapa Dar es Salaam, na siku iliyofuata yaani tarehe 20 Juni, 2012 nilifanya
mazungumzo na wenzenu wa Zanzibar, kwenye Ukumbi wa Salama uliopo katika Hotel
ya Bwawani. Lengo la mazungumzo yale ilikuwa ni kuzindua rasmi kazi za Tume
kupitia kwenu na kuwaeleza jinsi Tume ilivyokuwa imejipanga kutekeleza majukumu
yake.
Ndugu
Wanahabari,
Pamoja na
mikutano hii, Tume iliendelea kutoa elimu kwa umma kuhusu majukumu ya Tume na
kuwahamasisha wananchi wajitokeza kutoa maoni. Tume pia imechapisha na
kusambaza machapisho yafuatayo:
1.
Vitabu vya Katiba ya Jamhuri ya Muungano wa Tanzania na Katiba ya
Zanzibar;
2.
Kitabu cha Katiba na Sheria ya Mabadiliko ya Katiba kwa lugha nyepesi;
3.
Sheria ya Mabadiliko ya Katiba, Sura ya 83;
4.
Kijitabu kinachoelekeza wajibu na Majukumu ya Tume ya Mabadiliko ya
Katiba;
5.
Kipeperushi cha maswali yanayoulizwa mara kwa mara kuhusu Tume; na
6.
Kipeperushi kinachoeleza majukumu na kazi za Tume.
Nakala zote
hizo zilisambazwa kwenye Mikoa, Wilaya na Kata zote kwenye mikoa minane
iliyopangwa kufikiwa kwenye awamu ya kwanza.
Ndugu Wanahabari,
Leo nimewaalika
ili niwape tathmini ya kazi ya kukusanya maoni katika mikoa minane ya awamu ya
kwanza ambayo ni Pwani, Dodoma, Manyara, Kagera, Shinyanga, Tanga, Kusini
Unguja na Kusini Pemba. Mikutano katika mikoa hii ilifanyika kuanzia tarehe 2
Julai hadi tarehe 30 Julai 2012.
Nianze kwa
kusema kuwa Tume imefika na kufanya Mikutano kwenye Wilaya zote na kwenye vituo
vyote ilivyopanga. Katika mikutano hiyo, maoni ya wananchi yalipokelewa kwa
njia ya kuzungumza na wengine waliwasilisha maoni yao kwa maandishi.
Idadi ya
Mikutano iliyofanyika
Jumla ya
Mikutano iliyofanyika kwenye Mikoa yote minane ni 386. Kati ya Mikutano hiyo,
Tume ilifanya Mikutano 8 na Makundi maalum yakiwemo Taasisi za Dini na Vyombo
vya Ulinzi na Usalama.
Idadi ya
Wananchi waliohudhuria Mikutano ya Tume
Wastani wa wananchi
188,679 walihudhuria mikutano ya Tume. Hii ikiwa ni wastani wa watu 489 walifika
kwenye kila Mkutano. Tume inaridhika na idadi hii na inaonesha wananchi wana
mwamko wa kutoa maoni yao.
Idadi ya
Wananchi waliotoa maoni
Jumla ya
wananchi 17,440 walitoa maoni yao kwa njia ya kuzungumza kwenye Mikutano ya
Tume. Aidha, jumla ya wananchi 29,180 walitoa maoni yao kwa njia ya maandishi
na kuyawasilisha kwenye Mikutano ya Tume.
Ndugu
Wanahabari,
Kimsingi,
Tume imeridhika na kazi ya ukusanyaji wa maoni katika awamu ya kwanza na
imepata mafanikio yafuatayo:
i.
Mikutano yote iliyopangwa na Tume imefanyika kwa mujibu wa Ratiba;
ii.
Mikutano yote ilifanyika kwa amani na utulivu na wananchi walivumiliana
katika kutoa maoni yao;
iii.
Mikoa na Wilaya wameipa Tume ushirikiano mkubwa katika kutekeleza
majukumu yake;
iv.
Baadhi ya Wananchi wametoa maoni yao bila kushawishiwa na vikundi,
vyama au taasisi;
v.
Katika baadhi ya maeneo, Tume iliweka utaratibu na ilipokea maoni
kutoka kwa makundi maalum kama walemavu na wananchi wasioweza kuzungumza kwa lugha
ya Kiswahili;
Ndugu Wanahabari,
Pamoja na
mafanikio niliyoyataja hapo juu, Tume imekabiliana na changamoto mbalimbali.
Changamoto kubwa ambayo Tume imekutana nayo ni ya Vyama vya Siasa kuingilia uhuru
wa wananchi kutoa maoni yao. Vyama vya siasa vimekuwa vikitoa kauli na
maelekezo kwa wanachama wao kufuata misimamo ya vyama jambo linalowanyima
wananchi uhuru wa kutoa maoni yao. Tume inapenda kuvitaka vyama vya siasa
viwaache wananchi watoe maoni yao bila kuwashinikiza. Changamoto nyingine ni
pomoja na:
i.
Wanawake bado hawajitokezi kwa wingi kutoa maoni yao mbele ya Tume
ingawa wanahudhuria mikutano hiyo;
ii.
Baadhi ya Wananchi kutegemea njia moja tu ya kuwasilisha maoni kwa
kuzungumza wakati kuna njia nyingine kama barua pepe, posta n.k
iii.
Shughuli za Tume kuingiliana na shughuli nyingine za Kijamii kama vile ibada,
magulio n.k
iv.
Muda wa saa tatu kwa mkutano mmoja katika maeneo ya mjini umeonekana
hautoshi kwa wananchi kuchangia maoni yao;
Ndugu
Wanahabari,
Baada ya
kuwaeleza mafaniko na changamoto, naomba sasa nitoe wito kwenu kutumia kalamu
na kamera zenu kuwaelimisha kwa kuendelea kuwapatia wananchi taarifa sahihi
kuhusu utekelezaji wa majukumu ya Tume. Jiepusheni na kuandika habari zenye
lengo la kuwapotosha na kuwakatisha tamaa wananchi. Kama huna uhakika na jambo
unalotaka kuandika wasiliana na Ofisi ya Tume utapata ufafanuzi.
i.
Taasisi na Asasi mbalimbali zitumie uwezo wao kuwaelimisha wananchi
kufika kwenye Mikutano ya Tume na kutoa maoni yao au kuiandikia Tume;
ii.
Vyama vya Siasa, Taasisi na Asasi mbalimbali wawaache Watanzania watoe
maoni yao kwa uhuru bila kulazimishwa;
iii.
Wananachi wanapaswa kutambua kwamba, Katiba inayoandikwa ndiyo nguzo na
mwelekeo wa maisha yao ya kila siku, wasikubali kutumiwa kwa namna yoyote ile na
kikundi, Taasisi, Asasi au Chama chochote katika kuwasilisha maoni yao kwa
Tume;
Ndugu
Wanahabari,
Naomba
nimalizie kwa kuwaeleza kuwa awamu ya pili ya kazi ya ukusanyaji maoni ya
wananchi kuhusu Katiba Mpya itafanyika katika mikoa saba ambayo ni Mbeya,
Morogoro, Lindi, Ruvuma, Kigoma, Katavi na Mwanza. Kazi ya kukusanya maoni
kwenye Mikoa hii inatarajiwa kuaanza rasmi tarehe 27 Agosti, 2012 na kukamilika
tarehe 28 Septemba, 2012. Ratiba ya mikutano hiyo itatolewa na Tume hivi
karibuni.
Ahsanteni
kwa kunisikiliza.
TOA
MAONI, TUPATE KATIBA MPYA
No comments:
Post a Comment