Viongozi wa Dini wamtaka Dk. Magufuli kuendeleza mshikamano uliopo nchini

Viongozi wa Dini, Kiongozi wa Waislamu, Muft wa Bakwata, Sheikh Aboubakar Zubeir na Askofu wa KKKT na mwakilishi wa CCT, wakizungumza jambo wakati wakishuka kwenye jukwaa la kumwapishia Rais mpya Dk. John Magufuli, Uwanja wa Uhuru, Dar es Salaam leo.

Na Laurence-MAELEZO-Dar es Salam

Viongozi wa dini  nchini  wamemtaka Rais mpya wa Jamuhuri ya Muungano wa Tanzania Mhe. Dkt. John Pombe Magufuli kuiongoza Tanzania kwa kufuata misingi ya haki na utawala bora na kudumisha amani na mshikamano wa kitaifa miongoni  mwa wananchi.

Viongozi hao wametoa kauli hiyo leo jijini Dar es Salaam wakati wa sherehe za kumuapisha Rais wa Awamu ya Tano.

Katika nahasa zake  Mufti na Sheikh Mkuu wa Tanzania  Abubakar  Zuberi amesema kuwa Mungu ndio kila kitu katika maisha ya mwanadamu na ndiye mteuzi wa mambo yote  aliyefanikisha kumpata Rais wa Jamuhuri ya Muungano wa Tanzania.

Ameongeza kuwa ni vema kumtanguliza Mungu katika kuwaongoza vema wananchi wa Tanzania ili kufikia malengo ya kujiletea maendeleo.

Naye Askofu Mkuu wa Kanisa Katoliki, Jimbo Kuu la Dar es Salaam, Mwadhama Polycarp Kardinali Pengo  amesema kuwa uongozi ni dhamana kama ambavyo watanzania walivyomlilia Mungu ili awawezeshe kufanya uchaguzi wa amani na ndivyo  Rais wa Awamu ya Tano analo jukumu kufanya kazi zake akiongozwa na Mungu ili kuendelea kudumisha amani, upendo na ushirikiano uliopo katika taifa.

Kwa upande wa  Askofu Mkuu wa Kanisa la Kiinjili la Kilutheri la Tanzania Alex Malasusa amesema kuwa amani ni tunda la roho ni vema  Watanzania waendelee kuidumisha na viongozi wakiongoza nchi kwa hofu ya Mungu.