Vijana Halmashauri ya Wilaya ya Ileje Mkoa wa Mbeya wafaidika na Mkopo wa shilingi milioni 10

Katibu Tawala Wilaya ya Ileje Bw. Francis Mbenjile katikati akizungumza na ujumbe kutoka Wizara ya Habari, Vijana, Utamaduni, na Michezo walipomtembelea ofisini kwake jana wakati wa ziara ya kuhamasisha vijana wa Ileje kuhusu Ujasiriamali, Ujuzi, Stadi za Maisha na Mfuko wa Maendeleo ya Vijana Wilaya ya Ileje Mkoa wa Mbeya. (Picha zote na Genofeva Matemu – Maelezo)

Mwezeshaji kutoka Wizara ya Habari, Vijana, Utamaduni na Michezo Bibi Ester Riwa akitoa mada ya Stadi za Maisha kwa vijana wa Wilaya ya Ileje walioudhuria semina ya Ujasiriamali, Ujuzi, Stadi za Maisha na Mfuko wa Maendeleo ya Vijana jana katika Wilaya ya Ileje Mkoa wa Mbeya.

Baadhi ya Vijana wa Wilaya ya Ileje wakifuatilia kwa makini mafunzo yaliyokua yakiendelea wakati wa semina ya Ujasiriamali, Ujuzi, Stadi za Maisha na Mfuko wa Maendeleo ya Vijana jana katika Wilaya ya Ileje Mkoa wa Mbeya.

Na Genofeva Matemu – Maelezo, Mbeya

Tarehe 23/01/2015

HALMASHAURI ya Wilaya ya Ileje Mkoa wa Mbeya yaishukuru serikali kupitia Wizara ya Habari, Vijana Utamaduni na Michezo kuwakopesha Shilingi Milioni 10 zilizokopeshwa katika Saccoss za vijana wa Wilaya hiyo.

Kauli hiyo imetolewa na Afisa Maendeleo ya jamii Bw. Rodrick Sengela walipotembelewa na ujumbe kutoka Wizara ya Habari, Vijana, Utamaduni na Michezo jana kwa ajili ya kutoa elimu ya Ujasiriamali, Stadi za Maisha, Ujuzi na Mfuko wa Maendeleo ya Vijana kwa vijana wa Wilaya ya Ileje  Mkoa wa Mbeya.

“Tunaishukuru Wizara ya Habari, Vijana, Utamaduni na Michezo kupitia Mfuko wa Maendeleo ya Vijana kuwakopesha vijana wa Ileje shilingi milioni 10 zilizokopeshwa mwaka 2005 na kupelekwa katika Saccoss ya Vijana ya Ngulilo na Saccoss ya Vijana ya Chitete zilizotumika kuendeleza shughuli za vijana katika Wilaya” alisema Bw. Sengela.

Hata hivyo Bw. Sengela amesema kuwa Wilaya ya Ileje imekua ikijitahidi kuiendeleza jamii ya Ileje kwani kwa mwaka wa fedha 2014/2015 Wilaya imeshachangia shilingi million 6 katika mfuko wa vijana na wanawake kutimiza agizo la kila Halmashauri kuchangia alisimia 5 katika mfuko huo kuwaendeleza vijana na wanawake.

Kwa upande wake Mkurugenzi Mtendaji Halmashauri ya Wilaya ya Ileje Bw. Musa J. Otieno amesema kuwa Wilaya ya Ileje imekua na changamoto kubwa kutokana na Wilaya hiyo kuwa mpakani na nchi ya Malawi kwani vijana wengi wamekua na tabia ya kuchukua mikopo inayotolewa na Serikali na kuhamia nchi ya Malawi hivyo kuifanya Wilaya hiyo kushindwa kurejesha mikopo hiyo.

Aidha Mwezeshaji kutoka Wizara ya Habari, Vijana, Utamaduni na Michezo Bibi Ester Riwa amewataka vijana wa Halmashauri ya Wilaya ya Ileje kuwatumia viongozi wa Wilaya yao kupata mbinu mbadala za kuijasiriamali na kutumia mikopo wanayoipata kuendeleza shughuli za maendeleo zilizopo katika Wilaya hiyo.

Bibi Riwa amesema kuwa Wilaya ya Ileje imehamasika na zoezi la kutoa mafunzo ya ujasiriamali kwa vijana linalofanywa na Wizara ya Habari, Vijana, Utamaduni na Michezo hivyo kuwataka vijana wote waliopata mafunzo hayo kuyatekeleza na kuyatoa kwa vijana wengine ambao hawakubahatika kuhudhuria mafunzo hayo.