Watu 10 wafariki ajali ya treni na basi Kigoma, Tanzania

Haki miliki ya pichaSHIRIKA LA RELI TANZANIA

Watu 10 wamefariki katika ajali iliyotokea baada ya basi la abiria lililogongana na treni eneo la Gungu katika manispaa ya Kigoma Ujiji, kaskazini magharibi mwa Tanzania.

Kwa mujibu wa taarifa kutoka ikulu, ajali hiyo ilitokea majira ya saa kumi na mbili na robo asubuhi.

Basi hilo la abiria ambalo linamilikiwa na kampuni ya Prince Hamida linadaiwa kugongana na treni lilipokuwa linatoka Kigoma Mjini kwenda Tabora.

Treni hiyo ya mizigo ilikuwa ikitoka Kazuramimba kwenda Kigoma Mjini.

Rais wa Tanzania John Magufuli ametuma salamu za rambirambi na kuwataka „wadau wote wa usalama barabarani kuchukua hatua madhubuti za kuzuia ajali hizi."

"Vyombo husika, chukueni hatua kali kwa wote wanaokiuka sheria za usalama barabarani," amesema.

• Treni ya starehe ilioundwa India
• Shirika laomba radhi treni kuondoka sekunde 20 mapema
• Kwa Picha: Treni yenye starehe na ghali yaundwa Japan

• Treni inayobweka kama mbwa ili kuwafukuza swara kutoka kwa reli Japan

Mbunge wa Kigoma mjini Zitto Kabwe amesema eneo ilipotokea ajali hiyo hutokea ajali za aina hiyo mara kwa mara.

"Nimezungumza na Mkurugenzi Mkuu wa Shirika la Reli Tanzania (TRC ) na tumekubaliana kuwa tuweke kizuizi (barrier) katika eneo hili ambapo reli inakatiza barabara," amesema.

„ Hii itasaidia sana kupunguza ajali za namna hii. Mkurugenzi wa TRC Bwana Masanja Kadogosa amekubali ushauri huu ambao wananchi wengi wa Kigoma Mjini wamekuwa wakiutoa."