BUNGENI LEO MJINI DODOMA

Naibu Waziri wa Nchi Ofisi ya Waziri Mkuu Tawala za Mikoa na Serikali za Mitaa (TAMISEMI) Aggrey Mwanri akijibu maswali ya wabunge bungeni Dodoma.

Waziri wa Ulinzi na Jeshi la Kujenga Taifa Dkt. Hussein Mwinyi akijibu swali la mbunge Bungeni Dodoma.

Naibu Waziri wa Ardhi, Nyumba na Maendeleoa ya Makazi Angellah Kairuki, akijibu swali la mbunge Bungeni. 

Mjumbe wa Kamati ya Ulinzi na Usalama, Capt. Mstaafu John Chiligati akiwasilsha taarifa ya kamati yake.

 Mjumbe wa Kamati ya Bunge ya Mambo ya Nje na Ushirikiano wa Kimataifa, Selemani Jafo akiwasilisha taarifa ya kamati hiyo.

Mwenyekiti wa Kamati ya Bunge ya Uchumi, Viwanda na Biashara, Luhaga Mpina, akiwasilisha taarifa ya kamati yake.

Mbunge wa Kuteuliwa James Mbatia (mstari wa mbele aliyesimama), akiomba mwongozo kwa Mwenyekiti wa Bunge, Mussa Azzan Zungu.

Mwenyekiti wa Bunge, Mussa Azzan Zungu, akifafanua jambo kuhusu mwongozo wa mbunge Mbatia.

Baadhi ya wageni wa Spika waliohudhuria Bunge, wakiongozwa na Mkuu wa Jeshi la Polisi (IGP) Ernest Mangu(wa kwanza mstari wa chini).Kulia kwake ni Kamishna wa Jeshi la Magereza (CGP) John Casmir Minja.

Mjumbe wa Kamati ya Ulinzi na Usalama, Capt. Mstaafu John Chiligati (kushoto) akisalimiana na Waziri wa Mambo ya Nje na Ushirikiano wa Kimataifa, Bernard Membe huku mbunge wa Bariad Magharibi Andrew Chenge akitabasamu nje ya ukumbi wa Bunge.

Waziri wa Fedha Saada Mkuya, akibadilshana mawazo na Naibu Waziri wake Adam Malima nje ya ukiumbi wa Bunge mjini Dodoma.Pembeni yao ni Naibu Waziri wa Viwanda na Biashara Janeth Mbene.

Kamishna wa Jeshi la Magereza (CGP) John Casmir Minja, akisalimiana na Mbunge wa Tabora Mjini Ismail Aden Rage baada ya Bunge kuahirishwa majira ya asubuhi. Kulia ni Mbunge wa Babati Vijijini Jitu Soni.

Waziri wa Mambo ya Ndani ya Nchi (kulia) Mathias Chikawe akiwaongoza Mkuu wa Jeshi la Polisi (IGP) Ernest  Mangu na Mkuu wa Jeshi la Magereza (CGP) John Casmir Minja kushuka ngazi za Bunge.

 Naibu Waziri wake Adam Malima.

Naibu Waziri wa Habari,Vijana,Utamaduni na Michezo Juma Nkamia, akijibu maswali Bungeni.

Mbunge wa Viti Maalum, Amina Mwidau. 

Waziri wa Nchi Ofisi ya Waziri Mkuu Sera, Uratibu na Bunge, Jenista Mhagama akijibu swali la Mbunge la Mbunge wa Rombo Joseph Selasini. 

Naibu Waziri wa Elimu, Anne Kilango akijibu hoja za Wabunge.

 Mbunge la Mbunge wa Rombo, Joseph Selasini, akiuliza swali.

Mwenyekiti wa Bunge la Jamhuri Lediana Mng’ong’o akiongoza Bunge

Mwenyekiti Mpya wa Bunge la Jamhuri Kidawa Hamidi Saleh


Serikali yafanikiwa kujenga Barabara za km 42 mjini Dodoma

Na Lorietha Laurence-Maelezo, Dodoma

SERIKALI kupitia mradi wa uendelezaji miji (TSCP) imefanikiwa kujenga barabara zenye urefu wa kilometa 42 kwa mji wa Dodoma kwa msaada wa mfuko wa Benki ya Dunia.

Waziri wa Nchi Ofisi ya Waziri Mkuu Sera, Uratibu na Bunge, Jenista Mhagama ameeleza hayo Bungeni Dodoma, kuwa ujenzi huo wa barabara umehusisha pia ujenzi wa mifumo ya maji ya mvua ,dampo la kisasa kwa kijiji cha Chidaya pamoja na mitambo y usombaji taka.

“Maboresho hayo ya miundombinu kwa mji wa Dodoma, ni kuhakikisha kuwa mji mkuu huu wa Tanzania unakuwa katika madhari mazuri na yenye kukidhi haja za wananchi wake”, alisema Waziri Mhagama.

Alizitaja barabara hizo  kuwa ni pamoja na  maboresho ya  barabara ya Mwanza, Barabara ya 6 hadi 11,Barabara za Nkuhungu na Chamwino-chang’ombe  zenye jumla ya kilomita 15.7 ambapo ujenzi umekamilika kwa asilimia 100.

Aidha aliongeza kuwa jumla ya kilomita 27.12 za barabara za pembezoni mwa mji nazo zilijengwa kwa kiwango cha lami ambazo ni Area A kilomita 5.82, Kikuyu kilomita 5.65,Kisasa kilometa 12.90 na Chamwino kilometa 2,75.

Hata hivyo, alisema Benki ya Dunia imeahidi kutoa Dola za Kimarekani  milioni 7.66 kwa ajili ya kukamilisha mapungufu yaliyojitokeza katika awamu ya kwanza kwa ajili ya ujenzi wa barabara ya Independence na barabara ya mbeya kuelekea uhindini.

Wamiliki wa Shule Binafsi, Serikali watakiwa kuzingatia kiwango cha ufaulu

Na Lorietha Laurence-Maelezo, Dodoma

NAIBU Waziri wa Elimu na Mafunzo ya Ufundi Anna Kilango Malecela ametoa wito kwa wamiliki wote wa shule binafsi pamoja na za Serikali kuzingatia kiwango cha ufaulu kutoka kidato kimoja kwenda kingine kilichowekwa na Serikali.

Akijibu swali la Mbunge wa Rombo, Joseph Selasini, bungeni mjini Dodoma aliyetaka kujua kama Serikali inajua na kuunga mkono kiwango cha ufaulu  kwa shule zisizo za Serikali zinazoweka viwango maalum vya ufaulu tofauti na vile ilivyoviweka.

Naibu Waziri Anne Kilango alisenma Serikali haiungi mkono utaratibu huo kwa kuwa umekiuka waraka wa elimu namba 12 wa mwaka 2011 na waraka Namba 4 wa mwaka 2012.

“Napenda kusisitiza kuwa yeyote atakayekaidi maelekezo haya ya serikali atachukuliwa hatua kali za kinidhamu kwa mujibu wa sheria ya elimu Namba 25 sura ya 353 kifungu cha 35” alisema Kilango.

Aliongeza kuwa Waraka wa Elimu Na. 6 wa mwaka 2011 umetoa maelekezo kuhusu wastani wa ufaulu katika mtihani wa Kitaifa wa kidato cha pili ambao ni asilimia 30.

Hivyo aliwataka walimu waelewe kuwa wanafunzi wanatofautiana katika uelewa hivyo kuweka kiwango kikubwa cha wastani kunasababisha wanafunzi kukosa fursa ya kuendelea na masoma na hivyo kuanza utaratibu mpya ya kutafuta shule.

Alibainisha kuwa Serikali itazindua program ya KKK Februari 7, 2015 ikiwa na nia madhubuti ya kuboresha elimu kwa shule zote za serikali katika kutoa elimu bora kwa wananchi.

Bunge laridhika na hali ya ulinzi na usalama wa raia

Na Hussein Makame-MAELEZO, Dodoma

BUNGE limeridhishwa na hali ya ulinzi wa nchi, usalama wa raia na mali zao kwa kipindi cha mwezi Februari mwaka 2014 hadi Januari mwaka huu kutokana na hali ya ulinzi wa nchi na usalama wa raia kuwa shwari.

Hayo yamesemwa na Kamati ya Bunge ya Ulinzi na Usalama kupitia Mjumbe wa kamati hiyo Capt. Mstaafu John Chiligati wakati akiwasilisha taarifa ya kamati hiyo kwa kipindi cha mwezi Februari 2014 hadi Januari 2015, bungeni mjini Dodoma.

Alisema pamoja na hali kuwa shwari kulikuwepo na changamoto chache za uvunjifu wa amani, vitendo vya uporaji mali na  matukio ya mauaji ya vikongwe na watu wenye ualbino yaliyotokea katika baadhi ya mikoa.

“Katika ziara ya kamati pamoja na taarifa kutoka kwenye wizara husika, Kamati ilibaini kuwa kwa ujumla hali ya ulinzi wa nchi na usalama wa raia katika kipindi hiki ilikuwa shwari” alisema Capt. Mstaafu Chiligati na kuongeza.

“Ijapokuwa zipo changamoto chache za uvunjifu wa amani na vitendo vya uporaji mali na  matukio ya mauaji ya vikongwe na watu wenye ualbino yaliyotokea katika baadhi ya mikoa”

Capt. Mstaafu Chiligati alilipongeza Jeshi la Ulinzi la Wananchi kwa kazi kubwa na nzuri inayofanya ya kulinda mipaka ya nchi kwani katika kipindi hiki hali ya mipaka ya nchi imekuwa shwari.

Alibainisha kuwa ili kudumisha hali iliyopo, aliishauri Serikali itenge fedha za kutosha ili kuviwezesha vyombo vya ulinzi na usalama kufanya kazi nzuri zaidi na kuifanya hali ya nchi kendelea kutulia na kuwa na amani na utulivu.

Kwa upande wa masuala ya Ulinzina Usalama wa Mipaka, Capt. Mstaafu Chiligati alisema katika kipindi hicho hali katika mipaka yote ya Tanzania imekuwa shwari licha ya kuwepo kwa changamoto ya uingiaji wa wahamiaji haramu.

Kutokana na hali hiyo Kamati hiyo ililipongeza pia Jeshi la Polisi nchini kwa jitihada za kudhibiti uhalifu kote nchini na kupunguza matukio ya uhalifu katika baadhi ya maeneo yaliyokubwa na matukio hayo hivi karibuni.

“Aidha Kamati ilipotembelea mkoa wa Arusha iliridhika na hali ya kupungua kwa matukio ya uhalifu na pia ilikuta hali ya utulivu na amani imerejea katika jiji la Arusha” alisema Capt. Mstaafu Chiligati.

Alieleza kuridhishwa kwa kamati na taarifa za kukamtwa na kufunguliwa kesi mahakamani kwa baadhi ya watuhumiwa wa matukio ya kigaidi yaliyotokea katika mkoa wa Arusha.

Hata hivyo kamati alishauri kwamba kesi hiyo isikilizwe haraka na kutolewa hukumu ili ikidhi matarajio ya wananchi.

Kwa upande wa Mafunzo ya Jeshi la Kujenga Taifa (JKT) kwa mujibu wa Sheria, kamati iliishauri Serikali kuongeza muda wa mafunzo hayo kutoka miezi 3 hadi miezi 6 huku ikiitaka Serikali kuwachukulia hatua za kisheria wanafunzi wanaokwepa kuhudhuria mafunzo bila ya sababu za msingi.

Aliishauri Serikali kupitia Wizara ya Ulinzi na JKT na ile ya Elimu na Mafunzo ya Ufundi kukaa pamoja ili kutafuta njia ya kuoanisha mihula ya vyuo ili isigongane na muda wa mafunzo ya JKT kwa mujibu wa sheria.

Serikali kuweka mikakati makini kulinda Utamaduni wa Mtanzania

Na Lorietha Laurence-Maelezo Dodoma

SERIKALI imeweka mikakati mahususi kuhakikisha utamaduni wa Mtanzania unalindwa ili kuepushwa kuathiriwa na mabadiliko ya teknolojia na utandawazi.

Hayo yamsemwa na Naibu Waziri wa Habari, Vijana, Utamaduni na Michezo Juma Nkamia, wakati akijibu swali la Mbunge wa Viti Maalum, Amina Mwidau, aliyetaka kujua Serikali ina mikakati gani ya kuimarisha sera na kanuni mbalimbali kudhibiti  matumizi ya utandawazi na teknolojia.

Naibu Waziri Nkamia alisema sera  hizo znasiamamiwa na Baraza la Kiswahili Tanzania, Bodi ya Filamu Tanzania, pamoja na kamati ya maudhui iliyo chini ya Mamalaka ya Mawasiliano Tanzania (TCRA) ambayo husimamia maudhui ya vyombo vya habari.

“Hata hivyo natoa wito kwa wananchi kushirikiana na serikali kuhakikisha kuwa tunalinda na kudumisha utamaduni wetu kwa kila mmoja kuwa mlinzi wa mwenzake “ alisema Nkamia.

Aidha aliongeza kuwa Serikali itaendelea kuhamasisha jamii kuongeza uzalishaji wa bidhaa na huduma zenye kuimarisha utambulisho wa Tananzania kwa kununua na kutumia bidhaa hizo.

Naye Mariam Msabaha  Mbunge wa Viti Maaluma alihoji hatua zilizochukuliwa na serikali  katika kuzuia filamu zisizo na maadili kuingia nchini, ambapo Naibu Waziri Nkamia alisema kuwa Bodi ya Filamu Tanzania inahusika katika kuhakiki maudhui ya filamu kutoka nje kabla ya kuingia sokoni na kwa zile zinazoingia kwa njia ya magendo husakwa na kuteketezwa kwa moto.

“Hakuna filamu inayoingia nchini bila ya kukaguliwa na watu wa Bodi ya Filamu ili kujiridhisha na maudhui yake na hivyo kuweza kuingia sokoni tayari kwa kutumiwa na watanzania”. alisema Nkamia.

Vilevile alieleza  kuwa wizara yake imejipanga  katika kuongeza kasi ya  kutoa taarifa kwa umma kuhusu utendaji wa kazi zake ikiwemo tafiti mbalimbalili zinazofanywa.

Bunge lafanya uteuzi wa Wenyeviti wapya

Na Hussein Makame-MAELEZO, Dodoma

BUNGE la Jamhuri la Jamhuri ya Muungano wa Tanzania limewateua Mbunge wa Viti Maalum (CCM), Lediana Mng'ong'o na Mbunge wa Viti Maalum (CCM) Kidawa Hamidi Saleh kuwa  wenyeviti wa Bunge hilo.

Akitangaza uteuzi huo Bungeni mjini Dodoma, Spika wa Bunge Anne Makinda alisema wenyeviti hao wapya wanachukua nafasi za aliyekuwa mwenyekiti wa Bunge ambaye sasa ni Waziri wa Nchi, Sera, Uratibu na Bunge, Jenista Mhagama.

Kufuatia uteuzi huo Mwenyekiti Mng’ong’o ameanza kazi leo baada ya kipindi cha maswali na majibu Bungeni kilichokuwa chini ya Mwenyekiti Musa Azzan Zungu.

Pika Makinda alisema Mwenyekiti mpya Kidawa anachukua nafasi ya aliyekuwa mwenyekiti wa Bunge hilo kutoka upande wa Zanzibar ambaye kwa sasa hayupo kutokana na kazi maalum, Mohamed Seif Khatibu.

Alifafanua kuwa uteuzi huo umefanywa na Kamati ya Bunge ya Utawala ambayo ilikaa jana mchana na kupitisha majina hayo ambayo aliyapeleka Bungeni ili kupigiwa kura na wabunge.

Hivyo, Spika Makinda aliwaomba wabunge kupiga kura ya ndio au hapana kuthibitisha uteuzi huo, ambapo wabunge walipitisha uteUuzi huo kwa kupiga kura ya ndio na kubariki wenyeviti hao wapya.

Serikali yaendelea kupokea fidia ya athari ya vita kutoka Uganda

Na Lorietha Laurence-Maelezo Dodoma

SERIKALI ya Tanzania imepokea takribani shillingi bilioni 15.5 kutoka Serikali ya Uganda ikiwa ni fidia   itokanayo na athari za vita vya Kagera.

Naibu Waziri wa Fedha Adam Malima ameeleza hayo Bunge mjini Dodoma kuwa  fidia iliyokuwa inatakiwa kulipwa ni  Dola za Marekani  milioni 18.4 ingawa Uganda imelipa Dola milioni 9.7 zilizoingizwa kwenye mfuko mkuu wa Hazina.

“Kiasi hicho cha  fedha kilipokelewa na kuwekwa  katika Mfuko Mkuu wa Hazina kwa ajili ya matumizi ya maendelao ya wananchi ” alisema Malima.

Alibainisha kuwa  taratibu za fidia zitokanazo na hasara za vita hiyo zinaongozwa  na sheria  na kanuni  za kimataifa  pamoja na  utaratibu wa kutathmini kiwango cha hasara kitokanacho na vita.

Aliongeza kuwa licha ya kwamba vita hivyo viliathiri taifa zima la Tanzania ,mkoa wa Kagera umepokea fedha kutoka Mfuko Mkuu wa serikali ambayo imesaidia kusukuma maendelao ya wananchi.