TFDA na Mpango wa Miaka 5 wa Utekelezaji jukumu la kulinda afya za Jamii nchini Tanzania

Ofisa Uhusiano wa Mamlaka ya Chakula  na Dawa  (TFDA) Bi. Gaudensia Simwanza akiwaeleza waandishi wa habari kuhusu  Utekelezaji wa mpango wa miaka mitano (5) unaolenga kutekeleza jukumu la kulinda afya ya Jamii kwa kudhibiti ubora na usalama wa vyakula, dawa, vipodozi na vifaa tiba. Kushoto ni  Ofisa Uelimishaji   wa Mamlaka hiyo Bw. James Ndege na Kulia ni Afisa Habari wa Idara ya Habari Maelezo, Bi. Fatma Salum 

Ofisa Uhusiano wa Mamlaka ya Chakula  na Dawa  (TFDA) Bi. Gaudensia Simwanza  akisisitiza jambo kwa waandishi wa habari (hawapo pichani) kuhuhu mafanikio yaliyofikiwa na Mamlaka hiyo ikiwemo kuimarisha ukaguzi wa bidhaa zinazoingia  na kutoka nchini. Kushoto ni  Afisa Uelimishaji   wa Mamlaka hiyo Bw. James Ndege.

Na Frank Mvungi- Maelezo

Mamlaka ya Chakula na Dawa (TFDA) yaendelea kupata mafanikio katika Kutekeleza Mpango mkakati wa miaka mitano  (5) unaolenga kutekeleza jukumu la kulinda afya ya jamii kwa kudhibiti ubora na usalama wa vyakula,dawa,vipodozi na vifaa tiba.

Hayo yamesemwa leo jijini Dar es salaam na Afisa Uhusiano wa Mamlaka hiyo Bi Gaudensia Simwanza wakati akiwaeleza waandishi wa habari kuhusu utekelezaji wa Mpango Mkakati huo.

Katika kutekeleza Mkakati huo kwa mwaka 2013.14 TFDA ilifanya Ukaguzi wa majengo na bidhaa katika maeneo 5,785 ambapo idadi hiyo ni Zaidi ya majengo 1,869 (48%) ikilinganishwa na majengo 3,916 yaliyokaguliwa katika kipindi cha mwaka 2012/13 na jumla ya maeneo 4,000 sawa na 69% yalikidhi vigezo alisema Simwanza.

Akizungumzia uchunguzi wa maabara Simwanza amesema Mamlaka yake ilipokea Sampuli 2,389 kwa ajili ya uchunguzi wa kimaabara na kufanya kuwa na jumla ya sampuli 2,686 zikiwa ni pamoja na baki ya sampuli 305 za mwaka jana ambapo kati ya hizo sampuli 2,456 (91%) zilichunguzwa ambapo sampuli 2,379 sawa na 97% zilifaulu.

Sampuli zilizochunguzwa kwa mwaka huo ni pungufu ya sampuli 235 (9%) ikilinganishwa na zilizochunguzwa mwaka uliopita wa 2012/13, hii inaonyesha kwamba bidhaa nyingi zilizopo sokoni zinakidhi vigezo vya ubora na usalama.

Aidha katika kudhibiti usalama na ubora wa bidhaa zinazoingia na kutoka nchini TFDA iliidhinisha jumla ya maombi 11,887 ya Chakula, dawa, vipodozi na vifaa tiba ambapo maombi 10,082 ya kuingiza bidhaa ndani ya nchi na 312 ya kutoa bidhaa nchini sawa na 87%.

Pamoja na mafanikio yaliyofikiwa Simwanza alisema kuwa TFDA inakabiliwa na changamoto mbalimbali ikiwemo kasi kubwa ya kukua kwa teknolojia na soko huria ambavyo vinachochea utengenezaji wa bidhaa bandia hivyo ni jukumu la kila mwananchi kuhakikisha ananunua bidhaa zenye ubora na kutoa taarifa anapobaini bidhaa zisizo na viwango.