Waasi wauteka tena mji wa Bentiu

Waasi wadai kuudhibiti upya Bentiu kutoka kikosi cha serikali

Wapiganaji nchini Sudan kusini wanasema wameudhibiti mji mkubwa katika jimbo lenye utajiri wa mafuta, na wametoa makataa kwa makampuni ya mafuta kusitisha utengenezaji wa mafuta na iwaondoshe wafanyakazi.

Walinda amani wa Umoja wa mataifa waliwaokoa wafanyakazi kumi wa kampuni ya mafuta ya Urusi, Safinat kaskazini mwa mji wa Bentiu, kutoka ghasia hizo, watano kati yao walijeruhiwa.

Akizungumza kwa njia ya simu kutoka jimbo la Unity, kamanda mmoja wa waasi alieleza kwamba kikosi cha waasi kimeudhibiti upya mji wa Bentiu kutoka kwa wanajeshi wa serikali.
Athari za ghasia
Sudan kuisni imeshuhudia ghasia kubwa mnamo mwezi Desemba, wakati kulizuka mapigano kati ya wanajeshi wanaomtii aliyekuwa makamu wa rais Riek Machar na wale wanaomtii rais Salva Kiir.
Maelfu ya watu wanaaminika kuuawa huku wengine zaidi ya milioni wakiyakimbia makaazi yao.

Raia wengi wametoroka makaazi yao kutokana na mapigano

Wakati mapigano hayo yanaendelea mratibu wa misaada wa Umoja wamataifa nchini humo, Toby Lanzer, ameghadhabishwa na kukasirishwa na viongozi wa kisiasa na kijeshi Sudan kusini.
Amesema kuzuka upya mapigano hayo kutaathiri jitihda za kuepuka baa la njaa linalotarajiwa.
Maafisa wa mashirika ya kimataifa ya misaada wametumia 'baa la njaa' mara kwa mara kuelezea hali itakayoikabili Sudan kusini katika miezi ijayo.
Nchi hiyo ni maskini na wakaazi wengi wanaishi kwa kula vyakula wanavyopanda na kuvuna. Kutokana na mapigano yanayoendelea, wakaazi wengi wanashindwa kupanda vyakula kwa matayarisho ya msimu ujao wa mvua.