Wananchi wahamasishwa kuhudhuria warsha ya kujadili miradi ya maendeleo

Na Frank Shija MAELEZO

SERIKALI imeandaa warsha ya wazi ya siku mbili kwa wananchi ili kujadili na kutoa maoni kuhusu mpango mpya wa ufatiliaji na utekelezaji wa miradi ya maendeleo ujulikanao kama 'Big Results Now'.

Hayo, yamesemwa na Kaimu Katibu Mkuu Kiongozi Peniel Lyimo alipokuwa akiongea na waandishi wa habari leo, ofisini kwake jijini Dar es Salaam wakati alipokuwa akielezea kuhusu maandalizi ya warsha hiyo.

Katibu Mkuu Lyimo, amesema kuwa warsha hiyo, itawapa nafasi wananchi kukutana na wataalamu waliofanya kazi hiyo ana kwa ana pamoja na kuuliza maswali na kupata uelewa juu ya miradi ambayo utekelezaji wake utaongeza kasi ya kukua kwa uchumi na kuiwezesha nchi kufikia malengo ya Dira ya Taifa ya Maendeleo 2025.

“Serikali imeandaa warsha ya wazi, ambapo matokeo ya uchambuzi wa kitaalamu yatawasilishwa ili kutoa fursa kwa wananchi kuchangia na kutoa maoni juu ya miradi na program hizo za maendeleo,” alisema Kaimu Katibu Mkuu.

Aidha, Katibu Mkuu huyo ameeleza kuwa warsha hiyo itafanyika kwa siku mbili kuanzia Mei  24 hadi 25, 2013 katika Viwanja vya Makumbusho ya Taifa, jijini Dar es Salaam ambayo yatafunguliwa na Rais wa Jamhuri ya Muungano wa Tanzania, Jakaya Kikwete.

Ameeleza kuwa Serikali imefanya uamuzi wa kuanzisha mfumo mpya wa ufuatiliaji na tathmini ua utekelezaji wa maeneo ya kipaumbele ya Mpango wa maendeleo wa miaka mitano ambao unaanzia 2011 hadi 2016 ili kuboresha na kuharakisha utekelezaji wa Dira ya Taifa ya Maendeleo 2025.

Aliongeza kuwa mfumo huo wa ufuatiliaji ni utaratibu ambao umeleta mafanikio makubwa katika nchi ya Malaysia na unajulikana kwa jina la “Big Fast Result” (BFR),kwa Tanzania utaitwa Big Result Now (BRN) ambapo utaratibiwa na kitengo maalum kitakachoundwa chini ya  ofisi ya Waziri Mkuu.

Kwa upande wake Katibu Mtendaji wa Tume ya Mipango Dk.Philip Mpango amesema kuwa mfumo huu utajikita katika kuchambua kwa kina miradi iliyobainishwa katika mpango wa maendeleo wa miaka mitano, kuainisha maeneo machache yatakayoleta matokeo makubwa haraka,kuandaa ratiba ya utekelezaji wa kila mradi na kuzaidia katika utatuzi wa changamoto mbalimbali wakati wa utekelezaji,ikiwa ni pamoja na kuweka utaratibu huru wa kupima utendaji kazi wa viongozi wenye dhamana ya kutekeleza miradi na program za maendeleo.

Wananchi wametakiwa kujitokeza kwenda kutoa maoni yao na kuangalia baadhi ya miradi ambayo ipo chini ya mpango huo, ili kuweze kujifunza na kuongeza uelewaa juu ya utaratibu huo mpya ulioridhiwa na Baraza la Mawaziri kakita warsha iliyofanyika  mjini Dodoma Oktoba 22-24, 2012.